कोरोना सङ्क्रमणविरुद्ध लड्न गण्डकीमा १ सय आइसोलेसन बेड तयार

A+ A A-

विश्वभर महामारीको रुपमा फैलिएको कोरोना भाइरस (कोभिड–१९) संक्रमणविरुद्ध गण्डकी प्रदेश उच्च सतर्कता अपनाइएको छ ।

प्रदेश राजधानी पोखरा क्षेत्रका अस्पतालमा १ सय वटा आइसोलेसन बार्ड तयार पारिएको छ भने आवश्यक तयारीका लागि मुख्यमन्त्री संयोजक रहने गरी उच्चस्तरीय निर्देशन समिति बनेको छ ।

प्रमुख सचिवको संयोजकत्वमा प्रदेशस्तरीय समन्वय समिति लगायत विभिन्न १० विषयगत समिति गठन गरिएको छ ।

क्वारेन्टाइन स्थलको व्यवस्थापनका लागि स्थान खोजी, उद्धार कार्यका लागि एम्बुलेन्स व्यवस्थापन जस्ता आवश्यक तयारी सकिएको छ ।

गण्डकी प्रदेश हालसम्म कोरोनाबाट प्रभावित नभएको र यदि छिरिहाले पनि सोको व्यवस्थापनका लागि प्रदेश सरकार तयार रहेको मुख्यमन्त्री पृथ्वीसुव्वा गुरुङले दाबी गरे ।

उनले प्रदेश सरकारलाई बजेट अभाव नरहेको दाबी गर्दै सरकारले कोरोनाविरुद्ध लड्न १ अर्ब रुपैयाँ निकास गर्न सक्ने क्षमता रहेको बताए । उनले प्रदेशमा खाद्यान्न लगायत अत्यवश्यक बस्तु आपूर्ति र वितरणको व्यवस्था मिलाउन सम्बन्धित निकायलाई निर्देशन समेत दिए ।

५ जनाको नमूना संकलन, २ को नतिजा नेगेटिभ

पोखरा क्षेत्रका विभिन्न अस्पतालमा उपचारका लागि आएका बिरामीमध्ये कोरोनाको आशंका गरिएकामध्ये ५ जनाको नमुना संकलन गरी केन्द्रमा पठाइएकोमा २ जनाको नतिजा नेगेटिभ आएको छ । बाँकी ३ जनाको नमुना आउन बाँकी छ । नमुना संकलन गरिएका ५ मध्ये १ जना महिला हुन् ।

स्वास्थ्य निर्देशनालय गण्डकीका स्वास्थ्य निर्देशक डा. विनोदविन्दु शर्माका अनुसार पोखराको मणिपाल शिक्षण अस्पताल र फिस्टेल अस्पतालमा उपचारार्थ आएका बिरामीमध्ये २ जनाको संकलित नमुना नेगेटिभ आएको हो ।

बाँकी ३ जनामध्ये म्याग्दी जिल्ला अस्पताल र पोखराको सिभिक अस्पतालबाट १–१ जनाको नमुना ३ दिनअघि काठमाडौंस्थित जनस्वास्थ्य प्रशायोगशालामा पठाइएको छ भने लायन्स सामुदायिक अस्पतालबाट एक जना विदेशी महिलाको पनि नमूना काठमाडौं पठाइएको डा. शर्माले जानकारी दिए ।

यहाँका विभिन्न ५ अस्पतालमा १ सय वटा आइसोलेसन बार्ड तयार पारिएको छ ।

एकसय आइसोलेसन बार्ड

चरक मेमोरियल अस्पतालमा ३०, तनहुँको जीपी कोइराला श्वासप्रश्वास केन्द्रमा ३०, पोखराको मणिपाल शिक्षण अस्पतालमा १५, गण्डकी मेडिकल कलेजमा १५ र पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल) मा १० गरी कुल १० वटा आइसोलेसन बेड तयारी अवस्थामा राखिएको प्रदेश सरकारले जनाएको छ ।

पोखराका ५० बेडभन्दा बढीका सबै सरकारी तथा निजी अस्पतालमा आफ्नै बजेट÷स्रोतमा कम्तीमा ५ बेडको आइसोलसन बार्ड तत्काल स्थापना गर्न र कम्तीमा १० थान पसर्नल प्रोटेक्सन इक्प्युमेन्ट (पीपीई) सेट तयार राखी व्यवस्थापन गर्न मुख्यमन्त्री संयोजक रहेको उच्चस्तरीय निर्देशन समितिले निर्देशन दिइसकेको छ ।

स्वास्थ्य तालिम केन्द्रमा क्वारेन्टाइन

क्वारेन्टाइन होमका लागि स्वास्थ्य तालिम केन्द्र, पोखरालाई पहिलो चरणमा उपयोगका लागि उपयुक्त ठहर गरिएको छ । प्रदेशस्तरीय समन्वय समितिको बैठकले स्वास्थ्य तालिम केन्द्रलाई क्वारेन्टाइन होमको रुपमा विकास गर्ने निर्णय गरेको हो ।

यस्तै, बैठकले शिक्षा, वन, कृषि, भेटेरिनरी तालिम केन्द्रहरुलाई क्वारेन्टाइन होमको रुपमा प्रयोग गर्न तयारी अवस्थामा राख्न आग्रह गर्ने निर्णय गरेको छ ।

लेखनाथस्थित लायन्स कलब शिशुवा सामुदायिक अस्पताललाई ५० बेडको डेडिकेटेड आइसोलेसन अस्पतालका रुपमा प्रयोग गरी तयारी अवस्थामा राख्ने भएको छ ।

हाल ६२ वटा पीपीए मौज्दात रहे पनि कोरोनाको संक्रमण देखिए सोको व्यवस्थापनका लागि ५ सय थान पीपीई, ५ सय थान इन्फ्रारेड थर्मोमिटर, २० हजार थान मास्क, १ सय लिटरका सेनिटाइजर र डिसीन्फेक्टेन्ट उपलब्ध गराउन संघीय सरकारलाई अनुरोध गर्ने निर्णय गरेको छ ।

नाका नाकामा हेल्प डेस्क

गण्डकी प्रदेशमा हवाई तथा स्थलमार्ग हुँदै प्रवेश गर्नेहरुको स्वास्थ्य चेकजाँच प्रक्रियाका लागि ९ वटा हेल्प हेस्क खोलिने भएको छ ।
हवाई मार्ग हुँदै पोखरा भित्रिनेहरुको लागि पोखरा विमानस्थल र मुस्ताङको लोमान्थाङमा हाल हेल्प डेस्क संचालन गरिएकोमा प्रदेशभरका विभिन्न जिल्लामा समेत सो विस्तार गरिने तयारी रहेको डा. शर्माले जनाए ।

उनका अनुसार त्रिवेणी, दाउन्ने, गैँडाकोट, नवलपुर, तनहुँको मुग्लिङ, आबुखैरेनी, गोरखाको आरुघाट, बागलुङको बुर्तिवाङ, स्याङ्जाको गल्याङ समेत हेल्प डेस्क खोलिने भएको हो ।

पोखरा महानगरपालिका स्वास्थ्य सेवा महाशाखाल पनि विभिन्न ठाउँमा हेल्थ डेस्क स्थापना तयारी गरेको जनाइएको छ । मुग्लिङ, आबुखैरेनी, गल्याङमा संचालित हेल्प डेस्कले भारतबाट प्रवेश गरी आउने सवारीसाधनलाई विशेष निगरानीका साथ चेकजाँच गरिने भएको छ ।

प्रकाशित मिति: आइतबार, चैत २, २०७६ १०:५३