धितोपत्र बोर्डको अध्यक्षका लागि आवेदन खुला, को-कोले पाउँछन् आवेदन दिन?

A+ A A-

सरकारले नेपाल धितोपत्र बोर्ड (सेबोन) को अध्यक्षका लागि आवेदन खुलाएको छ ।

बिहीबार सार्वजनिक सूचना जारी गर्दै अर्थ मन्त्रालयले धितोपत्र बोर्ड अध्यक्षको नियुक्ति प्रक्रिया अगाडि बढाएको हो । सर्वोत्तम सिमेन्टको शेयर खरिद प्रकरणमा तानिएपछि अध्यक्ष भिष्मराज ढुंगाानालाई सरकारले बर्खास्त गरेको थियो । ढुंगाना बर्खास्तमा परेपछि रिक्त पदपूर्तिका लागि सरकारले प्रक्रिया अघि बढाएको हो ।

सरकारले अध्यक्ष खुला प्रतिस्पर्धात्मक प्रतियोगितामार्फत पदपूर्ति गर्न लागेको हो । यसका लागि योग्यता भएका इच्छुक नेपाली नागरिकले कात्तिक ११ गते प्रथमपटक प्रकाशित सूचनाको मितिले १५ दिनभित्र अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामा गोप्य शिलबन्दी आवेदन दिन छनोट तथा सिफारिस समितिले आग्रह गरेको छ ।

अध्यक्ष पदमा आवेदन दिन धितोपत्रसम्बन्धी ऐन, २०६३ को दफा १० बमोजिम योग्यता पुगेको हुनुपर्छ । यसका लागि नेपाली नागरिक हुनुपर्ने, उच्च नैतिक चरित्र भएको हुनुपर्ने र धितोपत्र बजार व्यवस्थापन, पुँजी बजार विकास, आर्थिक, वित्तीय, वाणिज्य, व्यवस्थापन वा कानुन क्षेत्रमा कम्तीमा सात वर्षको पेसागत अनुभव हासिल गरेको हुनुपर्नेछ भने धितोपत्रसम्बन्धी ऐन, २०६३ को दफा ११ बमोजिम अयोग्य नरहेको हुनुपर्नेछ ।

इच्छुक उम्मेदवारले अर्थ मन्त्रालयको वेबसाइटमा प्रकाशित अध्यक्ष छनोट तथा सिफारिसम्बन्धी कार्यविधिको दफा ३ बमोजिमको कागजात तथा विवरण र दफा ४ अनुसारका निवेदन प्रमाणित गरी आफैँ पेस गर्नुपर्नेछ । आवेदन दिँदा ५ हजार शब्दको व्यवसायिक कार्ययोजना खामबन्दी गरी पेस गर्नुपर्नेछ । खामबन्दी प्रस्तावको खामबाहिर ‘नेपाल धितोपत्र बोर्डको अध्यक्षका लागि आवेदन तथा व्यवसायिक कार्ययोजना’ उल्लेख गरेको हुनुपर्नेछ ।