गृहमन्त्री लामिछानेमाथि छानबिन गर्न संसदीय समिति बनाउनुपर्ने कांग्रेसको अडान कायम

गृहमन्त्री लामिछानेमाथि छानबिन गर्न संसदीय समिति बनाउनुपर्ने कांग्रेसको अडान कायम

A+ A A-

प्रमुख प्रतिपक्ष दल नेपाली कांग्रेसले सहकारी ठगी प्रकरणमा उपप्रधानमन्त्री एवं गृहमन्त्री रवि लामिछानेमाथि छानबिन गर्न संसदीय छानबिन समिति बनाउनुपर्ने माग कायम राखेको छ ।

मंगलबार सभामुख देवराज घिमिरेले सिंहदरबारमा बोलाएको प्रधानमन्त्री पुष्पकमल दाहाल प्रचण्डसहित प्रमुख दलका शीर्ष नेताहरूको बैठकमा कांग्रेसले गृहमन्त्री लामिछानेमाथि छानबिन गर्न संसदीय छानबिन समिति बनाउने अडान कायम राखेको हो ।

बैठकपछि पत्रकारहरूसँग कुराकानी गर्दै कांग्रेसका प्रमुख सचेतक रमेश लेखकले बैठकमा संघीय संसदको आगामी अधिवेशनबारे छलफल भएको र कांग्रेसले संसदीय छानबिन समिति गठन हुनुपर्ने मागलाई यथावत राखेको बताए ।

‘हामीले संसदीय छानबिन समितिको माग सुरुदेखि नै गर्दै आएका छौँ र अहिले पनि त्यसमा अडिग छौँ । सरकार संघीय संसदको आगामी अधिवेशनमा प्रस्तुत हुँदा सहकारीमा लाखौँ बचतकर्ताहरूले बचत गरेको अर्बौं रुपैयाँको हिनामिना र अपचलन भएकोबारेमा कसरी आउँछ । गृहमन्त्री लामिछानेको संलग्नता रहेको कुरा चारैतर्फबाट देखिएको छ,’ उनले भने, ‘हामीले संसदीय छानबिन समिति बनाएर अघि बढ्नुपर्छ भनेका छौँ । सरकारले बनाउँछ भन्ने विश्वास छ ।’

प्रमुख सचेतक लेखकले सरकार संघीय संसदको आगामी अधिवेशनमा प्रस्तुत हुँदा सहकारीमा बचतकर्ताहरूले बचत गरेको रकम फिर्ता गर्न गम्भीर भएर लाग्नेमा आशावादी रहेको बताए । उनले सहकारीको रकम हिनामिनामा गृहमन्त्री लामिछानेको संलग्नता रहेको देखिएको बताए ।

लेखकले सरकारले सहकारी पीडितहरूको विषयलाई गम्भीरतापूर्वक नलिएको र समस्या सम्बोधन नगरेको जिकिर गरे । प्रमुख सचेतक लेखकले संसदीय छानबिन समिति बनाउनुको विकल्प नरहेको बताए ।

प्रकाशित मिति: मंगलबार, वैशाख २५, २०८१ १५:०६