काठमाडौंमा चिनियाँ नेता ओर्लिएकै दिन माओवादी नेता दिल्ली जाने

A+ A A-

माओवादी केन्द्रकी उपाध्यक्ष पम्फा भुसालको नेतृत्वको टोली ७ साउनमा दिल्ली भ्रमणमा निस्कँदैछ । भारतीय जनता पार्टी (भाजपा) को निमन्त्रणमा भुसालको नेतृत्वमा ५ जना नेताहरू दिल्ली जान लागेका हुन् । टोलीमा चक्रपाणि खनाल, रामेश्वर राय यादव, सत्या पहाडी, सुरेश राई रहेका छन् ।

भाजपाले सम्बन्ध सुधारको प्रयासका लागि माओवादीलाई औपचारिक रूपमा निम्ता गरेको हो । संभवत पहिलोपटक पार्टीगत रूपमा निम्ता गरेर भाजपाले छिमेकका राजनीतिक दलसँगको सम्बन्ध सुधारको रणनीति अख्तियार गरेको विश्लेषण भइरहेको छ । काठमाडौंको सत्तारुढ दललाई दिल्लीको सत्तारुढ दलको निम्ता आएको हो ।

भाजपालाई चिनौँ भन्ने अभियानअन्तर्गतको निम्तामा माओवादी केन्द्रका नेताहरूको भ्रमणलाई निकै चासोका साथ हेरिएको छ । पछिल्ला दिनमा दिल्लीले काठमाडौंसँगको सम्बन्ध राजनीतिकभन्दा कर्मचारीको तहबाट स्थापित गरिरहेको छ । जसको आलोचना काठमाडौंमा मात्र होइन, दिल्लीमा पनि भइरहेको छ ।

दलीय सम्बन्धहरू पातलो बन्ने अनि कर्मचारी र नेताहरूको व्यक्तिगत सम्बन्धले आपसी विश्वास र सम्बन्धमा सुधार ल्याउन नसकेको विश्लेषण पनि भइरहेको छ । त्यसलाई सुधार गर्ने भाजपाको मनसाय हुन सक्छ ।

त्यससँगै, अर्को वर्षको चुनावलक्षित सम्बन्ध विस्तार पनि हो । बंगलादेश, श्रीलंका र नेपालसँग राजनीतिक सम्बन्ध विस्तार गरेर दलीय सम्बन्ध थप बलियो बनाउनुपर्ने बाध्यतामा भाजपा देखिन्छ । उसको राजनीतिक चरित्र मात्र होइन, शासन शैलीमाथि पनि प्रश्न उठिरहेको छ ।

पश्चिमा मुलुकले भाजपाका शासन शैलीमा गम्भीर प्रश्न उठाइरहेको छ । त्यसबाहेक छिमेकसँग पनि सम्बन्ध चिसोपना बढ्दो छ ।

राजनीतिशास्त्री चन्द्रदेव भट्टको बुझाइमा भाजपाले सम्बन्ध सुधारको प्रयासका लागि माओवादी नेताहरूलाई निम्ता गरेको हो । भट्ट भन्छन्, ‘काठमाडौंको सत्तारुढ दलसँग इन्गेजमेन्टबाट राजनीतिक संवाद बढाउने रणनीति लिएको हुनसक्छ किनभने अर्को वर्ष चुनाव पनि हुँदैछ ।’

राजनीतिक तहमा सम्बन्ध सुधारको प्रयास गरेको भाजपाले अर्को रणनीति पनि लिएको हुन सक्छ । काठमाडौंमा निरन्तर बढ्दो चिनियाँ कम्युनिष्ट पार्टीको आवतजावते भाजपाको स्पेस साँघुरो बन्न सक्छ । काठमाडौंमा सीपीसीलाई स्पेस छोड्ने पक्षमा भाजपा नभएको हुन सक्छ ।

रोचक संयोगचाहिँ माओवादी उपाध्यक्ष भुसालको नेतृत्वमा टोली दिल्ली प्रस्थापन गरेकै दिन चिनियाँ कम्युनिष्ट पार्टीका पोलिटब्युरो सदस्य युआन जियानको नेतृत्वको टोली काठमाडौं ओर्लिंदैछ ।

सीपीसीका नेताहरू निरन्तर काठमाडौं–बेइजिङ आवतजावत गरिरहेका छन् । राजनीतिक संवाद बाक्लो बनाउने नीतिमा देखिएको सीपीसी काठमाडौंमा प्रमुख दलका नेताहरूसँग निरन्तर संवादमा देखिन्छ ।

स्रोतहरूका अनुसार भाजपाले माओवादीलाई निम्ता गरेझै सीपीसीले कांग्रेस नेताहरूको टोलीलाई वेइजिङ निम्ता गर्दैछ । अर्थात, सीपीसी काठमाडौंमा प्रमुख दलहरुसँग बाक्लो संवाद गर्न प्रयास गरिरहेका बेला भाजपा पनि काठमाडौंका दलहरूसँग संवाद बढाउन खोजेको देखिन्छ ।

हुन पनि, गत जेठमा प्रधानमन्त्री पुष्पकमल दाहाल प्रचण्ड भारत भ्रमणमा निस्कँदै गर्दा माओवादी नेताहरूको एउटा टोली बेइजिङ थियो । उपाध्यक्ष अग्निप्रसाद सापकोटाको नेतृत्वमा केही पदाधिकारीसहित ठूलो टोली बेइजिङ गएको थियो ।

प्रकाशित मिति: शुक्रबार, साउन ५, २०८० १८:२९