माओवादी केन्द्रले ६ वर्षमा पटक-पटक एमालेलाई धोका दियो: ओली

A+ A A-

नेकपा एमालेका अध्यक्ष केपी शर्मा ओलीले माओवादी केन्द्रले ६ वर्षमा पटक-पटक एमालेलाई धोका दिएको आरोप लगाएका छन् ।

बिहीबारबाट सुरु भएको केन्द्रीय कमिटीको बैठकमा पेस गरेको राजनीतिक प्रतिवेदनमा अध्यक्ष ओलीले माओवादीको अवसरवादी, अविश्वसनीय र अस्थिर चरित्र भएको बताएका छन् ।

‘गएका ६ वर्षमा हामीमाथि पटक-पटक यस ढंगको धोका भएको छ । संविधान जारी गर्न निर्णायक नेतृत्व गरेको, नाकाबन्दीको सामना गरेको र पारवहन सन्धीमार्फत् नेपालको परनिर्भरतालाई अन्त्य गरेको, २०७२-७३ सरकारलाई विफल पार्न माओवादी आफैँ अग्रसर भएको थियो । माओवादी केन्द्रले देशभक्तिपूर्ण आन्दोलनलाई लत्याएको थियो,’ ओलीको प्रतिवेदनमा भनिएको छ ।

राजनीतिक स्थायित्व र मुलुकको समृद्धिका लागि २०७४ मा चुनावी सहकार्य र पार्टी एकतासम्मको पहल गरिएको तर विभिन्न शक्ति केन्द्रको उक्साहटमा नेकपाको एकतालाई भत्काएर राजनीतिलाई अस्थिर प्रतिगामी र जनविरोधी बाटोमा अग्रसर गराउन माओवादी केन्द्रका नेताहरू फेरि पनि मुख्य भूमिकामा देखिएको ओलीले आरोप लगाएका छन् ।

‘माओवादी केन्द्र राजनीतिक अस्थिरताको मुख्य कारक बन्न पुगेको छ । संसदीय अङ्कगणितमा प्राप्त आफ्नो सङ्ख्यालाई सत्ताको सौदाबाजीका निम्ति प्रयोग गर्ने उसको व्यवहारले राजनीति थप विकृत, बदनाम र विवादित बन्न पुगेको छ,’ओलीले भनेका छन् ।

गत पुस २६ मा कांग्रेससमेतको विश्वासको मत प्राप्त गरेपछि प्रधानमन्त्री पुष्पकमल दाहाल प्रचण्डले बोली फेरेको पनि ओलीले आरोप लगाएका छन् । प्रचण्डले कहिले राष्ट्रपतिका विषयमा एमालेसँग पूर्वसहमति भएकै छैन भनेर झुटो बोल्ने र कहिले राष्ट्रिय सहमति भनेकै कांग्रेससँगको सहमति हो भनेर अर्थ्याएको ओलीले बताएका छन् ।

ओलीले तत्कालीन सत्ता गठबन्धनभित्रबाट राष्ट्रपतिको उम्मेदवार बनाएर भए पनि सहकार्य जोगाउन प्रस्ताव गर्दा पनि माओवादी चरम अवसरवादबाट ग्रस्त र विभिन्न शक्ति केन्द्रको प्रभावमा परेर दक्षिणपन्थी अवसरवादी ओह्रालो यात्राबाट रोक्न नसकेको उल्लेख गरेका छन् ।

‘माओवादी केन्द्रबाट प्रदर्शित यस राजनीतिक बेइमानी चरम अस्थिरता र नाङ्गो अवसरवादले राष्ट्रिय राजनीतिलाई फेरि पुरानै बिन्दुमा धकेलेको छ,’ ओलीले भनेका छन् ।

प्रकाशित मिति: बिहीबार, वैशाख २८, २०८० १६:५१