१ वर्षभित्रै तामाखानी सञ्चालनमा आउने

A+ A A-

हिजो हथौडाको भरमा खनिएका सुरुङमा अहिले तामाको अध्ययन भइरहेको छ ।

पुर्खाले तामा निकालेकै आधारमा अहिले आधुनिक प्रविधिको प्रयोग गरी बागलुङको तित्याङमा तामा उत्खननका लागि अध्ययनको काम तीव्र गतिमा चलिरहेको छ ।

स्थानीय बुढापाकाका अनुसार तित्याङको खानीगाउँमा झण्डै २ सय वर्षपहिले तामाखानी सञ्चालनमा थियो । मल्लकालीन समयमा स्थानीय प्रविधि प्रयोग गरेर हालको बागलुङ नगरपालिका–९, तित्याङ खानीगाउँका पाखोमा तामा निकालिएको थियो, स्थानीयवासी सन्तबहादुर जिसीले बताए ।

चीनको जोम्बिङ माइनिङ कम्पनीको प्राविधिक सहयोगमा शुभम् ग्रुपले ४ महिनादेखि तित्याङमा खानी अध्ययनको काम गरिरहेको छ । ४ महिनापहिले यहाँ आएका खानी विज्ञहरूको समूहले सम्भावना औँल्याएपछि मेसिन नै प्रयोग गरेर परीक्षणको काम धमाधम चलिरहेको छ ।

तामाको परीक्षणका लागि तित्याङको अड्डाँडामा २२ मिटर लामो र बाह्रमुरेमा ३२ मिटर लामो सुरुङ तयार भइसकेको छ । सुरुङमार्फत जमिनको भित्री भागको ढुङ्गामाटो सङ्कलन गरी ल्यावमा परीक्षण गर्ने काम भइरहेको अधिकारीले बताए ।

खानी विभागले खटाएका भूगर्भशास्त्री, इन्जिनियर, चीनबाट आएका अध्ययनकर्तालगायतले यहाँको अवस्थाबारे अध्ययन गरिरहेका छन् ।

तामाको अध्ययनका लागि नेपाल सरकारको अनुमतिमा त्यहाँ आएको कम्पनीले परीक्षण प्रतिवेदन तयार भएपछि खानी सञ्चालनको तयारीमा लाग्ने बताएको छ ।

उनले कुनै अवरोधको सामना गर्नु नपरे आगामी १ वर्षभित्रै तित्याङमा खानी सञ्चालनमा आउने दाबी गरे । पहिलो चरणको परीक्षणमा मात्रै झण्डै ४ करोड रुपैयाँ खर्च गरेको कम्पनीले खानी सञ्चालनका लागि १ अर्बको हाराहारीमा लगानी हुने जनाएको छ ।

पुराना खानी र त्यहाँ देखिने धाएको सङ्केतका आधारमा बागलुङ नगरपालिकाले यहाँ खानी सञ्चालनको पहल थालेको थियो ।

पहिलो नगरसभाबाट तित्याङमा खानी सञ्चालनका लागि अध्ययन गर्ने निर्णय गरेको नगरपालिकाले खानी विभाग र सरोकारवाला सबै मन्त्रालयसँग पहल गरेर झण्डै २ वर्षपछि त्यहाँ अध्ययनको काम थालनी भएको छ ।

खानी अध्ययन गरिरहेको कम्पनीले परीक्षणको प्रतिवेदन खानी विभागलाई बुझाउनेछ । खानी विभाग, उद्योग मन्त्रालयले प्रतिवेदनका आधारमा स्थलगत अध्ययन गरेपछि मात्रै उत्खननको अनुमति पाउनेछ ।

यहाँ खानी सञ्चालनमा आए रोजगारीको सिर्जना र कर तथा रोयल्टीबापत आउने रकमले विकास निर्माणमा समेत सहयोग पुग्ने बागलुङ नगरपालिकाका प्रमुख जनकराज पौडेलले बताए ।

स्थानीय सरकारका तर्फबाट गर्नुपर्ने कुनै पनि काममा बाधा–अवरोध नआउने बानपा–९, तित्याङका वडाध्यक्ष गणेश थापाले बताए । खानीको परीक्षणमा देखिएको प्रगतिले स्थानीय उत्साहित भएका छन् । रासस

प्रकाशित मिति: सोमबार, चैत ३, २०७६ १२:४९