बार्सिलोना फर्किने चाहना हुँदाहुँदै मेस्सी किन इन्टर मायामी हानिए ? (भिडियो)

बार्सिलोना फर्किने चाहना हुँदाहुँदै मेस्सी किन इन्टर मायामी हानिए ? (भिडियो)

A+ A A-

विश्वचर्चित अर्जेन्टिनी फुटबलर लियोनल मेस्सी अन्ततः अमेरिकी क्लब इन्टर मायामी जाने निश्चित भएको छ । इन्टर मायामी क्लबमा पूर्वचर्चित फुटबलर डेभिड बेकह्यामको पनि लगानी छ ।

स्पेनिक खेल पत्रिका मुन्डो डिपोर्टिभोसँगको विशेष अन्तर्वार्तामा मेस्सीले आफूले बार्सिलोना र साउदी क्लब अल–हिलालको प्रस्ताव छाडेर किन इन्टर मायामी छनोट गरेको भनेर खुलाएका छन् ।

मेस्सीका अनुसार उनी कहिल्यै बार्सिलोना छाड्न चाहँदैनथे । तर, कोरोना महामारीका क्रममा क्लब ऋणमा फसेपछि उनलाई फ्रि–ट्रान्सफरमा जान दिनुबाहेक बार्सासँग कुनै उपाय थिएन । बार्सा छाड्दा मेस्सी धरधरी रोएका थिए ।

पीएसजीमा दुई सिजन लिग वान उपाधि जितेपछि र एकपटक फ्रेन्च सुपर कप जितेपछि यस सिजन मेस्सी बार्सिलोना नै फर्कन चाहन्थे । उनका अनुसार पछिल्लो दुई वर्षको अवधिमा उनी विश्वकप जित्दा मात्र खुसी थिए । पेरिसको बसाइ उनलाई चित्त बुझेको थिएन, जसकारण उनी स्पेन नै फर्किन चाहन्थे ।

(भिडियो)

यस विषयमा मेस्सी भन्छन्, ‘मैले सुनेको छु कि ला लिगाले सबै कुरा स्वीकार गरेको छ र म बार्सिलोना फर्किन सबै ठीक छ भनिएको छ । तर, म बार्सिलोना गए क्लबले खेलाडीहरूको तलब कटौती गर्नुपर्छ र धेरै खेलाडी बेच्नुपर्छ । मलाई पहिल्यै धेरै आरोपहरू लगाइएको छ, जसका कारण म फेरि त्यहाँ गएर अन्य कुरा र समस्याको बोझ र जिम्मा लिन सक्दिनँ ।’

मेस्सीका अनुसार सन् २०२१ मा पनि ला लिगाले आफ्ना लागि केही नियम परिवर्तन गरेको बताएको थियो, तर पनि मेस्सीलाई क्लबले राख्न सकेन । यसपटक समय छँदै आफूले आफ्नो परिवार र आफ्नो लागि निर्णय लिएको र आफ्नो भविष्यबारे अरुको भर नपरेको उनको भनाइ छ ।

तर, कुनै समय फेरि आफू बार्सिलोना फर्किने र जसरी भए पनि क्लबलाई सहयोग गर्ने उनको योजना छ । मेस्सीलाई युरोपमा अन्य क्लबले पनि अफर गरेका थिए । तर बार्सिलोना फर्किने चाहनाले उनले ती क्लबहरूको प्रस्ताव अस्वीकार गरेको मेस्सी बताउँछन् ।

उनलाई साउदी क्लब अल–हिलालले पनि आकर्षक प्रस्ताव नगरेको होइन । उनलाई वर्षको ४०० मिलियन अमेरिकी डलरको प्रस्ताव पनि आएको थियो । यस विषयमा मेस्सीले भनेका छन्, ‘म पैसा चाहन्थेँ भने साउदी गइसक्थेँ । मैले बार्सिलोनाबाट फेरि खेल्न चाहेको थिएँ, त्यो सोच पूरा नभएपछि मैले इन्टर मायामी जाने निर्णय गरेको हुँ ।’

आफूले बार्सिलोनासँग कहिल्यै पैसाको कुरा नगरेको पनि मेस्सी बताउँछन् । पछिल्लो समय बार्साबाट प्रस्ताव आए पनि त्यो लिखित र औपचारिक भने नभएको उनी सुनाउँछन् ।

क्रिस्टियानो रोनाल्डो अहिले साउदी क्लब अल–नासरबाट खेल्छन् । अर्का स्टार करिम बेन्जेमा साउदी क्लब अल–इतिहाद भर्खरै अनुबन्ध भएको अवस्थामा आकर्षक प्रस्ताव आउँदा पनि मेस्सी साउदी जान नचाहेका हुन् ।

मेस्सी इन्टर मायामी जाने पक्का भएपछि उक्त क्लबले सबै समयका महान् खेलाडीलाई स्वागत छ भनेर ट्विटरमा पोस्ट पनि गरेको छ । मेस्सी मायामी जाँदा उनलाई एडिडास र एप्पलजस्ता विश्व विख्यात कम्पनीहरूले प्रायोजन गर्नेछन् ।

प्रकाशित मिति: बिहीबार, जेठ २५, २०८० १३:२९