राप्रपामा संसदीय दलको नेता फेर्न चलखेल, बचाउमा लिङ्देनको घरदैलो अभियान

राप्रपा अध्यक्ष राजेन्द्र लिङ्देन ।

A+ A A-

राष्ट्रिय प्रजातन्त्र पार्टी (राप्रपा) भित्र संसदीय दलको नेता परिवर्तनको चलखेल सुरु भएको छ । राप्रपाका नेताहरू पशुपति शमशेर जबरा, डा. प्रकाशचन्द्र लोहनी र लोकेन्द्रबहादुर चन्दनिकट नेताहरू संसदीय दलको नेता फेर्ने प्रयासमा लागेका हुन् ।

राप्रपा अध्यक्ष राजेन्द्र लिङ्देनले संसद र पार्टी सञ्चालनमा अपरिपक्वता देखिएको र विधानविपरीत निर्णय गरेको आरोप लागेको छ । सोही आरोपपछि लिङ्देनको विपक्षमा रहेको समूह आन्तरिक छलफलमा जुटेको छ । गत शनिबार चन्द निवास भक्तपुरमा नेताहरूबीच लिङ्देनको विकल्प खोज्नेबारे छलफल भएको थियो । त्यसपछि लिङ्देन भने निरन्तर भेटघाटमा लागेका छन् । राप्रपा स्रोतका अनुसार हिजो (बुधबार) लिङ्देन भक्तपुरस्थित चन्द निवासमा पुगेका थिए ।

आफूले पार्टी सञ्चालनमा गल्ती नगरेको र गल्ती भए माफी माग्ने आशयसहित चन्द निवासमा पुगेको राप्रपा स्रोतको भनाइ छ । चन्दले पार्टी विधानविपरीत चलेको र पार्टीका नेताहरूको अपमान गरेको फेहरिस्त नै सुनाएपछि लिङ्देन अप्ठ्यारोमा परेको बताइएको छ । अध्यक्ष लिङ्देनले नेता चन्दलाई भने पटक-पटक अपमान गरेका छन् । उक्त घटना पनि चन्दले भेटमा लिङ्देनलाई सुनाएको स्रोतको भनाइ छ ।

राप्रपाको स्थापना दिवसमा चन्दलाई अध्यक्ष लिङ्देनले निम्ता नै नगरेको पनि राप्रपाभित्र चर्चाको विषय बनेको छ । राप्रपाको स्थापना दिवस १५ जेठमा हो । लगातार दुई वर्ष नै राप्रपाका संस्थापक अध्यक्ष चन्दलाई लिङ्देनले औपचारिकताका लागि पनि नबोलाएको राप्रपाका एक नेताले बताए । ती नेताका अनुसार पार्टी स्थापना दिवसमै संस्थापक अध्यक्ष चन्दलाई निम्ता नगरेका लिङ्देनले ऊर्जामन्त्री हुँदा पनि अपमान गरेको चर्चा गरिन्छ ।

लिङ्देन ऊर्जामन्त्री भएका बेलामा चन्दले कुनै एक जलविद्युत् आयोजनाको नाम राजा वीरेन्द्र वा महेन्द्रको नाममा राख्न सुुझाव दिएका थिए । मन्त्री लिङ्देनले चन्दको सुझावलाई उडाउँदै पार्टीका नेताहरूको बीचमा ‘बुढाहरू अनावश्यक सुुझाव दिन्छन् मलाई’ भन्दै चन्दलाई अपमान गरेका थिए । उक्त कुरा पनि चन्दसम्म पुगेको थियो । बुधबारको भेटमा उक्त कुरा पनि निस्केको स्रोतको भनाइ छ । अहिले राप्रपामा अध्यक्ष लिङ्देनको विपक्षमा राणा, चन्द र लोहनीसहितको पंक्ति उभिएपछि लिङ्देन घरदैलो अभियानमा लागेका हुन् ।

गत शुक्रबार लिङ्देन नेता राणाको निवासमा पुगेका थिए । शनिबार चन्द निवासमा नेताहरूको भेला हुने भएपछि राणालाई भेलामा जानबाट रोक्न अघिल्लो दिन राणा निवास पुगेको राप्रपा नेताको भनाइ छ । तर, अहिले उनीहरू लिङ्देनको भनाइ सुनुवाइ गर्ने पक्षमा छैनन् । अध्यक्ष बनाउन महाधिवेशमा खुलेर लागेका लोहनीलाई समानुपातिक सांसद बनाउँछु भनेर लिङ्देनले अन्तिम समयमा धोका दिएका थिए ।

राणालाई भने संसदीय दलको नेता बनाउने आश्वासन दिएका थिए । पार्टी आफूले चलाउने, संसद राणाले चलाउने भन्दै आर्थिक लाभसमेत लिएको लिङ्देनमाथि आरोप लागेको छ । आश्वासन दिने तर कार्यान्वयन नगर्ने प्रवृत्तिका कारण लिङ्देनमाथि विश्वासघातीको आरोप लाग्ने गरेको पनि राप्रपा स्रोतको दाबी छ । संसदीय दलको नेता परिवर्तनको चलखेल सुरु भएसँगै १४ जना सांसदको कित्ताकाट पनि हुन थालेको छ ।

राप्रपा स्रोतका अनुसार राणा, चन्द र लोहनीको समूहमा ७ जना सांसद खुलिसकेका छन् । राणासहित धवलशमेशर राणा, दीपक सिंह, रोशन कार्की, दीपक बोहोरा, धुव्रबहादुर प्रधानलगायतका सांसद छन् । सांसद विक्रम पाण्डे र बुद्धिमान तामाङ पनि उनीहरूसँग संवादमा छन् । त्यसैले पार्टी बचाउन पहिलो चरणमा लिङ्देनलाई संसदीय दलको नेताबाट हटाउने एक नेताले दाबी गरे ।

प्रकाशित मिति: बिहीबार, साउन ३२, २०८० ११:५२