नयाँ परमाणु बम बनाउने अमेरिको घोषणा, हिरोसिमामा खसाइएको भन्दा २४ गुणा शक्तिशाली

नयाँ परमाणु बम बनाउने अमेरिको घोषणा, हिरोसिमामा खसाइएको भन्दा २४ गुणा शक्तिशाली

A+ A A-

चीनले आफूसँग भएका परमाणु हतियार दोब्बरले वृद्धि गर्ने योजना सार्वजनिक गरेपछि अमेरिकाले पनि नयाँ र शक्तिशाली परमाणु बम बनाउने घोषणा गरेको छ ।

दोस्रो विश्वयुद्धको समयमा जापानको हिरोसिमा र नागासाकीमा खसाइएको परमाणु बमभन्दा २४ गुणा शक्तिशाली बम अमेरिकाले बनाउन लागेको हो । विश्वमा अहिलेसम्म दुई पटक मात्र परमाणु बम युद्धमा प्रयोग भएको छ ।

हिरोसिमा र नागासाकीमा भएको उक्त परमाणु बम हमलामा एकैपटक एक लाख ४० हजारभन्दा बढी मानिसले ज्यान गुमाएका थिए । यसको अर्थ अमेरिकाले बनाउन लागेको बी ६१-१३ परमाणु बम पहिलेभन्दा झनै घातक हुनेमा कुनै शंका छैन ।

अमेरिकी रक्षा मन्त्रालय पेन्टागनका अनुसार ऊर्जा विभागको राष्ट्रिय आणविक सुरक्षा प्रशासन एनएनएसएले बी ६१–१३ बम विकास गर्नेछ । यो बम सन् १९६० को दशकमा शीतयुद्ध ताका बनाइएको बी ६१ ग्राभिटी बमको परिस्कृत स्वरुप हो । यो बमले एकपटक विस्फोट हुँदा ३ लाखभन्दा बढी मानिसको ज्यान लिन सक्छ ।

परमाणु बम बनाउने फैसलाले अमेरिकालाई आफ्ना विरोधीविरुद्ध बलियो बनाउन र आफ्ना सहयोगीहरूको विश्वास कायम राख्न मद्दत गर्ने विश्लेषकहरू बताउँछन् । हाल चार सयवटा परमाणु हतियार भएको चीनले आफ्नो परमाणु हतियारको संख्या हजारभन्दा बढी बनाउने भएपछि नै अमेरिकाले शक्तिशाली परमाणु बम बनाउने घोषणा गरेको अवस्था छ, अमेरिकासँग ५ हजार परमाणु हतियार छन् ।

अमेरिका र चीनको पछिल्लो फैसला आणविक हतियार निषेधको राष्ट्रसंघीय सन्धि टीपीएनडब्लूको उल्लंघन हुनेछ । राष्ट्रसंघले आणविक हतियारको विकास, परीक्षण, उत्पादन, अधिग्रहण, स्वामित्व, भण्डारण, प्रयोग वा धम्की दिने कार्यमा निषेध लगाएको छ । यी दुई राष्ट्र आफैँ राष्ट्रसंघ सुरक्षा परिषद्‌का स्थायी सदस्य पनि हुन्, उनीहरू विश्वमा शान्ति कायम गर्नुपर्छ भन्छन् तर आफैँ हतियार उत्पादनको प्रतिस्पर्धामा छन् ।

-टाइम्स अफ इन्डिया र दैनिक भास्करको सहयोगमा

प्रकाशित मिति: सोमबार, कात्तिक २०, २०८० १२:३३