११ महिने शिशुको मृत्यु भएपछि दमकको एडभान्स हस्पिटल तोडफोड

A+ A A-

११ महिने शिशुको मृत्यु भएपछि दमकको एडभान्स हस्पिटल तनावग्रस्त बनेको छ।

कमल गाउँपालिका-१ का ११ महिने शिशु सृजन खड्कालाई उपचारको लागि दमकको एडभान्स हस्पिटल लगेपनि स्वास्थ्यकर्मीले बेवास्ता गर्दा मृत्यु भएको भन्दै अस्पताल तोडफोड भएको हो ।

ती शिशुलाई एडभान्स हस्पिटल ल्याएको र बाल रोग विशेषज्ञ डा. अनिल थापाले परीक्षण गरेको बताइएको छ । बच्चालाई कोरोना देखिए पनि अस्पताल भर्ना नगरी चिकित्सकले औषधि दिएर घर पठाएको आफन्तले जनाएका छन् ।

तर ती शिशुको कोरोना र निमोनियाका कारण मृत्यु भएपछि मृतकका आफन्तले अस्पताल तोडफोड गरेका हुन् ।

डा. थापाले बच्चाको अवस्था सामान्य भएकाले घर पठाएको प्रतिक्रिया दिएका छन् । उनले भने, ‘बच्चाको अवस्था सामान्य थियो, अक्सिजन लेभल पनि ठिक थियो । अनि अस्पतालमा यहाँ कोरोना सङ्क्रमित राख्न सक्ने अवस्था थिएन । र, मैले घर पठाएँ ।’

बालकका आफन्त भने बच्चालाई अस्पतालबाट घर लैजानासाथ गाह्रो भएको बताउँछन् । मृतकका आफन्त सरोज खड्काले स्वास्थ्य अवस्था नाजुक भएका शिशुलाई अस्पताल नराखीघर पठाइएको भन्दै आक्रोश पोखे । उनले डाक्टरको गल्ती औँल्याउँदै भने, ‘अस्पतालबाट सुई दिएका थिए, स्थानीय स्वास्थ्यकर्मीले त्यो सुई लगाइदिएपछि बालकलाई झन् साह्रो भयो ।’

मृतक बालकका आफन्त आक्रोशित भएर अस्पताल आएका थिए । अस्पतालसँगको छलफलमा डाक्टर भगाएको आरोप लगाउँदै उनीहरूले ढुङ्गा प्रहार सुरु गरे । ढुङ्गा हान्ने मध्ये केहीलाई प्रहरीले पक्राउ गरेको छ । ढुङ्गा प्रहारबाट अस्पतालको सिसा फुटेको छ ।

यति बेला अस्पताल सञ्चालक चैतन्य बराल सहितको टोली इलाका प्रहरी कार्यालय दमकमा छलफल गरिरहेको छ । दुबै तर्फको छलफल चलिरहेको कारण अहिले नै केही भन्न नमिल्ने उनले बताए । छलफल सकिएपछाडि क्षतिको विवरण र गलत पक्ष सार्वजनिक गर्ने बरालले जानकारी दिए ।

प्रकाशित मिति: शनिबार, असोज ९, २०७८ १९:३६