रामचन्द्र पौडेलले तीन मन्त्री मागेपछि देउवाले भने - दिन सक्दिनँ

A+ A A-

नेपाली कांग्रेसभित्र मन्त्रालय भागबण्डाको विषय थप पेचिलो बनेको छ । सरकारको नेतृत्व गरिरहेको कांग्रेसमा मन्त्रालय भागबण्डामा अडानहरू पेस हुने क्रम बढेसँगै यस्तो स्थिति बनेको हो ।

बुधबार प्रधानमन्त्री निवास बालुवाटारमा बसेको नेपाली कांग्रेसको पदाधिकारी बैठकमा पनि यही विषयले महत्व पायो ।

पार्टीका वरिष्ठ नेता रामचन्द्र पौडेलले आफ्नो गुटको लागि तीन मन्त्री चाहिने अडान पेस गरे । त्यसलाई प्रधानमन्त्री तथा कांग्रेस सभापति देउवाले ठाडै नकारे । त्यो लगत्तै पौडेल, शशांक कोइराला र प्रकाशमान सिंह बैठक बहिस्कार गरेर हिँडे ।

कांग्रेसले कुल आठ मन्त्रालय पाउने तय छ । हालसम्म गृह, परराष्ट्र र कानुन मन्त्रालयमा मन्त्री र स्वास्थ्य मन्त्रालयमा राज्यमन्त्री देउवाले आफूनिकटकालाई नियुक्त गरिसकेका छन् । अब सञ्चारसहित चारवटा मन्त्रालय कांग्रेसको कोटामा छ । त्यसमा दुई मन्त्रालय पौडेल पक्षलाई र एक मन्त्रालय सिटौला पक्षलाई दिने देउवाको तयारी हो । तर पौडेल पक्षले थप एक मन्त्री मागेसँगै दुवै पक्षबीच विवाद भएको हो ।

योसँगै बिहीबार मन्त्रिपरिषद् विस्तार हुने सम्भावना पातलिएको छ।

बैठकमा वरिष्ठ नेता पौडेल, नेता कृष्णप्रसाद सिटौला, महामन्त्री शशांक कोइराला, पूर्व महामन्त्री प्रकाशमान सिंहलगायतका नेता सहभागी थिए । बालुवाटार बैठकअघि पौडेल र सिटौलाले आफूनिकट नेताहरुसँग छुट्टै छलफल गरेका थिए ।

बैठकमा मन्त्रालयको विषयमा मात्र नभइ क्रियाशील सदस्यता र पार्टी कार्यलयमा जारी अनशनको विषयले पनि प्रवेश पाएको छ । रौतहट र सर्लाही बरहथवाको क्रियाशील सदस्यताको विषयमा पनि कुनै निष्कर्ष निस्केन । यस्तै अनशनको विषयमा नेता पौडेलले देउवाको ध्यानाकर्षण गराए ।

सो विषयमा भने देउवाले भोलिसम्ममा सो विषय टुंगो लगाउन लगाउने बताएको बैठकमा सहभागी एक नेता बताए ।