एक वर्षदेखि टेन्टमै छन् सङ्खुवासभाका पहिरोपीडित

A+ A A-

सङ्खुवासभाको सिलिचोङ गाउँपालिका– १ बेसिन्दाका पहिरोपीडित एक वर्ष बित्दा पनि अझै टेन्टमै बास बस्न बाध्य छन् ।

पहिरोले विस्थापित भएका बेसिन्दा गाउँका ९७ घरपरिवार पुनःस्थापना हुन नसक्दा टेन्टमै कष्टपूर्ण जीवन बिताउन बाध्य भएका हुन् ।

गत वर्ष असार २८ गते राति आएको पहिरोले सिलिचोङ– १ बेसिन्दाका नौ घर बगाउँदा ११ जना बेपत्ता भएका थिए । सरोकारवाला निकायले चासो नदेखाउँदा विस्थापित परिवार अहिले पनि टेन्टमै बसिरहेका छन् ।

वर्ष दिन बितिसक्दासमेत पुनःस्थापना गर्न तीनै तहका सरकारले चासो देखाएका छैनन् । पहिरोले घर बगाएका पीडितले ओत लाग्ने छानोसमेत पाएका छैनन् ।

हिउँद लागेपछि घरमै बसेका पहिरोपीडित घर बग्ने हो कि भन्ने चिन्तामा छन् । पहिरोको उच्च जोखिम भएका कारण पानी पर्न थालेपछि घर बगाउने डरले टेन्टमै बसिरहेको स्थानीय हीरालाल राईले बताए ।

गत वर्ष असार २८ पछि पनि साना–साना पहिरो गइरहेका कारण घर छाडेर घरभन्दा केहीमाथि चित्रेमा टेन्टमै बसिरहेको स्थानीय डम्बरबहादुर राईले गुनासो गरे । जोखिम भए पनि गाउँ छाडेर जाने ठाउँ नभएपछि केही घरपरिवार बेसिन्दामै बसिरहेको उनले बताए । बेसिन्दामा ११८ घरपरिवारमध्ये अधिकांश परिवार जोखिम मोलेर बसिरहेका उनले जानकारी दिए ।

गाउँपालिका अध्यक्ष रामबहादुर कुलुङले गाउँपालिकाले पहिरो पीडित ९७ परिवारमध्ये ५५ घरपरिवारलाई खाँदबारी नगरपालिकामा पुनःस्थापना गर्न लागिएको जानकारी दिए । उनले पीडितको इच्छा गरेका केही ठाउँमा पुनःस्थापना गर्न लागिएको बताए ।

त्यसैगरी २५ परिवारका लागि सिलिचोङ–१ मै रहेको चित्रे, १२ परिवारलाई बखल्टुमटार र अन्य पाँच परिवारलाई सोही क्षेत्र आसपास पुनःस्थापना गर्ने तयारी भइरेहको उनले बताए ।

पुनःस्थापनाका लागि चित्रे र बखलटुङमा जग्गा खरिद गरेर राख्ने प्रक्रिया सुरु गरिएको उनले बताए । चित्रेमा २९ परिवारका लागि ३० रोपनी र बखलटुङमा १८ परिवारलाई राख्नका लागि नौ रोपनी जग्गा खरिद गर्ने तयारी गरिएको उनले बताए ।

प्रकाशित मिति: शनिबार, साउन २, २०७८ १३:२७