फुट्न लागेकाे हल्लाले एसभित्र हङ्गामा, बालकाेटलाई किन दिइयाे दाेष ?

A+ A A-

नेपाल कम्युनिस्ट पार्टी (एकीकृत समाजवादी)ले आफ्नो पार्टी एकताबद्ध रहेको बताएको छ । सोमबार बसेको संसदीय दलको बैठकले पार्टीको सम्बन्धमा विभिन्न अफवाहहरू फैलाइएको भन्दै पार्टी एकढिक्का रहेको निष्कर्ष निकालेको हो ।

आइतबार उपेन्द्र यादव नेतृत्वको सत्तारुढ जनता समाजवादी पार्टी, नेपाल विभाजन भएसँगै एकीकृत समाजवादी पनि विभाजन हुन सक्ने भनेर टिकाटिप्पणी सुरु हुन थालेको थियो । सोही विषयलाई प्रस्ट्याउँदै एकीकृत समाजवादीले पार्टीलाई अझ बलियो र सशक्त बनाउने दृढता पनि व्यक्त गरेको छ । संसदीय दलको बैठकपछि सञ्चारकर्मीहरूसँग कुराकानी गर्दै सांसद शेरबहादुर कुँवरले बजेट अधिवेशनमा सशक्त ढंगले भूमिका खेल्ने र संसदीय दललाई प्रभावकारी बनाउने निर्णय गरिएको बताए ।

उनले सरकारले ल्याउने नीति तथा कार्यक्रम र बजेटबारे दलको तर्फबाट सरकारलाई रचनात्मक सुझाव दिने निर्णय भएको पनि जानकारी दिए । त्यस्तै, उनले पार्टीका बारेमा हल्ला चलाइएको भन्दै आफूहरूको पार्टी एकढिक्का भएको बताए ।

सञ्चारकर्मीहरूसँग कुराकानी गर्दै एसका उपाध्यक्ष तथा राष्ट्रियसभा सदस्य डा. वेदुराम भुसालले अनावश्यक रूपमा बाहिर हल्ला चलाइएको बताए । उनले आफूहरूको पार्टीभित्र कुनै समस्या नभएको बताए । उनले एकीकृत समाजवादीसहितका दलहरूले अर्को समीकरण बनाउँदै छन् भनेर गलत हल्ला चलाइएको पनि बताए ।

सञ्चारकर्मीसँग कुराकानी गर्दै प्रमुख सचेतक मेटमणि चौधरीले एकीकृत समाजवादीका कार्यकर्ता र समर्थकलाई हतोत्साही गराउनका लागि बालकोटमा बसेर एकीकृत समाजवादी फुटको हल्ला चलाइएको बताए । उनले योजनाबद्ध रूपमा हल्ला चलाइएको भन्दै त्यसले आफूहरूलाई कुनै असर नपर्ने बताए ।