त्रिविको पनिकामा विद्यार्थीले किन लगाए ताला ?

A+ A A-

त्रिभुवन विश्वविद्यालय परीक्षा नियन्त्रण कार्यालय बल्खुमा बिहीबार कार्यालय समयमा कर्मचारीहरू गाडीमा आए । तर गेट खुलेन । गेटमा ठूलो ब्यानर थियो । बाहिर एउटा र भित्र अर्को ताल्चा लगाइएको थियो । ‘गेट खुल्दैन ?,’ गेटमा रहेका गार्डलाई एक कर्मचारीले सोधे ।

‘मिल्दैन । विद्यार्थीले लगाएको ताला हो,’ गार्डले ती कर्मचारीलाई भने । भित्रको ताला पनिकाले नै सुरक्षाका लागि लगाएको हो भने बाहिरको ताला विद्यार्थीले लगाएका हुन् । कर्मचारीहरूले आफ्नो सवारी साधन बाहिर नै पार्किङ गरे ।

स्वतन्त्र विद्यार्थी युनियन त्रिविले १० बुँदे माग राखेर परीक्षा नियन्त्रण कार्यालयको गेटमा ताला लगाएको हो । विद्यार्थीको काम प्रभावित नगर्ने गरी आन्दोलन गरिएको स्ववियु सभापति श्यामराज ओझाले बताए । त्रिविको गाडी चढ्ने तर काम छिटो नगर्ने पदाधिकारीको गाडीमा रोक लगाउन गेटमा ताला लगाएको बताएको छ ।

‘काम नगरी गाडी मात्र चढ्न पाइँदैन । गाडीको चाबी दिएपछि गेटको ताला खोल्छौँ,’ स्ववियु सभापति ओझाले भने । स्ववियुले परीक्षा नियन्त्रण कार्यालयका पदाधिकारीले चढेको गाडीको चाबी मागेकाे छ । विद्यार्थीले शैक्षिक प्रमाणपत्र लिन दुःख पाइरहेकाले सहज बनाउन आन्दोलन गर्न बाध्य भएको उनको भनाइ छ ।

‘पटक–पटक ध्यानकर्षण गराउँदा पनि सुनुवाइ भएन । डिजिटलाइजेसनको माग राखेका छौँ । पदाधिकारीको अकर्मण्यताका कारण आन्दोलन गर्न बाध्य भएका हौँ,’ उनले भने । पनिकाको ढिलासुस्ती अन्त्य गर्न गर्नुपर्ने र समयमा शैक्षिक प्रमाणपत्र विद्यार्थीलाई उपलब्ध गराउनुपर्ने माग विद्यार्थीको छ । गेटमा ताला लगाएका कारण काम प्रभावित भएको कर्मचारीहरूको गुनासो छ । ‘आज गाडी भित्र ल्याउन पाएनौँ । गेटमै ताला लगाएपछि काम कसरी सहज हुन्छ ? ताला लगाएर थप असहज भएको छ,’ एक कर्मचारीले भने ।

परीक्षा नियन्त्रण कार्यालयका अधिकारीहरू प्रविधिमैत्री नभएको स्वीकार गर्छन् । प्रविधिमैत्री बनाउने काम भइरहेको दाबी पनिकाको छ । ‘आईटी फ्रेण्डली भएको भए सहज हुने थियो । कति काम विद्यार्थीले घरबाट गर्न सक्ने थिए,’ सहायक परीक्षा नियन्त्रक पवन बराल भन्छन् ।

परीक्षा नियन्त्रण कार्यालय बल्खुमा बिहानैदेखि विद्यार्थीको लाइन लाग्छ । सर्टिफिकेट झिक्न, नाम थर बिग्रिएको सच्याउन, प्रतिलिपि निकाल्न, नम्बर सच्याउन लगायतका कामका लागि विद्यार्थी बल्खु पुग्छन् । तर दिनभर लाइनमा बस्दा पनि काम नहुने गरेको गुनासो विद्यार्थीहरूको छ ।

त्रिविको सुाधारका लागि देशभर नै आन्दोलन सुरु भएको सभापति ओझाले बताए ।‘त्रिविका देशभरका क्याम्पसमा आन्दोलन सुरु भएको छ । सुधार नभएसम्म आन्दोलन जारी राख्छौं,’ उनले भने । स्ववियुले हिजो बुधबारदेखि आन्दोलन सुरु गरेको हो । स्ववियुले उपकुलपति, रजिस्ट्रार, सेवा आयोगको सदस्य खाली भएकाले राजनीतिक भागवण्डाका आधारमा नियुक्त नगर्न कुलपतिसमेत रहेका प्रधानमन्त्री पुष्पकमल दाहाल प्रचण्डलाई ध्यानकर्षण पनि गराएका छन् ।

tu student andolan tala1703762007.jpg