१६ वर्षदेखि जनकपुरको अन्तर्राष्ट्रिय रंगशाला अलपत्र, विनियोजित करोडौँ रकम फ्रिज

१६ वर्षदेखि जनकपुरको अन्तर्राष्ट्रिय रंगशाला अलपत्र, विनियोजित करोडौँ रकम फ्रिज

A+ A A-

जनकपुरधामको श्री रामजानकी बहुउद्देश्यीय अन्तर्राष्ट्रिय रंगशाला पछिल्ला १६ वर्षदेखि अलपत्र अवस्थामा पुगेको छ । २०६४ सालमै नेपाल सरकारबाट अन्तर्राष्ट्रिय रंगशालाको मान्यता पाएको यो रंगशाला अहिलेसम्म निर्माणका लागि कुनै ठोस कदम अगाडि बढ्न सकेको छैन ।

एकै समयमा निर्माणको अनुमति पाएको पोखराको रंगशाला अन्तर्राष्ट्रियस्तरको भइसकेको छ । श्रीरामजानकी रंगशालाको निर्माण कार्य २०६४ देखि नै भएको हो । रंगशालाका अभियन्ता दिनेश पुर्वेले २०७४ देखि नै अन्तर्राष्ट्रियस्तरको रंगशाला बनाउन पहल गरेका थिए । २०६७ मा तत्कालीन खेलकुदमन्त्री गणेश नेपालीलाई ज्ञापनपत्र बुझाउँदै उनले श्रीरामजानकी रंगशालालाई अन्तर्राष्ट्रियस्तरको बनाउन पहल गरेका थिए ।

१६ वर्ष बित्दा पनि यो रंगशालाले पूर्णता पाउन सकेको छैन । कछुवा गतिमा रंगशालाको निर्माण कार्य अगाडि बढिरहेको छ । पुर्वेले २०७४ मा राष्ट्रिय खेलकुद परिषद् र गुठी संस्थाबीच वार्षिक नौ लाख रुपैयाँ तिर्ने गरी जनकपुरधाम–१३ स्थित रजौलमा १७ बिघा जग्गा ३० लाखमा लिजमा लिए । १७ बिघा जग्गा लिजमा लिए पनि अपेक्षाअनुसार निर्माण कार्य अगाडि बढ्न नसक्दा अलपत्रजस्तै छ । रजौलस्थित प्रस्तावित श्रीरामजानकी बहुउद्देश्यीय अन्तर्राष्ट्रिय खेलमैदानले आकार लिने पर्खाइमा थुप्रै खेलप्रेमी छन् ।

Shreeram Janaki Internationa Stedium (2)1698290557.jpg

दशकअगाडिदेखि निर्माणको काम थालिए पनि सम्पन्न हुन नसक्दा उनीहरू निराश छन् । युवा र खेलप्रेमीहरू रंगशाला निर्माण सम्पन्नको अपेक्षामा छन् । यद्यपि, रंगशाला प्रचारप्रसारका लागि तत्काल मधेश सरकारको खेलकुद मन्त्रालयबाट २० लाख बजेट आएको थियो । यसैबाट रंगशालामा घेराबेरा घेरियो । उपमहानगरको २० लाख सहयोगमा क्रिकेट पिचको निर्माण भएको छ ।

रंगशाला अभियन्ता पुर्वेले तीनै तहका सरकार गम्भीर नहुँदा श्रीरामजानकी रंगशाला दशकदेखि अलपत्र अवस्थामा रहेको आरोप लगाएका छन् । सुरुमा प्रदेश सरकारले रंगशाला निर्माणका लागि आवश्यक पहल नगरेको होइन । तर, तत्कालीन प्रधानमन्त्री केपी शर्मा ओलीले रंगशालालाई तीन तहमा स्थानीय, प्रदेश, राष्ट्रिय र अन्तर्राष्ट्रिय रूपमा वर्गीकरण गरेका थिए । ओली सरकारको रंगशाला वर्गीकरणका कारण नै श्रीरामजानकी रंगशाला पछाडि परेको पुर्वेले बताए ।

‘तत्कालीन ओली नेतृत्वको सरकारले स्थानीयस्तरका ७५३, प्रदेशस्तरका ७ र राष्ट्रिय–अन्तर्राष्ट्रियस्तरको एक रंगशाला बनाउने निर्णय गरेको थियो,’ उनले भने, ‘जनकपुरधाममा रंगशाला निर्माणको बजेट विनियोजन भएन ।’

जनकपुरधाममा आउनुपर्ने बजेट झापाको दमकमा मदन भण्डारी रंगशालामा बजेट जाँदा नै रंगशाला निर्माणको गति रोकिएको उनले बताए । ‘हामीले प्राप्त गर्नुपर्ने बजेट झापा लगियो, सरकारले नै जनकपुरसँग विभेद गरेको छ,’ उनले भने ।

प्रदेशस्तरीय अन्तर्राष्ट्रिय रंगशालाका रूपमा अगाडि बढाउने क्रममा वीरगन्जमै विरोध सुरु भएपछि तत्कालीन मुख्यमन्त्री लालबाबु राउतले रंगशाला निर्माणमा खासै चासो दिएनन् । यसले पनि रंगशालाको कार्य नै प्रभावित भएको मानिन्छ । पुर्वेले भने, ‘सुरुमा प्रदेश सरकारले सहयोग गर्‍यो, तर वीरगन्जमा विरोध भएपछि मुख्यमन्त्री राउत नै पछाडि हटे ।’ प्रदेश सरकारको असहयोगले रंगशालाको कार्य अगाडि नबढेको उनले आरोप लगाएका छन् । जनकपुरधाम उपमहानगरपालिकाले पनि रंगशाला निर्माणमा कुनै चासो नराखेको उनको बुझाइ छ ।

Shreeram Janaki Internationa Stedium (3)1698290581.jpg

क्रिकेट, हक्की, फुटबल, स्वीमिङ पुलसहितका खेल खेलाउन मिल्ने रंगशालाको निर्माण कार्यमा अहिलेसम्म प्रदेश सरकारले ९० लाख रुपैयाँ मात्रै लगानी गरेको छ । प्रदेश सरकारले श्रीरामजानकी बहुउद्देश्यीय अन्तर्राष्ट्रिय रंगशाला प्रदेशकै गौरवका रूपमा हेरेको छ । तर, त्यसको सम्पूर्ण कार्यकोे जिम्मेवारी राष्ट्रिय खेलकुद परिषद्को मातहतमा छ । रंगशालाका लागि लिजमा लिइएको जग्गा राखेपको नाममा छ । ‘यस्तोमा प्रदेश सरकारले सीमित रूपमा मात्रै बजेट विनियोजन गरिरहेको छ, यस विषयमा तीन तहका सरकारबीच समन्वय हुनु आवश्यक छ,’ प्रदेश सरकारमा शिक्षा तथा समाज कल्याण मन्त्रालयका एक अधिकारीले भने ।

अभियन्ता पुर्वेले रंगशाला बनाउन भारत सरकार सहयोग गर्न तयार रहे पनि सम्बन्धित निकायबाट समयमा पहल नहुँदा अलपत्र परेको आरोप लगाए ।

भारतीय प्रधानमन्त्री नरेन्द्र मोदी जनकपुर भ्रमणमा आउँदा जनकपुरधामको विकासका लागि १ अर्ब भारतीय रुपैयाँ सहयोग गर्ने घोषणा गरेका थिए । सुरुमा उक्त रकम प्रदेश सरकार, जनकपुरधाम उपमहानगरपालिका र संघीय सरकारमातहत रहेको बृहत्तर जनकपुर क्षेत्र विकास परिषद्‌मध्ये कसले खर्च गर्ने भनेर विवाद लामो समयसम्म रहिरह्यो । तर, ६ महिनाअघि मात्रै उक्त रकम प्रदेश सरकार र जनकपुरधाम उपमहानगरपालिकाले श्रीरामजानकी बहुउद्देश्यीय अन्तर्राष्ट्रिय रंगशाला निर्माणमा खर्च गर्ने सहमति भएको छ । सहमति भए पनि त्यो रकम ल्याउने अहिलेसम्म कुनै ठोस पहल नभएको अभियन्ता पुर्वेले बताए ।

Shreeram Janaki Internationa Stedium (4)1698290600.jpg

यता, रंगशाला निर्माणको शीर्षकमा आएको बजेट पटक–पटक फ्रिज हुँदै आएको छ । खेलकुद मन्त्रालयले २१ मंसिर २०७५ मा रंगशालाको लागत इस्टिमेट तयार गरेको थियो । निर्माण कार्यमा ६ अर्ब १९ करोड लागत देखियो । आर्थिक वर्ष ०७५/७६ मा २ करोड ५० लाख रकम विनियोजन भयो । १ करोडको लागतमा बाउन्ड्रीको पर्खाल र सुरक्षाकर्मी बस्ने चारकोठे भवन निर्माण भयो । त्यसबाहेक अन्य रकम फ्रिज भयो ।

आर्थिक वर्ष २०७६/७७ मा संघीय सरकारले रंगशालाका लागि ५ करोड र २०७७/७८ मा १ करोड विनियोजन हुँदा सबै फ्रिज भएको थियो । २०७८/७९ मा पनि सरकारबाट १ करोड रकम विनियोजन भयो । सो आर्थिक वर्षमा भाडाको १८ लाखबाहेक बाँकी रकम फ्रिज भएको पुर्वेले बताए ।

प्रकाशित मिति: बिहीबार, कात्तिक ९, २०८० ०९:१०