घर-घरमा पुगेर फोहर किन्दै घोराही उपमहानगर, यस्तो छ दररेट

A+ A A-

दाङको घोराही उपमहानगरपालिकाले घर घरबाट फोहोर किन्न थालेको छ । बोटल र गुटखाका खोलमा पैसा आउन थालेपछि स्थानीय दङ्ग परेका छन् । गल्ने फोहोरबाट ग्यास र मल उत्पादनको तयारी अन्तिम चरणमा पुर्‍याइएको छ भने नगल्ने फोहोरलाई खरिद गरेर पुनः प्रयोगमा ल्याउन थालिएको छ ।

केही महिना पहिले सरसफाइ स्वयंसेवक परिचालन गरेर फोहोर किन्ने बारेमा जानकारी गराएको उपमहानगरपालिकाले गत शुक्रबारदेखि नागरिकहरूको घरमै पुगेर फोहोर किन्न थालेको हो ।

घोराही- १४, नयाँ बसपार्कमा जलजला होटलकी सञ्चालक सीता रोकालाई फोहर व्यवस्थापनले निकै पीडा दिँदै आएको थियो । हरेक दिन बिहान फोहर जम्मा गरेर उपमहानगरको गाडीमा पठाउनपर्ने झञ्झट हुने गर्थ्यो । पहिलो पटक फोहर बेचेकी रोकाले बीस केजी फोहरको दुइसय पाँच रुपैयाँ प्राप्त गरिन् । होटलबाट उत्पादन भएको फोहरले आम्दानी हुने भएपछि उनी खुशी छिन् ।

यो वर्षदेखि उपमहानगरभित्रको फोहर खरिद गर्ने नीति लिएपछि फोहर बिक्री गर्ने प्रतिस्पर्धा नै चलेको छ । चालु आर्थिक वर्षको बजेटमै राखेर उपमहानगरपलिकाले गत वैशाखदेखि फोहर खरिद गर्न सुरु गरेको थियो ।

अहिलेसम्म झण्डै बीस हजारको फोहर खरिद गरिएको उपमहानगरपालिका वातावरण तथा सरसफाइ महाशाखा प्रमुख लक्ष्मण अधिकारीले जानकारी दिए ।

उपमहानगरपालिकालाई प्लाष्टिकमुक्त बनाउने अभियानअन्तर्गत यो कार्यक्रम अघि सारिएको हो ।

उपमहानगरपालिकाले प्लाष्टिकको बोतलसहित नरम पोलिथिन प्रतिकिलो १० रुपैयाँमा खरिद गर्दै आएको छ । त्यस्तै कपडा प्रतिकिलो पाँच, सुर्तीजन्य प्लाष्टिकको फोहोर प्रतिकिलो दुई, गत्ता, कापीसहित वर्गिकरण अनुसारका फोहोरलाई १० रुपैयाँदेखि २० रुपैयाँसम्ममा खरिद गर्ने दर कायम गरिएको छ ।

यसरी खरिद गरिएको गल्ने फोहोरलाई बायो ग्यासमा प्रयोग गरिने र नगल्ने फोहोरलाई उद्योगहरूसँग समन्वय गरेर बिक्री गरिने नगर प्रमुख नरुलाल चौधरीले जानकारी दिए ।

प्रकाशित मिति: शनिबार, असार २६, २०७८ १०:५१