कास्की उपनिर्वाचनका उम्मेदवारको खर्च विवरण आंशिक मात्र आयो

A+ A A-

गत मंसिरमा कास्की क्षेत्र नं २ मा सम्पन्न प्रतिनिधिसभा सदस्यको निर्वाचनका उम्मेदवारले अहिलेसम्म खर्च विवरण बुझाएका छैनन् ।

तत्कालीन संस्कृति, पर्यटन तथा नागरिक उडड्यनमन्त्री रवीन्द्र अधिकारीको हेलिकोप्टर दुर्घटनामा निधन भएपछि भएको उपनिर्वाचनका उम्मेदवारहरूमध्ये अधिकांशले साढे ३ महिना बितिसक्दा पनि खर्चको विवरण सार्वजनिक गरेका छैनन् । कास्कीमा भएको उपनिर्वाचनमा नेपाल कम्युनिष्ट पार्टी (नेकपा) की उम्मेदवार विद्या भट्टराई निर्वाचित भएकी थिइन् ।

उपनिर्वाचनमा भाग लिएका विभिन्न राजनीतिक दलका ११ र स्वतन्त्र १० सहित २१ उम्मेदवारमध्ये हालसम्म ६ जना उम्मेदवारले मात्र खर्च विवरण बुझाएको जिल्ला निर्वाचन कार्यालय कास्कीका सूचना अधिकारी रुद्र न्यौपानेले जानकारी दिए । खर्चको विवरण बुझाउने उम्मेदवारहरूमा सबै दलका उम्मेदवार भएको उनले बताए ।

निर्वाचन आयोग ऐन २०७३ मा उल्लेख भएअनुसार उम्मेदवारले अन्तिम मतपरिणाम घोषणा भएको १ महिनाभित्र आफ्नो खर्चको विवरण सार्वजनिक गर्नुपर्छ ।

जिल्ला निर्वाचन कार्यालय कास्कीका अनुसार उपनिर्वाचनको खर्च विवरण बुझाउनेमा सत्तारुढ नेपाल कम्युनिस्ट पार्टी (नेकपा), प्रमुख प्रतिपक्षी दल नेपाली कांग्रेस, समाजवादी पार्टी, साझा पार्टी, राष्ट्रिय जनमुक्ति पार्टी र मंगोल नेसनल अर्गनाइजेसन रहेका छन् ।

खर्च विवरण बुझाउन सबै उम्मेदवारलाई खबर गरिए पनि ६ जनाबाहेक अरु कसैले पनि चासो नदिएको निर्वाचन कार्यालय प्रमुख महेन्द्रराज सुवेदीले बताए ।

‘निर्वाचन ऐनमा तोकिएको समयावधि सकिनुअगाडि नै सबै उम्मेदवारलाई विवरण बुझाउन जानकारी गराएका थियौँ,’ उनले भने, ‘तर, राजनीतिक पार्टीका ६ जना उम्मेदवारबाहेक अन्य पार्टी उम्मेदवार नै आएनन् ।’

सबैभन्दा बढी खर्च गर्ने कांग्रेस

निर्वाचन कार्यालय कास्कीमा राजनीतिक दलहरूले बुझाएका विवरणअनुसार प्रमुख प्रतिपक्षी दल कांग्रेसले सबैभन्दा धेरै खर्च गरेको छ । कांग्रेसका उम्मेदवार खेमराज पौडेलले २४ लाख ५७ हजार २ सय २५ रुपैयाँ खर्च गरेका छन् । त्यसैगरी, नेकपाका उम्मेदवार विद्या भट्टराईले २२ लाख ५६ हजार ५ सय ५१ खर्च गरेकी छन् ।

त्यस्तै, समाजवादी पार्टीका धर्मराज गुरुङले १५ लाख ६० हजार ५ सय १० खर्च गरेका छन् । साझा पार्टीका रजनी केसीले ११ लाख ८७ हजार ५ सय ९३, मंगोल नेसनल अर्गनाइजेसन पार्टीका रियाज गुरुङले २ लाख ५ हजार ३ सय २६, राष्ट्रिय जनमुक्ति पार्टीका पूर्ण बहादुर रानाले १ लाख ३१ हजार ७ सय २७ रुपैयाँ खर्च गरेका छन् ।

खर्च विवरणअनुसार सबैभन्दा कम खर्च राष्ट्रिय जनमुक्ति पार्टीका उम्मेदवार पूर्णबहादुर रानाले गरेका छन् । प्रतिनिधिसभा सदस्य उम्मेदवारले बढीमा २५ लाख रुपैयाँसम्म मात्र खर्च गर्न पाउने सीमा निर्वाचन आयोगले तोकेको थियो ।

प्रकाशित मिति: मंगलबार, चैत ४, २०७६ १८:३०