रसुवागढी अन्तर्राष्ट्रिय नाकाको ट्राफिक व्यवस्थापन मजबुत

फाइल तस्वीर

A+ A A-

नेपाल-चीनबीचको उत्तरी रसुवागढी अन्तर्राष्ट्रिय नाकाको ट्राफिक व्यवस्थापन मजबुत पारिएको छ । दुई देशबीचको व्यापार व्यवसाय अभिवृद्धि गर्ने रसुवागढी नाकाको ट्राफिक व्यवस्थापन चुस्त पारी सवारी साधनको आवतजावत सरलीकृत गराउने, गैरकानुनी तरिकाले गुडेका सवारी साधनलाई कानुनी दायरामा ल्याउन थालिएको छ ।

नाकाको ट्राफिक व्यवस्थापन सबल तुल्याइएको बागमती प्रदेश ट्राफिक कार्यालय चितवन रामनगरका प्रहरी उपरीक्षक शान्तिराज कोइरालाले जानकारी दिए ।

भौगर्भिक अवस्था एवं आफ्ना मातहतका ट्राफिक प्रहरीले गरिरहेका सेवाको गुणस्तर बुझ्न रसुवा पुगेका कोइराला बेत्रावती, कालिकास्थान, धुञ्चे, स्याफ्रुुबेँसी, टिमुरेसमेत बिटको स्थलगत निरीक्षण गरी ट्राफिक व्यवस्थापनमा लागेका हुन् ।

अन्तर्राष्ट्रिय राजमार्गमा गुड्ने सवारीसाधनको सङ्ख्या बढ्दै जाने भएकाले सम्भावित दुर्घटना न्यूनीकरणका लागि सवारी चालकसामु ठाउँठाउँको सडक अवस्था र चालकले अपनाउनुपर्ने सजगताबारे ट्राफिक प्रहरीले प्रवाह गर्ने सन्देशमूलक चेतना अभिवृद्धिमा समेत थप प्रभावकारी बनाइएको छ ।

तुलनात्मक रूपमा ट्राफिक प्रहरीको संख्या कमी रहे पनि आफ्नो कार्यक्षेत्रमा मौजुदा जनशक्तिले यथेष्ट काम गरिरहेको र रसुवामा कार्यरत ट्राफिक प्रहरीले गरेका सेवा जनस्तरबाट सन्तोषजनक प्रतिक्रिया आएको उनले उल्लेख गरे ।

पासाङल्हमु खण्डको अन्तर्राष्ट्रिय राजमार्गमा गुड्ने सवारीसाधनलाई केन्द्रित गरी रसुवा ट्राफिक एकाइले निरन्तर प्रवाह गरेको सन्देशबाट चालू आवको छ महिना अवधिमा दुर्घटना न्यूनीकरण हुँदै गएको ट्राफिक प्रहरीले जनाएको छ ।

अघिल्लो आवको साउनदेखि पुससम्मको अवधिमा करिब एक दर्जनभन्दा बढी सवारीसाधन दुर्घटना भएका थिए भने सोही अवधिको यस चालू आवमा भने दुईवटा मात्र सवारीसाधन दुर्घटना भएको ट्राफिक प्रहरी रसुवाले जनाएको छ ।

सवारीसाधनको क्षमताभन्दा बढी भार बहन गराउने, चालक अनुमतिपत्र एवं कागजात नबोक्ने, मादक पर्दाथ सेवन गर्ने, सडकमा गुड्न पाउने अनुमति नल्याउनेजस्ता प्रकृतिका १ हजार १ सय सवारीसाधनउपर कारबाही गरिसकिएको छ ।

कारबाही गरिएका सवारीबाट ११ लाख ५ हजार रुपैयाँ जरिवाना गरिएको रसुवा ट्राफिक बिटका इन्चार्ज ईन्द्रबहादुर घिसिङले जानकारी दिए ।

सवारी ऐनविपरीत काम गर्ने सवारीसाधनबाट गत आवको साउनदेखि पुससम्म १२ लाख ३१ हजार ५ सय रुपैयाँ जरिवाना गरिएको थियो भने यस वर्ष सो अवधिमा कोभिड-१९ का कारण राजमार्गमा गुड्ने सवारीसाधन कमी भएपछि जरिवाना घटेको बताइन्छ ।

प्रकाशित मिति: आइतबार, पुस २६, २०७७ ११:२८