सहज च्यालेन्ज फण्डका लागि आवेदन खुल्यो

A+ A A-

सहज भनेर पनि चिनिने नेपाल कृषि बजार विकास कार्यक्रम (NAMDP) र आइडिया स्टुडियो नेपालको सहकार्यमा ‘सहज च्यालेन्ज फण्ड - दोस्रो चरण’ का लागि आवेदन खुला गरिएको छ । यही असार ९ गते विराटनगरमा एक कार्यक्रमको आयोजना गरी उक्त कार्यक्रमका लागि आवेदन खुला गरिएको घोषणा गरिएको हो |

पत्रकार सम्मेलनमा कृषि मन्त्रालय प्रदेश १ का सचिव मेगनाथ तिमल्सिना, पशुपन्छी तथा मत्स्य विकास निर्देशनालयका प्रमुख डा. पशुपति ढुंगाना, खाद्य प्रविधि तथा गुण नियन्त्रण कार्यालयका प्रमुख राजकुमार रिजाल, मोरङ व्यापार संघका नवनिर्वाचित अध्यक्ष नवीन रिजाल, कृषि बजार विकास कार्यक्रम (NAMDP) का टिमलिडर रिक भेन डर क्याम्प, व्यवसाय सक्षम वातावरण र संघीय राज्य भवनका प्रबन्धक विष्णुप्रसाद काफ्ले, कृषि सेवा व्यवस्थापनकी प्रबन्धक शुभेच्छा श्रेष्ठ, कृषि सेवा दीर्घकालीन परामर्शदाताका उत्कर्ष प्रसाद, आइडिया स्टुडियो नेपालका कार्यकारी अध्यक्ष डा. छिरिङ लामा, मिडिया कर्मीहरू, आइडिया स्टुडियो नेपालका कर्मचारीसहित ५० जनाभन्दा बढीको सहभागिता थियो |

दुग्धजन्य उत्पादनमा नवीनतम सोच भएका स्टार्टअप, साना तथा मझौला उद्यमी र स्थापित सस्थाहरूले यसमा आवेदन दिन सक्नेछन् । आवेदकहरूले प्रदेश नम्बर १ मा दुग्धजन्य उद्योग क्षेत्रमा पहिचान भएका दुग्धजन्य उत्पादन विविधिकरणसँग सम्बन्धित चुनौतीहरूलाई सम्बोधन गरेर त्यसको समाधान पनि प्रस्तुत गर्नुपर्नेछ । आवेदन साउन ६ गतेसम्म दिन सकिनेछ ।

आवेदकहरूको नवीनतम सोच दुग्धजन्य उत्पादन सम्बद्ध नवप्रवर्तनात्मक, समाधानमुखी र व्यावसायिक सम्भाव्यता भएको हुनुपर्नेछ ।

सहज च्यालेन्ज फण्डको दोस्रो चरणको कुल बजेट २ करोड नेपाली रुपैयाँ हुनेछ । यस फण्डअन्तर्गत निजी व्यवसाय तथा उद्यमीहरूले न्यूनतम ५ लाख देखि ५० लाख नेपाली रुपैयासम्म प्राप्त गर्नेछन् । यसरी छनोट गरिएका आवेदकले नगद राशिसँगै व्यवसाय अगाडि बढाउन एक वर्षसम्मका लागि विभिन्न किसिमका प्राविधिक सहयोग पनि पाउन सक्नेछन् ।