शिक्षकले धानेका छन् जिल्ला सदरमुकामका स्थानीय तह

A+ A A-

हिमालपारिको जिल्ला मनाङमा ४ वटा गाउँपालिका छन् । जिल्लाको सदरमुकाम चामे हो । चामे गाउँपालिकामा जिल्ला सदरमुकाम छ । यो गाउँपालिकामा ५ वटा वडा छन् ।

चामे गाउँपालिकाको जनंख्या ११ सय २९ छ । गाउँपालिकाका वडा कार्यालयमा भने फरक दृष्य देखिन्छ । वडा सचिवहरू लोकसेवा प्रतिस्पर्धा गरेर आएका कर्मचारी होइनन् । वडा कार्यालय विद्यालयका शिक्षक–शिक्षिकाले धानेका छन् ।

गाउँपालिकाका अध्यक्ष लोकेन्द्र घले भन्छन्, ‘यहाँ कर्मचारीको समस्या छ । प्रशासनिक काम गर्ने जनशक्तिको दरबन्दी ४३ जनाको छ तर जम्मा तीन जना कर्मचारी कार्यरत छन् ।’

कर्मचारी अभाव भएपछि सदरमुकामकै गाउँपालिकाले शिक्षक शिक्षिकाबाट काम चलाउनुपरेको गुनासो छ ।

चामे गाउँपालिकाले प्राविधिक काम गर्ने कर्मचारीको विज्ञापन पनि आह्वान गर्‍याे । तर खोजेजति जनशक्ति जुटाउन सकेन । अहिले चामे गाउँपालिकामा लोकसेवा प्रतिस्पर्धा गरेर प्रशासनिक क्षेत्रमा काम गर्ने तीन जना मात्र कर्मचारी छन् । अन्य ४ जना प्राविधिक कर्मचारी करारमा छन् ।

गाउँपालिकाको १ नम्बर वडा कार्यालय तिमाङमा छ । यो वडाको प्रशासनिक काम भने लोकप्रिय नमुना मावि चामेका शिक्षक पेचबहादुर घलेले गर्छन् । उनले तलब भने शिक्षा मन्त्रालयबाट पाउँछन् । वडा अध्यक्ष आशिष गुरुङ भन्छन्, ‘चामे गाउँपालिकामा प्रशासन हेर्ने सरकारी कर्मचारीको कमी भएकाले विद्यालयँंग समन्वय गरेर काम चलाएका छौँ ।’

गाउँपालिकाका सबै वडामा जनशक्ति अभाव छ । २ नम्बर वडामा पनि लोकप्रिय नमुना माविकी शिक्षिका निर्मला गुरुङले तीन महिनायता सचिवको काम गर्दै आएको वडा अध्यक्ष भीमबहादुर गुरुङ बताउँछन् ।

‘पहिला १ र २ नम्बर वडाका लागि एक जना सचिव हुनुहुन्थ्यो, उहाँ सरुवा भएर गएपछि माथिबाट सचिव अहिलेसम्म पठाइएकाे छैन । जिल्लाबाट खटिएर नआएपछि हामीले गाउँपालिकामै तालिम दिएर शिक्षकहरूलाई सचिवको जिम्मेवारी दिएका छौँ,’ उनले भने ।

३, ४ र ५ नम्बर वडाको वडा कार्यालय भने एउटै भवनमा छ । गाउँपालिकाको भवनभन्दा केही टाढा रहेको यो वडा कार्यालयको प्रशासन हेर्ने जिम्मा पनि लोकप्रिय नमुना माविका शिक्षक आसलाल गुरुङको छ । उनी लामो समय विद्यालयमा अध्यापन गराएका शिक्षक हुन् । अहिले उनलाई भेट्न संयुक्त वडा कार्यालयमा जानुपर्छ ।

शिक्षकहरूले सचिवको काम गर्नुको कारण भने दुईवटा स्कुल मर्ज हुनु हो । चामे गाउँपालिकामा रहेका विश्वशान्ति आधारभूत स्कुल र दिनदयालु आधारभूत स्कुललाई लोकप्रिय मावि चामेसँग मर्ज गरिएको छ ।

स्कुल मर्ज भएपछि शिक्षकहरू पुग्ने अवस्था भएकाले पनि गाउँपालिकाले तालिम दिएर प्रशासनको काममा लगाएको गाउँपालिका अध्यक्ष घले बताउँछन् । उनले भने, ‘विद्यालयमा शिक्षकको अभाव नभएपछि तालिम दिएर वडाहरूमा प्रशासन हेर्ने जिम्मा दिएका हौँ ।’

वडा नम्बर ३, ४ र ५ को प्रशासनिक काम गरिरहेका शिक्षक आसलाल गुरुङ भन्छन्, ‘काम सहज रूपमा गरिरहेका छौँ, गाउँपालिकाले अब तालिम दिने भनेको छ तर अहिलेसम्म लिएका छैनौँ ।’ गुरुङ विश्वशान्ति आधारभूत विद्यालयका प्रधानाध्यापक पनि भइसकेका छन् ।

२ नम्बर वडाको प्रशासन सम्हालिरहेकी निर्मला गुरुङ भन्छिन्, ‘सुरुसुरुमा काम गर्न असहज भयो । गाउँपालिकाका अधिकृत सरलाई सोधेर काम गरेँ । अहिले पनि नजानेका काम सोधेरै गरिरहेकी छु । ’

काम गर्छन् तर हस्ताक्षर चल्दैन

वडा कार्यालयमा आएका सेवाग्राहीको काम गरिदिए पनि उनीहरूको हस्ताक्षर भने चल्दैन । हस्ताक्षरका लागि वडा अध्यक्ष नै कुर्नुपर्छ । वडाको काम गरिरहेका शिक्षक गुरुङ भन्छन्, ‘हामीले त कागजात तयार गरिदिने हो, हस्ताक्षर गर्न वडा अध्यक्ष नै चाहिन्छ ।’

वडादेखि गाउँपालिकासम्म ४३ जना कर्मचारीको दरबन्दी भए पनि हाल १२ जना कर्मचारी रहेको कार्यकारी अधिकृत गंगबहादुर थापा बताउँछन् ।

लोकप्रिय नमुना माविको तलब पनि गाउँपालिकाले पनि व्यहोर्ने भएकाले शिक्षकहरूको तलब व्यवस्थापनमा समस्या नआउने अधिकृत थापा बताउँछन् ।

प्रकाशित मिति: आइतबार, फागुन २५, २०७६ १४:५८