लुम्बिनी: चौधरी मुख्यमन्त्री भएको सय दिन पुग्दा पनि सरकारले पाएन पूर्णता

A+ A A-

लुम्बिनी प्रदेश सरकारले एक सय दिन पूरा हुँदा पनि पूर्णता पाउन सकेको छैन । कांग्रेस संसदीय दलका नेता डिल्लीबहादुर चौधरी मुख्यमन्त्री भएको सय दिन पूरा हुँदा पनि सरकारले पूर्णता पाउन सकेको छैन ।

चौधरी १४ वैशाख बैशाखमा मुख्यमन्त्रीमा नियुक्त भएका थिए । सरकारमा सहभागी दलहरूबीच भागवण्डा मिलाउन नसक्दा मुख्यमन्त्री भएको एक सय दिन पूरा हुँदा पनि चौधरीले मन्त्रिपरिषद्लाई पूर्णता दिन असफल भएका छन् ।

यसअघिको सरकारले १७ सदस्यीय मन्त्रिपरिषद्लाई घटाएर १० मा सीमित बनाएको थियो । तर, मुख्यमन्त्री चौधरीले भागवण्डा मिलाउन मन्त्रालयको संख्या बढाउने तयारी गरेका छन् । ८ दलको गठबन्धनबाट मुख्यमन्त्री भएका चौधरी नेतृत्वको मन्त्रिपरिषद् अहिले सात सदस्यीय छ ।

अब कांग्रेसबाट ३ र माओवादीबाट २ जना मन्त्री थप गर्ने तयारीमा मुख्यमन्त्री चौधरी छन् । कांग्रेसकै एक सांसदका अनुसार मन्त्रिपरिषद्लाई १२ सदस्यीय बनाउन गृहकार्य भइरहेको छ । पूर्वसहमति अनुसार माओवादीले तीन मन्त्रालय पाउनुपर्ने अडान राख्दै आएको छ । सरकारमा सहभागी हुँदा कांग्रेसले चार र माओवादीले तीन मन्त्रालय पाउने पूर्वसहमति थियो । प्रदेशमा अहिले तीन मन्त्रालय मन्त्रीविहीन छन् ।

खाली रहेका खानेपानी, ग्रामीण तथा शहरी विकास मन्त्रालय, वन तथा वातावरण मन्त्रालय र उद्योग, पर्यटन तथा यातायात व्यवस्था मन्त्रालयको जिम्मेवारी मुख्यमन्त्री चौधरी आफैँले सम्हाल्दै आएका छन् । कांग्रेसले मुख्यमन्त्री र स्वास्थ्य मन्त्रालय, माओवादीले अर्थ, लोसपाले गृह, नागरिक उन्मुक्ति पार्टीले भौतिक पूर्वाधार, जसपाले कृषि तथा भूमि सुधार र जनमत पार्टीले सामाजिक विकास मन्त्रालय पाएका छन् ।

सरकारलाई समर्थन गरेका नेकपा एस र जनमोर्चालाई भागवण्डा पुगेको छैन । उनीहरूलाई संसदीय समितिमा जिम्मेवारी दिने गरी पनि छलफल भएको छ । ६ वटा संसदीय समितिको नेतृत्वका लागि सत्तारुढ दलहरूबीच समझदारी भएको छ । प्रमुख प्रतिपक्षी दल एमालेले दुई, कांग्रेसले तीन र माओवादी तथा साना दलबाट सहभागिता गराउने अनौपचारिक समझदारी बनेको छ ।

गृहमन्त्री तथा सरकारका प्रवक्ता सन्तोषकुमार पाण्डेले साउन महिनाभित्रै सरकारले पूर्णता पाउने दाबी गरे । अब कांग्रेसबाट तीन र माओवादी केन्द्रबाट दुई जना मन्त्री थपिने उनले बताए । छिट्टै मन्त्रालय विभाजन गरेर सरकारलाई पूर्णता दिने मुख्यमन्त्री चौधरीले तयारी गरिरहेको प्रवक्ता पाण्डेले बताए ।

कांग्रेसलाई मन्त्रीको नाम टुंग्याउन सकस

कांग्रेसबाट तीन जना मन्त्री थपिने पक्का छ । तर, कांग्रेसले मन्त्रीको नाम टुंगो लगाउन सकेको छैन । माओवादी केन्द्रले बाँकेकी कृष्णा केसी नमुना र रोल्पाका दिपेन्द्र पुन सिजलको नाम मन्त्रीका लागि सिफारिस गरिसकेको छ ।

तर, कांग्रेसभित्र मन्त्रीका लागि आकांक्षी धेरै भएकाले मिलाउन मुख्यमन्त्री चौधरीलाई सकस भएको छ । कांग्रेसबाट मन्त्रीका लागि पाल्पाका वीरबहादुर राना, नवलपरासीका विश्वप्रेम पाठक र बैजनाथ कलवार, बाँकेका बादशाह कुर्मी, बर्दियाका भुवनेश्वर चौधरी, गुल्मीका धनेन्द्र कार्कीलगायतले लविङ गरिरहेका छन् ।

कलवार, कुर्मी र कार्की सभापति शेरबहादुर देउवानिकट हुन् भने राना, पाठक र चौधरी डा. शेखर कोइराला समूहका हुन् । संस्थापन पक्षबाट कुर्मी र कार्की तथा कोइराला समूहबाट पाठक मन्त्री बन्ने सम्भावना बलियो छ ।

१०० दिने उपलब्धि सार्वजनिक गरिँदै

मुख्यमन्त्री चौधरीले सरकारका १०० दिनको कामको उपलब्धि सार्वजनिक गर्ने तयारी गरेका छन् । त्यसका लागि आइतबार दिउँसो ३ बजे मुख्यमन्त्री तथा मन्त्रिपरिषद्‍को कार्यालय राप्ती उपत्यका (देउखुरी) को सभाहलमा पत्रकार सम्मेलनको आयोजना गरिएको छ ।

प्रकाशित मिति: आइतबार, साउन २१, २०८० १२:२९