प्रदेश १ मा बन्दको प्रभाव सामान्य, आठ जना पक्राउ

A+ A A-

अमेरिकी सहायता परियोजना एमसीसीको विरुद्धमा विभिन्न पाँच कम्युनिष्ट पार्टी र एक मोर्चाले गरेको नेपाल बन्दको प्रभाव प्रदेश १ सामान्य देखिएको छ । प्रदेश १ का अधिकांश जिल्लाहरूमा बन्दको प्रभाव सामान्य देखिएको हो ।

मोहन वैद्य नेतृत्त्वको नेकपा (क्रान्तिकारी माओवादी), नेत्रविक्रम चन्द (विप्लव) नेतृत्त्वको नेपाल कम्युनिस्ट पार्टी, ऋषि कट्टेल नेतृत्त्वको नेकपा, आहुति नेतृत्त्वको वैज्ञानिक समाजवादी पार्टी र कर्णजित बुढाथोकी नेतृत्त्वको नेकपा माओवादी केन्द्र समाजवादी तथा सीपी गजुरेल नेतृत्वको देशभक्त गणतान्त्रिक मोर्चा नेपालले मंगलबार नेपाल बन्दको आह्वान गरेका छन् ।

सरकारले प्रतिनिधिसभामा एमसीसी टेबुल गर्न लागेको बेला उक्त सम्झौता राष्ट्रघाती रहेको भन्दै बुधबार पाँच कम्युनिष्ट पार्टी र एउटा मोर्चाले नेपाल बन्दको घोषणा गरेका हुन् ।

प्रदेश राजधानी विराटनगरलगायत प्रदेशभरी कल कारखाना, बजार, पसल यातायातका साधन निर्वाधरुपमा सञ्चालन भएका छन् । बन्दको प्रभाव शिक्षण संस्थामा परेको छ । शहरी क्षेत्रका अधिकांश विद्यालयहरू बन्द गरिएको छ ।

बन्दको हल्लासँगै सुरक्षा व्यवस्था कडा पारिएको प्रदेश प्रहरी कार्यालय विराटनगरले जनाएको छ । बिहानैदेखि बाक्लो संख्यामा सुरक्षाकर्मी परिचालन गरिएको प्रदेश प्रहरी कार्यालय विराटनगरका प्रवक्ता प्रहरी उपरीक्षक नवीनराज राईले जानकारी दिए ।

उनका अनुसार बन्द गराउँदै हिँड्ने आठ जनालाई प्रहरीले नियन्त्रणमा लिएको छ । प्रदेश १ को इलाममा तीन र झापामा पाँच जनालाई नियन्त्रणमा लिइएको प्रवक्ता राईले शिलापत्रलाई जानकारी दिए । ‘बन्दमा अहिलेसम्म आठ जनालाई नियन्त्रणमा लिएका छौँ’, उनले भने, ‘प्रदेश १ मा बन्दको प्रभाव सामान्य छ । कुनै अप्रीय घटना भएको छैन । बाक्लो संख्यामा प्रहरी परिचालन गरिएको छ ।’