छानबिन समिति बनाएर संसद खुलाउनुपर्ने पक्षमा उभिए कांग्रेस सांसद

A+ A A-

संसदमा देखिएको गतिरोध अन्त्य गर्न पार्टीले पहल लिनुपर्नेमा कांग्रेसका सांसदहरूले जोड दिएका छन् । संसदीय दलको बैठकमा उनीहरूले प्रमुख प्रतिपक्षी एमालेको मागबमोजिम छानबिन समिति बनाउन सकिने बताएका छन् ।

सांसद प्रदीप पौडेलले लगातार संसद अवरुद्ध हुँदा जनताका कुरा सदनमा राख्न नपाइएको बताए । ‘सुन प्रकरणमा छानबिन समिति बनाउने र छानबिन समिति बन्न नदिनेबीच जुँगाको लडाइँ हुनुहुँदैन,’ उनले भने, ‘सुन प्रकरण छानबिन गर्न सत्ता र प्रतिपक्ष तयार छन् तर कसरी गर्नेमा कुरा मिलेको छैन ।’

गृहमन्त्री नारायणकाजी श्रेष्ठले सीआईबीले सुन प्रकरण छानबिन गर्ने भने पनि प्रतिपक्षी एमाले विश्वस्त नभएको उनको भनाइ छ ।

‘सुन प्रकरण छानबिन गर्न संसदीय छानबिन समिति बनाउने हो भने अधिकार क्षेत्रभित्र पर्ने समितिले यो काम गर्न सक्छन् । प्रधानमन्त्री र गृहमन्त्रीलाई पनि समितिमा बोलाएर सोध्न सक्छन् तर यो कुरा सीआईबीले सक्दैन,’ उनले भने ।

सांसद अर्जुननरसिंह केसीले सुन प्रकरण छानबिन गर्न सर्वोच्चका पूर्वप्रधान्यायाधीश वा न्यायाधीशकाे संयोजकत्वमा न्यायिक समिति गठन गर्न सकिने पनि बताएका छन् ।

सांसद रामहरि खतिवडाले प्रमुख प्रतिपक्षी एमालेले संसदलाई अनिर्णयको बन्दी बनाएको बताए । ‘कति धेरै विषयमा संसदमा छलफल गर्नुपर्नेछ, तर एमालेले अनिर्णयको बन्दी बनाएको छ,’ उनले भने, ‘संसद त चल्नुपर्‍यो नि ।’

उनले राज्यका संयन्त्रहरू सीआईबी, राजस्व अनुसन्धान, संसद र अदालतलाई अविश्वास गरेर कसलाई विश्वास गर्ने भन्ने पनि प्रश्न गरेका छन् ।

सांसद रामनाथ अधिकारीले बजेटबारे बोल्न नपाएको गुनासो गरे । ‘लगनपछिको पोतेजस्तो भयो बजेटबारे बोल्नै पाइएन,’ उनले भने ।