संघीय शिक्षा ऐन ल्याउने विषयमा छलफल भइरहेको छ : मन्त्री श्रेष्ठ

A+ A A-

शिक्षा, विज्ञान तथा प्रविधिमन्त्री कृष्ण गोपाल श्रेष्ठले संघीय शिक्षा ऐन ल्याउने विषयमा छलफल भइरहेको बताएका छन् । लुःनिभा बाल सरोकार समूहले ललितपुरमा आयोजना गरेको अन्तरक्रिया कार्यक्रममा उनले २०२८ सालको शिक्षा ऐनलाई परिवर्तन गरी शिक्षामा आमूल परिवर्तन आवश्यक रहेको जोड दिएका हुन् ।

कोभिड–१९को कारण थला परेको शैक्षिक क्षेत्रको सुधारका लागि नयाँ योजना ल्याउने प्रक्रिया अघि उनले बताए । 'अलमलमा रहेको शैक्षिक क्षेत्रको टुङ्गो लगाएका छौँ । विद्यार्थी स्थानान्तरण गर्ने व्यवस्था गरेका छौँ । एसईईको गुणस्तर सुधार गर्न संघबाटै एसईई लिने व्यवस्था गरेका छौँ,' उनले भने ।

समग्र सुदूरपश्चिम प्रदेशको शिक्षा विकासका लागि शिक्षा, विज्ञान प्रविधि मन्त्रीसँग आयोजना गरेको अन्तक्रियामा उनले राजधानीको शिक्षा प्रणालीलाई सिकेर सुदूरपश्चिमा प्रयोग गर्नुपर्ने बताए । उनले भने, 'तपाईंहरू राजधानीको शिक्षा, शिक्षण पद्धतिको विषयमा अध्ययन गर्न आउनुभएको छ । यहाँको कुरा सिकेर आफ्नो क्षेत्रमा लागू गराउनुस् ।'

अन्तक्रिया गर्न सुदूरपश्चिमका डडेल्धुराका शिक्षक, विद्यालय व्यवस्थापन समितिका पदाधिकारी र स्थानीय जनप्रतिनिधि राजधानी आएका थिए । सुदूरपश्चिम प्रदेशको डडेल्धुराको अजेयमेरु नगरपालिका र गन्यापधुरा नगरपालिकाका जनप्रतिनिधि, विद्यालयका प्रधानाध्यापक, सहप्रधानाध्यापक तथा विद्यालय व्यवस्थापन समितिका सदस्यहरूसहित ३२ वटा विद्यालयका प्रतिनिधिहरू काठमाडौंको नमुना विद्यालयको भ्रमण गर्न राजधानी आएका थिए । भ्रमणपछि टोलीले काठमाडौं शिक्षा घोषणापत्र जारी गरी नयाँ योजना तय गर्नेछन् ।

कार्यक्रममा डडेलधुरा जिल्लाको गन्यापधुरा नगरपालिका- ६ का अध्यक्ष चेतराज भट्टले २० देखि ५० जना विद्यार्थी अध्ययन गर्ने विद्यालयमा पुग्न विद्यार्थीले ५ देखि ६ घण्टासम्मको यात्रा गर्नुपर्ने समस्या मन्त्री श्रेष्ठसमक्ष व्यक्त गरेका थिए ।

कार्यक्रममा लुःनिभा वाल सरोकार समूहका सल्लाहकार स्वयंम्भुराज डंगोल, कार्यकारी निर्देशक नरेन्द्र डंगोल,कार्यक्रम व्यवस्थापक सन्तराम डंगोलले लुःनिभाले गरेको योजना र भावी कार्यक्रमको बारेमा जानकारी गराएका थिए ।

प्रकाशित मिति: सोमबार, फागुन १०, २०७७ १७:५९