टिकटककाे सातबुँदे प्रश्नमा नेपालले पठायाे एकबुँदे जवाफ

A+ A A-

नेपालमा टिकटक प्रतिबन्ध लागेपछि सिंगापुरस्थित टिकटकले नेपाल सरकारलाई पठाएको पत्रको जवाफ नेपालले पठाएको छ । नेपाल दूरसञ्चार प्राधिकरणका अध्यक्ष पुरुषोत्तम खनालले नेपाल सरकारको तर्फबाट शुक्रबार टिकटकलाई पत्र पठाएको जानकारी दिए ।

उनले शिलापत्रसँग भने, ‘नेपाल सरकारले गरेको निर्णयअनुसार नेपालमा टिकटक बन्द गराउन सहयोग गर भन्दै हामीले पत्र पठाएका छौँ ।’ यसअघि टिकटकले पनि नेपालमा बन्द गरिएपछि पत्र पठाएको थियो ।

गत सोमबार बसेको मन्त्रिपरिषद् बैठकले टिकटकमाथि प्रतिबन्ध लगाएको थियो । त्यसपछि प्राधिकरणले नेपालस्थित इन्टरनेट सेवा प्रदायक संस्थालाई टिकटक बन्द गराउन निर्देशन दिएपछि अहिले नेपालमा टिकटक सामान्य रूपमा खुल्दैन ।

तर, भर्चुअल प्राइभेट नेटवर्क (भीपीएन) र डोमिन नेम स्टिम (डीएनएस) सेटिङ गरेर अहिले प्रयोगकर्ताहरूले टिकटक चलाइरहेका छन् । यसरी हेर्दा टिकटकमाथिको सरकारी प्रतिबन्ध असफल देखिएको छ । सरकारले टिकटकका माध्यमबाट सामाजिक सद्भाव बिथोलिएको तर्क गर्दै टिकटकमाथि प्रतिबन्ध लगाएको हो ।

प्राधिकरणका अध्यक्ष खनालले अवैधानिक हिसाबले टिकटक चलाइएकाले यसलाई सरकार असफल भएको भन्न नमिल्ने तर्क गरे । उनले भने, ‘सरकारले अवैध तरिकाबाट टिकटक चलाउनुलाई अपराध भनेको छ । त्यसैले अहिले अवैध तरिकाबाट टिकटक चल्यो भन्दैमा असफल भन्न मिल्दैन ।’