संसदकाे रोस्ट्रममा भावुक प्रधानमन्त्री - यही त प्रचण्ड भयो, अब गर्नुहुन्छ के ? (भिडियाे)

A+ A A-

दशक लामो हिंसात्मक विद्रोहको नेतृत्व गरेर आएका प्रधानमन्त्री पुष्पकमल दाहाल प्रचण्ड सोमबार प्रतिनिधिसभाको रोस्ट्रममा उभिँदा भने निकै भावुक सुनिए । विवादास्पद अभिव्यक्तिका कारण पटकपटक विवादमा परेकोप्रति आत्मालोचनाको शैलीमा भने, ‘प्रधानमन्त्रीको हैसियले त्यस्तो भाषा मैले नबोल्नुपर्थ्यो । तर, त्यो दिन प्रधानमन्त्री भएर बोलिनँ । म ज्ञानुको बुवा भएर बोल्न पुगेँ ।’

यसो भनिरहँदा उनको गला अवरुद्ध हुन खोजेको थियो । तर, उनले आफूलाई सम्हाले ।

प्रचण्ड तिनै नेता हुन्, जसले वैचारिक मतभिन्नताकै कारण आफ्नै सहयोद्धा डा. बाबुराम भट्टराई र हिसिला यमीलाई भारतपरस्तको आरोप लगाउँदै हात बाँधेर बन्धक बनाएका थिए । हिंसात्मक विद्रोहकालमा उनको ‘क्रूर छवि’ बनेको थियो । वर्गशत्रु, सुराकी, सामन्तका नाममा भएका सयौँ ‘सफाया’ प्रचण्ड नेतृत्वकै निर्देशनमा गरिएका थिए । आफू भावुक रहेको दाबी गर्न उनले एक अन्तर्वार्तामा भनेका छन्, ‘सफाया नै गर्नुपर्दा पनि कम पीडा दिएर गर्न निर्देशन दिने गरेको थिएँ ।’

‘वर्गशत्रु’ मात्र होइन, पार्टी कारबाहीका नाममा थुप्रै कमाण्डरलाई निर्मम यातना र श्रम शिविरमा हालेका उदाहरण छन् । संसद्‌मा विपक्षीले मागेको स्पष्टीकरण दिन रोस्ट्रममा उभिइरहँदा जब दिवंगत छोरी र छोराको प्रसंग आयो, प्रचण्ड एकाएक भावुक बनेका थिए ।

क्यान्सरले सिकिस्त छोरी ज्ञानुको भारतमा उपचारका क्रममा प्रितम सिंहले गरेको सहयोगप्रति कृतज्ञता व्यक्त गरे । त्यहीँ कृतज्ञता सम्झिने क्रममा प्रधानमन्त्रीको हैसियतमा नबोल्नुपर्ने भाषा बोलेको स्वीकार गरे । ‘छोरी सुतेको बेड सम्झेँ । उनी उठ्न सक्दिनथिन् । प्रितमले भनेको कुर्सी पनि सम्झेँ,’ प्रचण्डले संसदमा भने, ‘म थोरै भावनामा आएँ । म अलि भावुक त छु नै, यही त प्रचण्ड भयो । अब गर्नुहुन्छ के ?’

प्रधानमन्त्री प्रचण्डले आफूले नभनेको भए पनि हुने कुरा बोलेको भन्दै संसदप्रति आत्मसमीक्षा गरे । ‘त्यो भन्नुपर्ने जरुरी पनि थिएन । मनमा आयो भनेँ । प्रधानमन्त्रीको हैसियतले त्यस्तो भाषा नबोल्नुपर्थ्यो,’ उनको भनाइ थियो । तर, प्रतिपक्षले बाेल्नसमेत नदिएर संसद अवरूद्ध गर्नु उपयुक्त नभएकाे धारणा पनि उनले राखे ।

प्रचण्डको भावुक स्पष्टीकरणप्रति टिप्पणी गर्दै एमाले सचिव योगेश भट्टराईले प्रधानमन्त्रीको पारिवारिक पीडामा साहस भर्न सिङ्गो सदन तयार भए पनि भावनात्मक पक्षलाई अघि सारेर राष्ट्र र जनतालाई घात गर्ने छुट नहुने बताएका छन् ।

‘छोरी ज्ञानु, छोरा प्रकाश र श्रीमती सीताका बारेमा पुष्पकमल दाहालले व्यहोरेका पीडा संवेदनशील छन् । उहाँका ती पीडामा साहस भर्न सिङ्गो सदन उहाँलाई साथ दिन तयार छ,’ भट्टराईले सामाजिक सञ्जालमा लेखेका छन्, ‘तर, प्रधानमन्त्रीका रूपमा उहाँलाई भावनात्मक पक्षलाई अघि सारेर राष्ट्र र जनतालाई घात गर्ने छुट चैँ छैन है । हेक्का रहोस् ।’

आफूहरूले प्रचण्डको पारिवारिक पीडामा मजाक नगरेको र निर्दयी पनि नभएको टिप्पणी गरेका छन् । तर, देशको प्रधानमन्त्रीको अभिव्यक्ति र व्यवहारप्रति भने कठोर प्रश्न रहेको भट्टराईले बताएका छन् ।

प्रकाशित मिति: सोमबार, असार २५, २०८० १९:२५