आर्मीलाई सडनडेथमा पराजित गर्दै एपीएफले जित्यो फुटबलमा स्वर्ण

A+ A A-

विभागीय टिम एपीएफ क्लबले नवौँ राष्ट्रिय खेलकुदअन्तर्गत पुरुष फुटबलमा स्वर्ण पदक जितेको छ । पोखरा रंगशालामा बिहीबार साँझ भएको फाइनलमा एपीएफले आर्मीलाई सडनडेथमा ६–५ ले हराउँदै स्वर्ण जितेको हो ।

खेलको १४औं मिनेटमा नवयुग श्रेष्ठको ओभरहेड किक पोष्ट नजिकैबाट बाहिरिएपछि आर्मीले अग्रता बनाउन चुकेको थियो । पहिलो हाफमा गोलरहित बराबरी खेलेको एपीएफका विकु तामाङले ५८ औं मिनेटमा गरेको प्रहार आर्मीका गोलकिपर विकेश कुथुले अघि बढ्दै बचाए । त्यसैमा नविन लामाको प्रहारलाई डिफेन्डर सुमन अर्यालले हेडमार्फत गोललाइनबाट बचाउँदै आर्मीको संकट टारे ।

६१औँ मिनेटमा हरि कार्कीको प्रहारलाई विकेशले पञ्च गर्दै बचाएपछि एपीएफले अग्रता बनाउन सकेन । ६७औँ मिनेटमा विकास खवासको प्रहार पोष्ट नजिकैबाट बाहिरिएपछि आर्मीले एपीएफविरुद्ध अग्रता बनाउन सकेन ।

दोस्रो हाफमा दुवै टिम १० खेलाडीमा समेटिएका थिए । एपीएफका प्रदीप लामा र आर्मीका पदक तामाङ एक आपसमा झगडामा उत्रिदा रेफ्री नविन्द्र महर्जनले रातो कार्ड दिएका थिए ।

८५औं मिनेटमा सिमन्त थापाको क्रसलाई सुदिल राईले सदुपयोग गर्न नसक्दा फेरि आर्मी अग्रता बनाउनबाट चुक्यो ।

निर्धारित ९० मिनेटसम्म दुवै टिमले गोलरहित बराबरी खेलेपछि ३० मिनेटको अतिरिक्त समय थप गरिएको थियो । खेलको ११६औं मिनेटमा नवयुग श्रेष्ठले डिबक्सभित्र गरेको हेड एपीएफका राजु नगरकोटीले बचाएपछि आर्मी अन्तिम समयमा अग्रता बनाउनबाट चुकेको थियो । थप गरिएको अतिरिक्त समयमा पनि आर्मी र एपीएफ दुवै टिमले गोलरहित बराबरी खेलेपछि टाइब्रेकरबाट फाइनलको छिनोफानो गरिएको थियो ।

टाइब्रेकरमा बराबरी भएपछि सडनडेथबाट खेलको छिनोफानो भएको थियो । आर्मीलाई सडनडेथमा ६–५ ले पराजित गर्दै एपीएफले स्वर्ण जितेको हो ।

टाइब्रेकरमा नवयुग श्रेष्ठ, जर्जप्रिन्स कार्की, सिमन्त थापा, विवेक बस्नेत, विकास खवासले गोल गरेका थिए । सेसेहाङ आङ्दम्बे र सुमन अर्यालले गोल गर्न सकेनन् । एपीएफका लागि नविन लामा, आबास लामिछाने, सुदिप शिख्रकार, राजु नगरकोटी, दीपेश धिमाल र विश्वास उदासले गोल गरे । सनिश श्रेष्ठले प्रहार गरेको बल आकासिएको थियो ।