ज्वालामुखी गाउँपालिकाको पहिलो निर्णय- गर्भवतीलाई एम्बुलेन्स सेवा नि:शुल्क, सुत्केरीलाई भत्ता थपिदिने

ज्वालामुखी गाउँपालिकाको पहिलो निर्णय- गर्भवतीलाई एम्बुलेन्स सेवा नि:शुल्क, सुत्केरीलाई भत्ता थपिदिने

A+ A A-

धादिङको ज्वालामुखी गाउँपालिकाले गर्भवतीहरूलाई नि:शुल्क एम्बुलेन्स सेवा उपलब्ध गराउने भएको छ । गाउँपालिकाको पहिलो कार्यपालिका बैठकले गर्भवतीलाई एम्बुलेन्स सेवा दिँदा कुनै शुल्क नलिने निर्णय गरेकाे हाे । याे निर्णय आगामी १ साउनदेखि लागू हुने गाउँपालिकाका अध्यक्ष यामनाथ दनैले जानकारी दिए ।

'गाउँपालिका क्षेत्रभित्र बसोबास गर्ने गर्भवतीहरूका लागि गाउँपालिका क्षेत्रभित्रका स्वास्थ्य संस्थासम्म पुर्‍याउन तथा उक्त संस्थामा उपचार तथा सेवा उपलब्ध नभएमा त्यहाँबाट सिफारिस गरिएको स्वास्थ्य संस्थासम्म पुर्‍याउन आगामी आर्थिक वर्ष २०७९/८० देखि निशुल्क एम्बुलेन्स सेवा उपलब्ध गराउने निर्णय गरियो, गाउँपालिकाले विज्ञप्तिमा भनेको छ ।

सुत्केरीलाई एक हजार

गाउँपालिकाले संघ र प्रदेश सरकारले उपलब्ध गराउने सुत्केरी अनुदान पोषण भत्तामा १ हजार रुपैयाँ थपेर दिने निर्णय पनि गरेकाे छ । संघ र प्रदेश सरकारले सुत्केरी स्याहार प्रोत्साहन पोषणभत्ता शीर्षकमा अनुदान दिँदै आएका छन् । निर्णयकाे बुँदा नम्बर १ मा 'गाउँपालिका क्षेत्रभित्र बसोबास भई गाउँपालिकाअन्तर्गतका स्वास्थ्य संस्थामा सुत्केरी हुने महिलालाई आगामी आर्थिक वर्ष २०७९/८० देखि संघीय तथा प्रदेश सरकारबाट प्राप्त हुने अनुदान पोषण भत्तामा थप १ हजार रुपैयाँ गाउँपालिकाको बजेटबाट उपलब्ध गराउने' भनिएकाे छ

खानेपानी आयोजनालाई बिजुली सित्तैँमा

लिफ्टिङ र डीपबोरिङ खानेपानी आयोजनाकाे विद्युतीय भुक्तानी गाउँपालिकाले नै गरिदिने भएकाे छ । विद्युत् महसुल भुक्तानीसम्बन्धी निर्णय नम्बर ३ मा भनिएकाे छ- गाउँपालिका क्षेत्रभित्र सञ्चालनमा रहेका लिफ्टिङ र डीपबोरिङ खानेपानी आयोजना सञ्चालन गर्दा लाग्ने विद्युत् महसुल आगामी आर्थिक वर्ष २०७९८० देखि गाउँपालिकाबाट भुक्तानी गर्ने ।

हालै भएको स्थानीय तह चुनावमा नेकपा एमालेका हरिराम लोहनीलाई हराउँदै नेपाली कांग्रेसका दनै गाउँपालिका अध्यक्षमा निर्वाचित भएका थिए । गाउँपालिकाको उपाध्यक्ष नेकपा एकीकृत समाजवादीका धर्मबहादुर अर्याल छन् । गाउँपालिकाका ७ मध्ये पाँचवटा वडा कांग्रेस, एउटा एमाले र एकमा स्वतन्त्र उम्मेदवार विजयी भएका थिए ।

प्रकाशित मिति: बिहीबार, जेठ १९, २०७९ १५:३२