मन्त्री छनोटमा कांग्रेसमा भाँडभैलो

A+ A A-

सरकारकाे नेतृत्वकर्ता दल नेपाली कांग्रेसमा मन्त्रालय छनोटमा भाँडभैलो भएको छ । प्रधानमन्त्री शेरबहादुर देउवा महाधिवेशन केन्द्रित हुँदै प्रधानमन्त्री पदलाई नेताहरूको व्यवस्थापनको अवसरमा दुरुपयोग गरेकाे भन्दै उनी इतर समूहले आलोचना गरिरहेको छ ।

बालुवाटारमा बुधबार बसेको कांग्रेस पदाधिकारी बैठकमै सभापति देउवा र वरिष्ठ नेता रामचन्द्र पौडेलबीच भनाभन भएको थियो । पौडेल पक्षले तीन मन्त्री मागेपछि देउवाले दिन नसकिने जवाफ दिएका छन् । देउवाले कांग्रेस सचेतक पुष्पा भुसाललाई मन्त्री बनाउन खोजिरहेका छन् ।

आफूनिकट नेता मीनबहादुर विश्वकर्मा पनि मन्त्रीको आकांक्षी रहेकाले देउवा दबाबमा छन् । आफ्नो समूहबाट उनले बालकृष्ण खाँण, ज्ञानेन्द्रबहादुर कार्की, डा. नारायण खड्कालाई मन्त्री बनाएका छन् भने राज्यमन्त्रीमा उमेश श्रेष्ठलाई समेटिसकेका छन् ।

कांग्रेसको भागमा सात मन्त्रालय छ । पौडेलले पदाधिकारी बैठकमा तीनवटा मन्त्रालय माग गरेपछि देउवाको जवाफ थियो, 'दिन सक्दिनँ ।' पौडेल समूहबाट सुजाता कोइराला, मिनेन्द्र रिजाल, दिलेन्द्र बडु, राजन केसी र तेजुलाल चौधरीलगायत मन्त्रीका आकांक्षी छन् ।

तर, यीमध्येबाट दिलेन्द्र बडु र तेजुलाल चौधरी मन्त्री बन्ने सम्भावना बढी छ । तीनवटा मन्त्री पाएको खण्डमा राजन केसीलाई पनि पठाउने तयारी छ । यता सिटौला पक्षले मन्त्रीको लागि सिफारिस गरेका उमाकान्त चौधरीप्रति पनि देउवाले असन्तुष्टि व्यक्त गरेका छन् ।

'हामीले चौधरीजीलाई सिफारिस गरेका थियौं । उहाँप्रति प्रधानमन्त्रीले राम्रो सिग्नल दिनुभएन,' सिटौलानिकट एक नेताले भने । आन्तरिक लफडाका कारण कांग्रेसलाई मन्त्री टुंग्याउन अझै समय लाग्ने भएको छ । चौधरी नभएको खण्डमा सिटौला समूहबाट भीमसेनदास प्रधान मन्त्री हुने सम्भावना छ ।

प्रकाशित मिति: बिहीबार, असोज २१, २०७८ १८:१४