'निर्मलाका हत्यारा पत्ता लगाउन नसक्ने प्रधानमन्त्रीले धनगढी आएर ठूला गफ दिए'

'निर्मलाका हत्यारा पत्ता लगाउन नसक्ने प्रधानमन्त्रीले धनगढी आएर ठूला गफ दिए'

A+ A A-

नेपाली कांग्रेसका नेताहरूले जनताबाट बहुमत पाएका कम्युनिस्टले जनतालाई नै धोका दिएको आरोप लगाएका छन् । प्रतिनिधिसभा विघटनको विरोधमा सो पार्टीले शनिबार धनगढीमा आयोजना गरेको विरोधसभालाई सम्बोधन गर्दै नेताहरूले यस्तो बताएका हुन् । उनीहरूले कामचलाउ प्रधानमन्त्री केपी शर्मा ओलीले असंवैधानिक तरिकाले प्रतिनिधिसभाको विघटन गरेको आरोप लगाए ।

विरोधसभालाई सम्बोधन गर्दै प्रदेशसभा सदस्य डिल्लीराज पन्तले जनताले बहुमत दिएको कम्युनिस्ट सरकारले जनतालाई नै धोका दिएको आरोप लगाए । उनले कम्युनिस्टका कदमको कांग्रेसले विरोध गर्ने उल्लेख गरे । ओली सरकार अधिनायकवादको बाटो हिँडेको बताउँदै उनले व्यक्तिगतका स्वार्थका कारण प्रतिनिधिसभा विघटन गराएको आरोप लगाए ।

यस्तै, अर्का सदस्य दीव्यकुमारी शाहले धनगढी आएर प्रधानमन्त्रीले ठूल्ठूला गफ दिए पनि निर्मला पन्त हत्याका घटनाका दोषीलाई पत्ता लगाउन नसकेको बताइन् । निर्मलाको लागि न्याय खोज्नेहरूलाई उल्टै सरकारले पक्राउ गरेको उनले उल्लेख गरिन् ।

सभालाई सम्बोधन गर्दै धनगढी उपमहानगरपालिकाका प्रमुख नृपबहादुर वडले नेपाली जनताले बनाएको संविधानलाई कम्युनिस्टले मिचेको आरोप लगाए । उनले संविधान र जनताका लागि कांग्रेस सडकमा उत्रेको बताए ।

संविधान बचाउनलाई नेपाली कांग्रेस र जनता सडकमा उत्रिएको बताए । उनले व्यक्तिगत स्वार्थपूर्ति र देशलाई आफ्नो इच्छाअनुसार चलाउन नपाएका कारणले प्रधानमन्त्रीले संसद् विघठन गरेको आरोप लगाए । उनले राष्ट्रपति दुखी जनता गरिब असहाय नेपाली जनताको नभएर केवल प्रधानमन्त्रीको मात्रै भएको आरोप लगाए ।