विप्लव नेकपाको चन्दा आतंक, नदिए भौतिक कारबाहीको धम्की

A+ A A-

पूर्वी पहाडी जिल्ला संखुवासभामा पछिल्लो समय नेत्रविक्रम चन्द विप्लव नेतृत्वको प्रतिबन्धित नेपाल कम्युनिस्ट पार्टीका कार्यकर्ताले चन्दा संकलन अभियान तीव्र पारेका छन् ।

विप्लव नेकपाका कार्यकर्ताले जिल्लाका विभिन्न नगर तथा गाउँपालिकाका जनप्रतिनिधि र व्यापारीसँग चन्दा माग्दै फोनबाट धम्की आउने बताएका छन् ।

विप्लवका कार्यकर्ताले पटक–पटक फोनबाट चन्दा माग्ने गरेको भन्दै प्रहरीसमक्ष उजुरीसमेत परेका छन् । केही समयअघि विप्लव कार्यकर्ताले चन्दा नदिएको भन्दै पाँचखपन नगरपालिकाको १ झ ५४० नम्बरको गाडी तोडफोड गरेका थिए ।

विप्लव कार्यकर्ताले पाँचखपनका नगरप्रमुख, उपप्रमुख र वडा अध्यक्षहरुलाई पटक–पटक फोन गरेर चन्दा आतंक मच्चाएको स्रोतको भनाइ छ । चन्दा नदिए भौतिक कारबाही गर्नेसमेत धम्की आएको पाँचखपनका एक जनप्रतिनिधिले बताए ।

उनीहरूले ज्यान जोखिममा भएका कारण आफूहरूले खुलेर भन्न सक्ने अवस्था नभएको बताए । विप्लव कार्यकर्ताले चैनपुर, मादी, धर्मदेवी नगरपालिकाका जनप्रतिनिधिसँग फोनबाट चन्दा माग्ने गरेको र चन्दा नदिए भौतिक कारबाही गर्ने धम्की आउने बताए ।

त्यसैगरी, गरी विप्लव नेकपाका कार्यकर्ताले गत मंसिर २५ गते राति मादी नगरपालिका–५ को वडा कार्यालय र एक स्क्याभेटरमा समेत आगजनी गरेका थिए । आगजनीबाट वडा कार्यालयको भवन, कागजपत्र, फर्निचर, कम्प्युटर, फोटोकपी मेसिन, प्रिन्टर, मोबाइल फोनलगायतका सामग्री जलेका थिए ।

आगजनीबाट २ करोड रूपैयाँबराबरको क्षति भएको मादी नगरपालिकाका नगरप्रमुख विदुर सुब्बाले जानकारी दिए । प्रहरीले आगजनी, तोडफोड गर्न र चन्दा माग गर्ने एक जना पनि कार्यकर्ता पक्राउ गर्न सकेको छैन ।

ब्यापारीसँग मागे १५ लाख

विप्लव कार्यकर्ताले चैनपुर नगरपालिकाका एक व्यापारीसँग १५ लाख चन्दा माग गरेका छन् । पटक–पटक फोन गरेर चन्दा माग्ने गरेको उनले बताए ।

विप्लव कार्यकर्ताले चन्दा नदिए भौतिक कारबाहीको धम्की दिएपछि उनी प्रहरीसमक्ष आएको स्रोतको भनाइ छ । उनको नाम भने खुलाइएको छैन । उनलाई विप्लव कार्यकर्ताले पुुस १ गते १५ लाख बुझाउन अल्टिमेटम दिएको स्रोतको भनाइ छ ।

त्यस्तै, विप्लव कार्यकर्ताले जिल्लाका ठेकेदारलाई समेत फोनबाट चन्दा माग गरेको बताएका छन् ।

अहिलेसम्म दर्जन कार्यकर्ता पक्राउ

प्रहरीले प्रतिबन्धित नेपाल कम्युनिस्ट पार्टी विप्लवका दर्जनभन्दा बढी कार्यकर्ता पक्राउ गरेको छ । प्रहरीले विप्लवका संखुवासभा इन्चार्ज देव गुरुङ र जिल्ला सदस्य सुनिता राईलाई काठमाडौंको गौशालाबाट पक्राउ गरेको हो ।

विप्लवका कार्यकर्ता निमदोर्जी तामाङ, बुद्धिमान तामाङ, सन्जय तामाङ, लेखबहादुर राउत, सुजन विक र कोशी ब्यूरो सदस्य डीबी सिलवाल पक्राउ परेको स्रोतको भनाइ छ ।

त्यस्तै, प्रहरीले पाँचखपन नगरपालिका–४, जलजलाका यामप्रसाद गौतमलाई विष्फोटक पदार्थसहित पक्राउ गरेको छ ।

प्रकाशित मिति: बिहीबार, पुस ३, २०७६ ०८:५६