नेतृत्वसँग लड्न इतर समूहका शेखर गगन झन् नजिकिएका हुन् ?

A+ A A-

पार्टीभित्र संस्थापनइतर समूहको नेता भए पनि मझधारमा देखिएका नेता डा. शेखर कोइराला फेरि इतर समूहको बोली बोल्न थालेका छन् । पार्टी सभापति शेरबहादुर देउवासँग नजिकिएको र आफ्नो समूहका नेता महामन्त्री गगन थापासँग दूरी बढाएको बारे उनले प्रस्टीकरण दिएका थिए ।

इतर समूहबाट टाढा नरहेको सन्देश दिन खोजे पनि उनले केन्द्रीय समिति बैठक (साउन २–१०) मा इतर समूहको भावनाको प्रतिनिधित्व गर्न नसकेको आरोप खेपे । तर, संसदीय दलको बैठक (साउन २६–२९)मा भने उनले फेरि संस्थापनइतरको सक्रियता देखाए ।

आफू समूहको नेताबाट देउवा समूहमा झुकाव नरहेको सन्देश दिए । एकै दलका नेताहरूको छलफल सामान्य भए पनि कोइराला देउवासँग नजिक भए भन्ने कुरा संस्थापन र संस्थापनइतर समूहसँग जोडेर हेरिन्छ । १४औँ महाधिवेशनमा देउवासँग प्रतिस्पर्धा गरेका कोइरालालाई एकल बनाएर समूह के होला भनेर चासोका साथ हेरिन्छ ।

गगन छाडेर देउवातिर लागेको टिप्पणीबारे प्रस्टीकरण दिइरहेका शेखर

योबीचमा कोइराला र महामन्त्री थापाबीच अघिल्लो साता छलफल भयो । अघिपछिको छलफलभन्दा विशेष मानियो त्यो छलफल । किनकि दूरी बढेको आशंका गरिएका नेताबीचको छलफलले पार्टीको रणनीतिमा प्रभाव पार्न सक्थ्यो ।

केन्द्रीय समिति बैठकअघि समूहको बैठकको बोलावट हुनेमा महामन्त्री थापालगायतका नेताहरू ढुक्क थिए । तर, कोइरालाले बैठक राखेनन् । सो समयमा समूहका सांसदहरूको भने बैठक बसेको थियो । सो समयमा सांसदहरू कोइराला र थापाबीचको सम्बन्ध के हो भन्दै पर्खिएका थिए ।

आफ्नो समूहको भेलासमेत नगरेका शेखर काेइरालालाई संस्थापनको सद्भाव

संसदीय दलको बैठकमा संस्थापन पक्ष तयार नहुँदा पनि सुन तस्करी प्रकरणमा छानबिन समिति बनाउनुपर्ने बताएका थिए । 'प्रचण्डजीको निजी सचिवालयमा काम गर्ने अर्थ मन्त्रालयको व्यक्ति सात दिनपहिले राजस्व अनुसन्धानको डीजी भएर जानुहुन्छ । सुन समातिन्छ, त्यसपछिका घटनाहरू हेर्नुहोस्,’ उनले भनेका थिए, ‘सीआईबीलाई किन दिनुपर्‍यो, हामी नै सक्षम छौँ, छानबिन गर्न भन्नुभयो । त्यस कारण उच्चस्तरीय छानबिन समिति गठन हुन आवश्यक छ ।’

विवादास्पद छवि भएकालाई नियुक्ति दिँदा अपजस आउने र त्यसको भारी पार्टीले बोक्न नहुने उनको भनाइ थियो । सरकारले लुम्बिनी विकास कोषको उपाध्यक्षमा ल्हारक्याल लामालाई नियुक्त गरेको छ ।

‘अपजसको भारी बोक्न चाहँदैनौँ भने ल्हारक्याल लामाजस्ता व्यक्तिहरूलाई अस्वीकार गर्नुपर्छ भन्ने कुरामा दुई मत छैन,’ बैठकमा कोइरालाले भने, ‘म पनि चिन्छु, सँगै बसेर गफ हुन्छ । तर, यसरी नियुक्ति गर्दा पार्टी पनि जोडिएको छ । पार्टीको भविष्य र छविमा प्रश्न उठेको छ ।’

शेखर शेरबहादुरसँग मिले भने पनि विश्व-गगन अर्को धारमा छँदै छन्: डा. इन्द्र अधिकारी (अन्तर्वार्ता)

बैठकमा महामन्त्री थापाले सरकारले गरेका राम्रा नराम्रा कामको जस–अपजस कांग्रेसले पनि लिनुपर्ने बताए । ‘यो सरकार हाम्रो नेतृत्वको हो । हाम्रो प्रधानमन्त्री नभए पनि सरकारले गरेका राम्रा–नराम्रा कामको जस–अपजस हामीले पनि लिनुपर्छ,’ उनले भने । थापाले भ्रष्टाचारमा स्मरणमा भएका सबै काण्डहरूको फाइल खोल्नुपर्ने बताए ।

पछिल्लो समय शेखरले समूहको आवाज बोलेपछि सो शंका हटेको इतर समूहका नेता बताउँछन् । ‘बीचमा उहाँहरूबीच संवाद भयो । वातावरण सहज भयो होला । अहिले डा. सा'बले पनि समूहको आवाज बोल्नुभएको छ,’ इतर समूहका एक नेताले शिलापत्रसँग भने ।

के सन्देश दिइरहेका छन् शेखर कोइराला ?

नेताहरू कोइराला र थापाको कुरा मिल्दा सांसदहरू खुसी भए । महामन्त्री थापा भने कोइरालासँगको सम्बन्धमा परिवर्तन नभएको बताउँछन् ।

‘छलफल र भेटघाट भैरहन्छन् । एकै दलका नेताहरू भेट हुँदा अन्यथा मान्नुपर्ने ठाउँ छैन । पार्टीको कामलगायत विभिन्न कामहरूले नियमित रूपमा भेट गर्नुपर्ने हुन्छ । शेखर दाइ र म एकै प्यानलबाट १४औँ महाधिवेशनमा लड्यौँ । हामीहरूबीच सम्बन्धमा चिसोपन आएको होइन,’ महामन्त्री थापाले शिलापत्रसँग भने ।

कांग्रेसले कोशी, गण्डकी, लुम्बिनी र सुदूरपश्चिम गरी चारवटा प्रदेश सरकारको नेतृत्व गर्दा इतर पक्षलाई बेवास्ता गरिएको छ । बागमती प्रदेशमा मन्त्री पठाउन सभापति देउवाले महामन्त्री थापासँग नाम मागेका थिए । त्यो बेला थापाले भागवण्डा नगर्ने र पार्टी रूपान्तरणका लागि कार्यकर्तामाझ पुग्ने मनसाय बनाएकाले मन्त्रीको नाम पठाएका थिएनन् ।

आफ्ना कुरा सुनुवाइ नभएपछि ‘अब त अति भयो’ भनेका महामन्त्री थापा साना कुरामा नअल्झिएर देश दौडाहामा निस्कने तयारीमा थिए । एक अभियान लिएर जनताकहाँ जाने तयारीमा उनी छन् ।

शेखर र गगन टाढिएका हुन् ?

केन्द्र र प्रदेशहरूमा मन्त्री छान्दा सभापति देउवाले इतर समूहलाई चित्त बुझाउन सकेनन् । किस्ताकिस्तामा मन्त्री पठाएर देउवाले इतर समूहलाई साइजमा राखे । केन्द्र सरकारमा ९ मन्त्री पाउँदा इतर समूहले ३ मन्त्री पायो ।

पार्टीका सातवटा प्रमुख भ्रातृ संस्थामा तदर्थ समिति बनाउँदा पनि इतर समूहलाई एउटा कुरा भनेर अर्को निर्णय आएको छ । नेविसंघको तदर्थ समितिमा ५५० सदस्य बनाउँदा ४० प्रतिशत हिस्साको नामावली पठाउँदा केही नाम काटिएर आएको गुनासो इतर समूहमा छ ।

सभापति बन्न समूह टिकाउने र संस्थापन रिझाउने शेखरको रणनीति

चुनावी अन्तर्घातको समीक्षा हुँदा आफूपक्षीय नेताहरूलाई पाखा लगाउन खोजिएको बुझाइ इतर समूहको छ । कारबाहीको सन्दर्भमा कांग्रेस केन्द्रीय अनुशासन समिति संयोजक आनन्द ढुंगाना भने प्रमाणका आधारमा कारबाही हुने बताउँछन् । ‘पार्टीको यो पक्ष, ऊ पक्ष भन्ने होइन । पार्टी अनुशासन उल्लंघन गर्नेमाथि कारबाही भएको छ, अनुशासनमा नबस्ने अरुमाथि पनि हुन्छ । उजुरीमा छानबिन चल्दै छ,’ उनले भने ।

इतर समूहका नेता सञ्जय गौतम कांग्रेस पार्टी एक हुनुपर्ने र इतर समूह पनि एक भए देश र जनताको हितमा हुने बताउँछन् । ‘पार्टी एक हुनुपर्छ । पार्टीभित्र पनि समूह हेर्ने हो भने अहिलेको संस्थापनइतर एक हुनुपर्छ । यो नै देश र जनताको हितमा छ,’ उनले भने ।

इतर समूहकी नेतृ प्रतिमा गौतम पनि इतर समूहमा कोइराला र महामन्त्री थापाबीच फरक मत नरहेको बताउँछिन् । ‘बीचमा समूहको बैठक भनेर नबोलाए पनि नेताहरूबीच छलफल भैरहन्छ । संस्थापनइतर समूहमा असमझदारी भन्ने कुरा छैन । कतिपय अवस्थामा असमझदारी पनि हुन सक्छ तर त्यो केही क्षणका लागि मात्र,’ उनले भनिन् ।

इतर समूहमा छलफल नहुँदा स‌‌स्थापन समूहले पेलेर गएकाले शेखर गगन एक भएकाे स‌ंस्थापन पक्षका नेताहरूकाे बुझाइ छ । ‘लड्नुपर्ने नेतृत्वसँग हो । हामीहामी लडेर के हुन्छ ? झन् हाम्रा मुद्दा कमजोर हुन्छन् । महिला संघको नेतृत्वले आफूखुसी गरेको छ । मन्त्री छनोट गर्दा त्यस्तै भयो । नेविसंघमा पनि हाम्रो समूहको ध्यान पुग्न सकेन । पेलेर संस्थापन अघि बढेको छ । यस्तो अवस्थामा इतर समूह झनै एक हुन आवश्यक छ । त्यसैले शेखर दाइ र गगनजी अब सल्लाहमा अघि बढ्नुहुन्छ,’ संस्थापनइतर समूहका एक नेताले शिलापत्रसँग भने ।

प्रकाशित मिति: मंगलबार, साउन ३०, २०८० २०:४८