विश्वासकाे मत नलिँदै सत्तापक्ष र प्रतिपक्ष आमनेसामने

A+ A A-

प्रधानमन्त्री पुष्पकमल दाहाल प्रचण्डले विश्वासकाे मत नलिँदै सत्तापक्ष र प्रतिपक्ष आमनेसामने हुने भएका छन् । राष्ट्रियसभा अध्यक्षकाे निर्वाचनमा सत्तापक्षले माओवादी केन्द्रका नारायण दाहाल र प्रमुख विपक्षी नेपाली कांग्रेसले युवराज शर्मालाई उम्मेदवार बनाएकाे छ । २९ फागुनमा हुने निर्वाचनका लागि साेमबार मनाेनयन दर्ता हुँदै छ ।

प्रधानमन्त्री प्रचण्डले गठबन्धन फेरेपछि प्रमुख विपक्षीकाे कित्तामा धकेलिएकाे कांग्रेसले सरकारलाई दिएकाे समर्थन फिर्ता लिइसकेकाे छ । यसाे हुँदा संवैधानिक व्यवस्थाअनुसार प्रधानमन्त्री प्रचण्डले ३० दिनभित्र विश्वासकाे मत लिइसक्नुपर्छ ।

प्रचण्डले राष्ट्रियसभा अध्यक्षकाे चुनाव सकेर मात्रै विश्वासकाे मत लिने तयारी गरेका छन् । सम्भवत: उनले राष्ट्रियसभा अध्यक्षकाे निर्वाचनकाे भाेलिपल्टै अर्थात् ३० फागुनमा विश्वासकाे मत लिने तयारी गरेका छन् ।

कांग्रेस–माओवादीकाे गठबन्धन कायमै रहेकाे भए पूर्वसहमतिअनुसार कांग्रेस नेता कृष्णप्रसाद सिटाैला राष्ट्रियसभा अध्यक्ष बन्ने लगभग निश्चित थियाे । तर, माओवादीले कांग्रेससँगकाे गठबन्धन फेरेर एमालेसँग मिसिएपछि सिटाैलाकाे सपना चकनाचुर भयाे ।

राष्ट्रियसभाकाे अध्यक्ष नपाउने पक्कापक्की भएपछि उनी शनिबार नै कांग्रेसको राष्ट्रियसभा संसदीय दलको नेता बनेका छन् । जित सहज रहेकाे अवस्थामा सिटाैला उम्मेदवार हुने निश्चित भए पनि कांग्रेसले हार्ने चुनावमा शर्मालाई अगाडि सारेकाे छ ।

काे हुन् शर्मा ?

1643210014_Uba Raj Sharma Photo-1200x5601710072167.jpg

शर्मा नेपाली कांग्रेसका पुराना नेता हुन् । उनी २०७८ सालमा राष्ट्रियसभा सदस्य निर्वाचित भएका थिए । शर्मालाई त्यतिबेला लामो समयपछि न्याय गरेको चर्चा भएको थियो ।

शर्मा २०४५ देखि २०४९ सालसम्म कांग्रेस बाँकेको सभापति भएका थिए । पञ्चायतविरोधी गतिविधि गरेका कारण उनी २०२४ सालमा पहिलोपटक जेल परेका थिए । २०२४ सालपछि पटक–पटक गरेर उनी ३–४ वर्षजति जेल बसेका छन् ।

काे हुन् माओवादी उम्मेदवार दाहाल ?

सरकारको सिफारिसमा राष्ट्रियसभा सदस्य मनोनीत भएका नारायण दाहाल प्रधानमन्त्री पुष्पकमल दाहाल प्रचण्डका भाइ नाता पर्छन् । तत्कालीन राष्ट्रपति विद्यादेवी भण्डारीले उनलाई राष्ट्रियसभा सदस्य मनोनीत गरेकी थिइन् ।

उनी २०६४ मा चितवन क्षेत्र नम्बर ३ बाट निर्वाचित भएका थिए भने २०७० सालमा सोही क्षेत्रबाट पराजित भएका थिए । उनका छोरा समिर दाहाल २०६६ देखि २०६९ सम्म प्रचण्डको स्वकीय सचिव बनेका थिए ।

प्रचण्डलाई चेतावनी

राष्ट्रियसभा निर्वाचनकाे दुई दिनअघि आफूलाई धाेका दिइएकाे भन्दै कांग्रेस नेता कृष्णबहादुर सिटाैलाले आइतबार बालुवाटारमै पुगेर प्रधानमन्त्री प्रचण्डसँग आक्राेश पाेखेका छन् । नेताहरू गगन थापा र रमेश लेखकसहित बालुवाटार पुगेका सिटौलाले प्रचण्डलाई ‘धोकेबाज’ भने । ‘तपाईंले वचन दिएकाले म चुनाव लडेर आएँ । तर, तपाईंले कांग्रेस मात्र होइन, व्यक्तिगत रूपमा मलाई पनि धोका दिनुभयो,’ प्रचण्डलाई सिटाैलाले भनेका थिए, 'यति धोका दिइसकेपछि पनि सजिलो गरी चल्छ भन्ने अब नसोच्नुहोला । धोकाधडीको राजनीति यहीँ टुंगिन्छ भन्ने नठान्नुहोला ।'

सिटाैलाकाे याे चेतावनीले कांग्रेस बदलाकाे मुडमा रहेकाे देखाउँछ । कांग्रेसमा बदलाभाव देखिएका बेला हुन लागेकाे राष्ट्रियसभा अध्यक्षकाे निर्वाचनमै त्यसकाे नतिजा देखिने सम्भावना भने कमजाेर छ । किनभने सत्ता गठबन्धन एकढिक्का रहँदा विपक्षी दलकाे सामर्थ्यले याे चुनावमा कुनै हलचल ल्याउन सक्ने अवस्था छैन ।

हुन त अहिले प्रधानमन्त्री प्रचण्डप्रति नयाँ गठबन्धन पनि विश्वस्त हुन नसकेकाे चर्चा छ । एमाले कार्यकर्ताहरूमा पनि पहिला सत्ताराेहण हुँदाकाे जस्ताे उत्साह देखिएकाे छैन । सत्ताधारी दल नेकपा एसका केही नेताहरू पनि अहिलेकाे गठबन्धनप्रति तीव्र असन्तुष्टि व्यक्त गरिरहेका छन् ।

सत्तारुढ दलका केही नेताहरूकाे विराेध र प्रचण्डबाट धाेका पाएका कांग्रेसका नेताहरू बदला लिने मुडमा रहेका बेला राष्ट्रियसभा अध्यक्षकाे चुनाव हुन लागेकाे छ । विपक्षी दलकाे सामर्थ्य बढाउन सरकारमा सहभागी नभएका साना दलहरूलाई पनि कांग्रेसले आफूतिर राेक्न खाेजेकाे छ ।

कांग्रेस नेताहरूले प्रचण्डबाट धाेका पाएकाहरू एक ठाउँमा उभिनुपर्ने सन्देश दिन थालेका छन् । कांग्रेसका प्रमुख सचेतक रमेश लेखकले प्रचण्डलाई संसदमै ‘तपाईंबाट धोका पाएकाहरू एक ठाउँ उभिए के होला तपाईंको हालत भनेर प्रश्न गरेका थिए । तर, आइतबार जनता समाजवादी पार्टीलाई पनि सरकारमा सहभागी गराएर प्रचण्डले राष्ट्रियसभा अध्यक्षमा भाइ दाहालकाे जितसहित आफ्नाे प्रधानमन्त्री पद पनि सुरक्षित पारिसकेका छन् । स्थिति कम्फर्टेबल बनिसकेकाेले उनले बुधबार सदनबाट विश्वासकाे मत लिने तयारी गरेका हुन् ।

प्रकाशित मिति: आइतबार, फागुन २७, २०८० २०:५७