इजरायल र युक्रेनलाई हतियार सहयोग गर्नुपर्छ– अमेरिकी सेना

A+ A A-

गत वर्षदेखि युक्रेनले रुससँग युद्ध गरिरहेको छ, यता इजरायल पनि गत शनिबारदेखि हमाससँग युद्धमा होमिएको छ । आफ्ना सहयोगी राष्ट्र युक्रेन र इजरायल युद्ध लडिरहँदा अमेरिकामा दुवै देशलाई हतियार आपूर्ति गर्नुपर्ने अवस्था निम्तिएको छ ।

अमेरिकाले धेरैपटक युक्रेनलाई हतियार सहयोग गरिसकेको छ, यस्तै अमेरिकाले हालै पठाएको हतियार मंगलबार राति इजरायल पुगिसकेको छ । अमेरिकी हतियारसहितको विमान इजरायलको मोसभस्थित नेभातिम एयर बेसमा अवतरण गरेको थियो ।

यस्तै, यसअघि नै हमासविरुद्ध र इजरायलको समर्थनमा अमेरिकी युद्धपोत, युद्धक विमान र क्षेप्यास्त्रहरू भूमध्य सागरमा तैनाथ भइसकेका छन् ।

यसबीचमा अमेरिकी सेना प्रमुख जनरल र्‍यान्डी जोर्जले अमेरिकाले इजरायल र युक्रेन दुवैलाई हतियार दिइरहनेमा आफू विश्वस्त रहेको बताएका छन् ।

मध्यपूर्वमा अमेरिकाको सबैभन्दा नजिकको सहयोगी इजरायलमा हमासले शनिबार अभूतपूर्व र अचानक आक्रमण गरेपछि सयौँ मानिसले ज्यान गुमाएका छन् । इजरायलले हमासविरुद्ध युद्धको घोषणा गरिसकेको छ भने अमेरिकाले इजरायललाई हतियारहरू उपलब्ध गराउने वाचा गरेको छ ।

अमेरिकी सेनाले यस विषयमा भनेको छ, ‘हतियारको सन्दर्भमा यो विषय महत्त्वपूर्ण छ कि सम्भावित रूपमा इजरायली र युक्रेनीहरूलाई एकैसाथ समर्थन गर्ने हाम्रो क्षमता भनेको कंग्रेसबाट थप कोषको स्वीकृति प्राप्त गर्नु हो ।’

अमेरिकी सेनाकी सेक्रेटरी क्रिस्टिन वोरमुथ भन्छिन्, ‘हामीलाई कांग्रेसबाट थप समर्थन चाहिन्छ । त्यसैले मलाई आशा छ कि हामी छिट्टै समर्थन प्राप्त गर्नेछौँ ।’

यस्तै, अमेरिकी रक्षामन्त्री लोयड अस्टिनले आफ्ना युद्धपोत, गाइडेड मिसाइल क्रुजर, मिसाइल डिस्ट्रोयर इजरायल नजिकैको पूर्वी भूमध्य सागरमा तैनाथ भइसकेको बताएका छन् । अस्टिनले उक्त क्षेत्रमा एफ–३५, एफ–१५, एफ–१६ र ए–१० जस्ता लडाकु विमान तैनाथ गर्ने विषयमा पनि छलफल भइरहेको बताएका छन् । रोयटर्सको सहयोगमा

प्रकाशित मिति: बुधबार, असोज २४, २०८० १६:१०