अशोक राईको नेतृत्वमा जसपा नेपाल विभाजित, नयाँ दल दर्ता गर्न आयोगमा निवेदन

नयाँ दल दर्ताका लागि निर्वाचन आयोग पुगेका जसपाका नेताहरू । तस्वीर: सुशील श्रेष्ठ/शिलापत्र

A+ A A-

सत्तारुढ दल जनता समाजवादी पार्टी, नेपाल विभाजन भएको छ ।

आइतबार पार्टीका वरिष्ठ नेता अशोक राईको नेतृत्वमा जसपा विभाजन भएको हो । राईको नेतृत्वमा जसपाका बहुमत ७ सांसदले नयाँ दल दर्ताका लागि निर्वाचन आयोगमा पुगेर निवेदन दिएका छन् ।

जसपाका अध्यक्ष उपेन्द्र यादव भने अमेरिकामा छन् । यादव अमेरिकामै रहेका बेला राईको नेतृत्वमा नयाँ दल दर्ताका लागि आयोगमा निवेदन परेको हो । दल दर्ताका निवेदन दिन सांसदसमेत रहेका राईसहित जसपा संसदीय दलका प्रमुख सचेतक प्रदीप यादव, नवलकिशोर साह सुडी, वीरेन्द्र महतो, सुशीला श्रेष्ठलगायतका सांसद निर्वाचन आयोग पुगेका हुन् ।

‘हामी दल नयाँ दल दर्ताका लागि निर्वाचन आयोगमा छौँ,' नेता यादवले शिलापत्रसँग भने । प्रतिनिधिसभामा जसपाका १२ सांसद छन् । राजनीतिक दलसम्बन्धी ऐनमा संसदीय दल र केन्द्रीय समितिमा ४०-४० प्रतिशतको समर्थन पुर्‍याएर नयाँ दल दर्ता गर्न सकिने व्यवस्था छ । त्यही व्यवस्था अनुसार सांसद राईको नेतृत्वमा जसपाका नेताहरूले निर्वाचन आयोगमा नयाँ दल दर्ताका लागि निवेदन दिएका हुन् ।

राईको नेतृत्वमा जनता समाजवादी पार्टी (जसपा) र चुनाव चिह्न मुट्ठी राख्ने प्रस्तावसहितको निवेदन आयोगमा बुझाइएको छ । जसपा विभाजनको पक्षमा वन तथा वातावरण मन्त्री वीरेन्द्र महतो पनि उभिएका छन् । सांसदहरू हसिना खानुत र रञ्जु झा पनि विभाजनको कित्तामा उभिएका छन् ।