मातृकाले किन बहिष्कार गरे प्रचण्ड सहभागी भएको जनकपुर प्रशिक्षण ?

फाइल तस्वीर ।

A+ A A-

माओवादी केन्द्रका नेता मातृकाप्रसाद यादव माओवादीले जनकपुरमा आयोजना गरेको प्रशिक्षण कार्यक्रममा सहभागी भएनन् ।

माओवादीका अध्यक्ष पुष्पकमल दाहाल प्रचण्डसमेत सहभागी भएको कार्यक्रममा यादवको अनुपस्थिति किन भन्ने माओवादी केन्द्रभित्र चासोको विषय बनेको छ । यादव स्वयम्‌को जवाफ पनि सटिक छ- जानुपर्ने कारण थिएन र नजानुपर्ने कारण पनि थिएन ।

शिलापत्रसँग टेलिफोलन कुराकानीमा यादवले भने, ‘अध्यक्ष स्वागत गर्न विमानस्थल गएँ, बिदाइ गर्न पनि गएँ । प्रशिक्षण कार्यक्रममा जानुपर्ने कारण थिएन, त्यस कारण गइनँ ।’

यादवले यसो भनिरहँदा माओवादी केन्द्रको मधेस प्रदेशभित्रको अन्तरसंघर्ष पनि चर्को रहेको बुझिन्छ । खासमा यादव मधेसमा नेता गिरिराजमणि पोखरेल हाबी भएको देख्न चाहँदैनन् । माओवादीभित्र जनमत बलियो भएका नेतामै पर्छन् पोखरेल र यादव ।

प्रचण्डले पोखरेललाई अगाडि बढाएको देख्न नचाहने यादव मंगलबारको कार्यक्रममा पनि पोखरेलकै उपस्थितिका कारण यादव प्रशिक्षणमा सहभागी नभएका हुन् । माओवादी स्रोतका अनुसार प्रचण्डले अझ नारायणकाजी श्रेष्ठलाई समेत साथ लिएर हिँडेपछि यादव रुष्ट भएका छन् ।

यादव र पोखरेलको अन्तरसंघर्ष माओवादीको महाधिवेशनमा पनि देखिएको थियो । यादवनिकट नेताहरूले महोत्तरीमा प्राविधिक कलेज स्थापनाको नाममा नेता पोखरेलले रामवृक्ष यादवको सालिक ढालेको भन्दै गम्भीर कारबाहीको माग गरेका थिए । त्यही मुद्दा उठाएर महाधिवेशनमा हंगामा गरेपछि पोखरेलले एक दिन महाधिवेशन नै बहिष्कार गरेका थिए ।

२० फागुनको केन्द्रीय कमिटी बैठकमा पनि यो एजेण्डा परेको थियो । त्यतिबेला पनि यादवकै जोडबलमा उक्त एजेण्डा परेको थियो । मधेशमा अहिले माओवादीका मातृका यादव, इन्चार्ज गणेश साह र गिरिराजमणि पोखरेल गरी तीनवटा टिम देखिएको छ ।

मंगलबारको प्रशिक्षणमा नजानुमा गिरिराजमणि पोखरेलसँगको अन्तरसंघर्ष रहेको घुमाउरो पारामा यादवले स्वीकार गरे । शिलापत्रसँगको कुराकानीमा पोखरेलप्रति व्यङ्ग्य गर्दै यादवले भने, ‘उहाँहरूजस्तो क्रान्तिकारी नेताहरू पार्टीमा चाहिन्छ, नत्र त पार्टी ध्वस्त भइहाल्छ नि ।’

प्रकाशित मिति: मंगलबार, चैत ८, २०७८ १९:५६