गगन छाडेर देउवातिर लागेको टिप्पणीबारे प्रस्टीकरण दिइरहेका शेखर

A+ A A-

कांग्रेसको संस्थापनइतर समूहका नेता डा. शेखर कोइराला पछिल्लो समय आफूसँग जोडिएर आएका विषयहरूप्रति असन्तुष्टि जनाएका छन् ।

पार्टीमा मझधारको बाटो लिँदा आफ्नै समूहमा रहेका महामन्त्री गगन थापासँगको उनको सम्बन्ध चिसिएका समाचारहरू आएका थिए । बिहीबार प्रेस युनियन काठमाडौंको प्रमाणपत्र वितरण र पदस्थापनमा कोइरालाले यसबारेका समाचारहरूप्रति असन्तुष्टि जनाएका हुन् ।

आफू सभापति शेरबहादुर देउवासँग मिलेको भनेर समाचारहरू आइरहेको उल्लेख गर्दै कोइरालाले कुन विषयमा देउवासँग मिलेको हो, त्यसको भेउ आफैँले नपाएको टिप्पणी गरे ।

साउन २ देखि १० सम्म भएको कांग्रेस केन्द्रीय समिति बैठकमा कोइरालाले लिखित धारणा राखेका थिए । नक्कली भुटानी शरणार्थी प्रकरणमा पुर्पक्षमा रहेका नेता बालकृष्ण खाँणलाई पार्टी भूमिकाबाट अलग गर्ने/नगर्ने विषयमा तल्लो तहदेखि बहस भइरहेको थियो । उनले पनि नक्कली भुटानी शरणार्थी प्रकरणमा नेताहरूको नाम जोडिँदा पार्टीको गरिमामा आँच आएको बताएका थिए ।

केन्द्रीय समितिमा कोइरालाले भ्रष्टाचर र भ्रष्टाचारीलाई कांग्रेसले संरक्षण गर्दैन भन्ने विश्वास दिनुपर्ने बताएका थिए । ‘कांग्रेसले सुशासनको नारा दिने मात्रै होइन, भ्रष्टाचार र भ्रष्टाचारीलाई संरक्षण किमार्थ गर्दैन भन्ने विश्वासको वातावरण निर्माण नगरी जनताको घरदैलोमा भोट माग्न जान अब सम्भव छैन,’ केन्द्रीय समिति बैठकमा कोइरालाले भनेका थिए ।

केन्द्रीय समितिमा १५ बुँदे लिखित धारणा राखेका कोइरालामाथि इतर समूहको नेताको रूपमा प्रस्तुत हुन नसकेको आरोप छ । बिहीबार उनले त्यही विषयमा प्रस्टीकरण दिने मौकाका रूपमा उपयोग गरे । बिहीबार कोइरालाले आफ्नो १५ बुँदे धारणाको गहन अध्ययन गरेर आलोचना गर्न सुझाए ।

‘मैले केन्द्रीय समितिमा १५ बुँदा राखेको छु । म अनुरोध गर्दछु कि त्यो एक–एक अक्षर तपाईंहरूले पढिदिनुस् । म प्रतिक्रिया र लेखहरू हेर्दै छु, पढ्दै छु । उहाँहरूले राम्ररी पढेर लेखेको जस्तो मलाई लागेको छैन, त्यो पढेर आलोचनात्मक लेखिदिनुस्,’ कोइरालाले भने ।

बैठक आरोप-प्रत्यारोप र कुण्ठा पोख्ने थलो मात्रै बन्यो, यो राम्रो होइन

कांग्रेसको १४औँ महाधिवेशनमा कोइरालाले देउवालाई टक्कर दिएका थिए । तर, पछिल्लो समय उनीमाथि देउवासँग मिलेको टिप्पणी छ । केन्द्रीय समिति बैठकअघि संस्थापनइतर समूहले आन्तरिक छलफल गर्थ्यो । तर, यसपटक कोइरालाले छुट्टै छलफल गर्ने जाँगर देखाएनन् । जसले उनीमाथिको टिप्पणीलाई थप बल पुगेको थियो ।

‘मैले के देखिराखेको छु भने, नेपाली कांग्रेसको आन्तरिक द्वन्द्व र समूहभित्रका द्वन्द्व तपाईंहरूले आफैँ बनाउने, सोच्ने र लेख्ने गरिरहनुभएको छ । लाग्छ कि कांग्रेसको महाधिवेशन आइसक्यो,’ उनले भने, ‘तर अधिवेशन आउन कम्तीमा पनि साढे २ वर्ष बाँकी छ । शेखर कोइराला त सभापतिसँग मिल्यो भनेर तपाईंहरूले लेखिरहनुभएको छ ।’

अनि उनले प्रश्न पनि गरे । सभापतिसँग आफू केमा मिलेको भन्ने उनको प्रश्न छ । 'शेरबहादुर देउवासँग केमा मिल्यो ? मैले आजसम्म पनि बुझ्न सकेको छैन । तपाईंहरू (पत्रकार) लेखिरहनुभएको छ यो देउवासँग मिल्यो भनेर, किन लेख्या मैले बुझेको छैन,’ उनले भने ।

कोइराला परिवारबाट संस्कार सिकेको बताएका उनले सभापतिले बोलाउँदा जाने गरेको प्रस्टीकरण दिए ।

‘म तपाईंहरूलाई सोध्दै छु– कांग्रेस सभापति प्रेस युनियनको पनि हो कि होइन, शुभेच्छुक हिसाबले ? तपाईंहरूलाई सभापतिले बोलाउनुभयो भने जाने कि नजाने ? तपाईंहरू जानुभएन भने युनियन शुभेच्छुक संस्था होइन भनेर हामीले भन्नुपर्छ । मेरो बानी नै छैन कसैले नबोलाईकन जाने । मिल्ने भनेको केमा मिल्ने ? एजेन्डामा हो,’ उनले भने, ‘मलाई मेरो परिवारले केही संस्कार दिएको छ गाली नगर भनेको छ । गाली सुन, खाऊ, पचाऊ तर गाली नगर भनेको छ । चित्त नबुझे नबोल भनेर भन्नुभएको छ । यो कुरालाई पनि हामीले लिने कि नलिने, आफ्नो स्वभाव र सोचाइ हुन्छ ।’

भुटानी शरणार्थी मुद्दामा नेताहरूको नाम जोडिँदा पार्टीको गरिमामा आँच पुग्योः शेखर कोइराला

'केन्द्रीय समितिमा अरुको प्रतिरक्षा गर्न आएको होइन'

केन्द्रीय समितिमा आफूलाई कतिपयले महामन्त्री गगन थापाको रक्षा नगरेको भनेर गुनासो गर्ने गरेको पनि कोइरालाले बताए । तर, आफू कसैको प्रतिरक्षा गर्न केन्द्रीय समितिमा नगएको तर्क दिए ।

‘कतिले मलाई भन्नुभयो- तपाईंले महामन्त्री (गगन थापा) को रक्षा गर्नुभएन भनेर । केही केन्द्रीय सदस्य, संघीय र प्रदेशका सांसदले भन्नुभएको छ । मैले भने केन्द्रीय समितिमा कसैलाई पनि प्रतिरक्षा गर्न म आएको होइन,’ उनले भने ।

अनि, आफू सुशील कोइरालाको समूहबाट केन्द्रीय सदस्य निर्वाचित भए पनि समूहको कुरा अस्वीकार गरेको प्रसंग सम्झिए । ‘सुशील कोइराला सभापति हुँदा शेरबहादुर देउवा र रामचन्द्र पौडेलका अघि मैले भनेको थिएँ- सुशील’दा म तपाईंकै प्यानलबाट जितेको, तर आज म तपाईंले भनेको मान्दिनँ । उहाँले भ्रातृ संस्थाहरूलाई विघटन गरिदिनुभएको थियो । त्यो मैले स्वीकार गरिनँ,’ उनले भने ।

केन्द्रीय समितिमा आफ्नो बुद्धि विवेक लगाउने बताएका कोइरालाले समूहले जे भन्छ, त्यही भन्ने भए एक जनाले बोले पनि हुने तर्क गरे ।

शेखर शेरबहादुरसँग मिले भने पनि विश्व-गगन अर्को धारमा छँदै छन्: डा. इन्द्र अधिकारी (अन्तर्वार्ता)

शेखर गगनबीच मतभिन्नता छैन

इतर समूहमा कोइराला र महामन्त्री थापाबीच मतभिन्नता नभएको उनले बताए । ‘हामीहरूका बीच (शेखर–गगन थापा) केही मतभिन्नता छैन, एजेन्डामा मतभिन्नता छैन,' कोइरालाले भने ।

पछिल्लोपटक देउवासँग आफ्नो भेट बाक्लिँदै गएको भनेर आएका समाचारहरूबारे पनि उनले प्रस्टीकरण दिए । ‘पहिले शेखर सभापति देउवालाई भेट्न जाँदैनथ्यो भन्ने पनि लेख्नुभएको छ,' उनले भने, 'पहिले शेरबहादुरजीले बोलाउनुहुन्नथ्यो त म जाने कसरी ? बोलाएपछि न जाने हो भेट्न, यो कुरा बुझिदिनुपर्‍यो,’ उनले भने ।

शेखर र गगन टाढिएका हुन् ?

कोइरालाले संस्थापन र संस्थापन इतर समूहमा फाटो ल्याउने समूह रहेको विश्लेषण सुनाए । र, त्यसलाई आफूले स्वाभाविक रूपमा लिएको अर्थ्याए ।

‘फाटो ल्याउने एउटा समूह हुन्छ, स्वाभाविक पनि हो त्यो । जहाँ पनि हुन्छ नै । अधिवेशन भयो, शेरबहादुरजी जित्नुभयो म हारेँ । त्यही दिनदेखि शेरबहादुरजी र हाम्रोतिर पनि त्यस्तो ग्रुप हुन्छ, स्वाभाविक हो,’ उनले भने, ‘त्यसलाई लेखेर पुष्टि गर्न खोजिरहनुभएको छ भने त्यतातिर नजानुस्, हामीबीच कुनै मतभिन्नता छैन । हामीले कांग्रेसलाई कसरी मजबुत बनाउने भन्ने सोच्ने हो ।’

१४औँ महाधिवेशनमा आफ्नो समूहले पाएको भोट बढाउनुपर्ने उनको भनाइ छ । ‘१४औँ महाधिवेशनमा ४० प्रतिशत भोट हाम्रो समूहले पाएको थियो । त्यसलाई ६० देखि ७० प्रतिशत कसरी बनाउने पो सोच्नुपर्‍यो, कसैलाई गाली गरेर त हुँदैन,’ कोइरालाले भने । देउवाका गलत कामहरूलाई गलत नै भनेको उनले बताए ।

आफ्नो समूहको भेलासमेत नगरेका शेखर काेइरालालाई संस्थापनको सद्भाव

ट्वीटको प्रस्टीकरण

असार २१ मा कोशी प्रदेशमा कांग्रेसका प्रदेशसभा संसदीय दलका नेता उद्धव थापालाई मुख्यमन्त्री बनाउनका लागि बहुमत जुटाउन सभामुख बाबुराम गौतमको समेत हस्ताक्षर जोडिएको थियो । सरकार बनाउन गठबन्धनले हद पार गरेको भन्दै त्यसको विरोध भयो । यसबारे कोइराले पनि असन्तुष्टि जनाएका थिए ।

‘सभामुख आफैँले हस्ताक्षर गरेर सरकार गठनमा समर्थन रहेको कुरा लिखित रूपमा पेस गरेको अवस्था हो भने यस्तो कार्य संवैधानिक सर्वोच्चता र लोकतान्त्रिक संसदीय पद्दतिको सिद्धान्तविपरीत हुन जान्छ,’ कोइरालाले सामाजिक सञ्जालमा लेखेका थिए ।

यसबारे प्रस्टीकरण दिँदै कोइरालाले पार्टीको हितमा ट्वीट गरेको तर्क गरे । ‘मैले भनेको छु, तर तपाईंहरू लेखिदिनुहुन्न । मैले सभापति देउवालाई सोधेर कोशी प्रदेशको कुरा ट्वीट गरेको हुँ । कोशीमा सभामुखले सरकार बनाउन समर्थन गरेपछि मैले सभापति देउवालाई भनेको हुँ गलत भयो भनेर,’ उनले भने ।

देउवासँग सल्लाह गरेरै ट्वीट गरेको उनको भनाइ छ । ‘सभापति देउवाले कोशीबारे छलफल गर्न बोलाउनुभएको थियो । त्यसबेला मैले मेरै समूहका अरूले के गर्छन् थाहा छैन, मचाहिँ तपाईंहरूले गलत गर्नुभयो भनेर ट्वीट गर्छु भनेर गरेँ । कोही रिसाउनुभयो, कोही खुसाउनुभयो होला । मैले सभापतिलाई त्यस दिन बैठकबाट उठ्ने बेला भनेको थिएँ, पार्टीका लागि यो ट्वीट गरेको हुँ,’ कोइरालाले भने ।

ग्रुपको सांसद होइन

उनले आफू ग्रुपको मात्र सांसद नरहेको बताए । ‘सरकारमा जाने एउटा कुरा हो । नेपाली कांग्रेस लोकतान्त्रिक पार्टी हो भन्ने कुरा त दर्शाउनुपर्‍यो नि,’ उनले भने, ‘अर्को कुरा, मन्त्री पठाउनेबारे पनि छ । मैले मन्त्री पठाउने होइन । म त कांग्रेस सांसद हो, कुनै ग्रुपको सांसद होइन । यो कुरा बुझ्नुपर्‍यो । तर, कुनै विषयमा विवाद हुन्छ भने सुल्झाउने क्षमता पार्टीभित्र छँदै छ ।’