हतियार उत्पादनमा किन जोड दिँदैछ उत्तर कोरिया ?

A+ A A-

उत्तर कोरियाका सर्वोच्च नेता किम जोङ उनले गतहप्ता देशको मिसाइल इन्जिन र हतियार बनाउने कारखानाहरूको अवलोकन गरे । ती कारखानामध्ये केही यस्ता कारखाना थिए जहाँ संयुक्त राष्ट्रसंघले प्रतिबन्ध लगाएको क्रूज क्षेप्यास्त्र र ड्रोनजस्ता हवाई आक्रमण गर्ने हतियार बनाइन्छन् ।

सो क्रममा किम आफैँले कारखानामा पुगेर फरक–फरक किसिमका बन्दुक चलाएर पनि परीक्षण गरेका छन् । उत्तर कोरियाको सरकारी समाचार संस्था केसीएनएलाई उदृत गर्दै रोयटर्सले यस विषयमा भनेको छ, ‘किमले देशको सुरक्षाका लागि गोला बारुद र हतियारको उत्पादन बढाउन जोड दिएका छन् । हतियार आधुनिकिकरण किमको प्राथमिकता हो ।’

शक्तिशाली हतियारको क्षेत्रमा उत्तर कोरियाले क्रान्ति ल्याउनुपर्नेमा किमको जोड छ । किमले बन्दुक चलाएको तस्वीरहरू पनि सार्वजनिक भएका छन् । त्यसो त यसअघि पनि किमले पेस्तोल हानेको भिडियो सार्वजनिक भएको थियो । उनले बन्दुक पक्रिएका फोटोहरू पनि अनगिन्ती भेटिन्छन् ।

अमेरिका र दक्षिण कोरियाले लगातार उत्तर कोरियाको सीमा क्षेत्रनजिक सैन्य अभ्यास गरिरहेका छन् । जसकारण प्योङयाङले पछिल्लो समय अमेरिका र दक्षिण कोरियालाई आफ्नो प्रमुख खतरा भनेको छ ।

अमेरिकाले हालैमात्र परमाणु क्षमताको पनडुब्बी दक्षिण कोरियाली जलक्षेत्रमा तैनाथ गरिसकेको छ । उक्त पनडुब्बी समुद्रमुनि नै उत्तर कोरियासम्म पुग्नसक्छ जसकारण उत्तर कोरिया झस्किएको छ ।

जवाफमा उत्तर कोरियाले पनि आफूसँग परमाणु हतियार क्षमताको क्षेप्यास्त्र भएको जानकारी दिन गत महिनाको जुलाई २७ मा ह्वासाङ अन्तरमहादेशीय क्षेप्यास्त्र प्रदर्शन गरेको थियो । उत्तर कोरियाको विजयी दिवसमा प्रदर्शन गरिएको उक्त क्षेप्यास्त्रले अमेरिकासम्मै पुगेर आक्रमण गर्न सक्छ ।

यसबीचमा उत्तर कोरियाली सर्वोच्च नेता आफैँ हतियार बनाउने कारखाना पुगेका हुन् । उनले शक्तिशाली हतियारहरू बनाउन निर्देशन दिएका हुन् ।

प्रकाशित मिति: सोमबार, साउन २२, २०८० १३:२८