तातोपानी नाका दुईतर्फी सञ्चालनमा आयो, निर्यातका लागि सहजता हुँदै

A+ A A-

नेपाल-चीन व्यापारिक तातोपानी नाका आठ वर्षपछि दुईतर्फी रूपमा सञ्चालनमा आएको छ ।

आठ वर्षदेखि पूर्ण रूपमा सञ्चालनमा आउन नसकेको चीन जोड्ने तातोपानी नाका सोमबारदेखि दुईतर्फी आयात निर्यात खुला भएको हो । भूकम्पको बहानामा चीनले तातोपानी नाका दुवैतर्फ सञ्चालनमा अवरोध गरिरहेको थियो । भूकम्पपछि तातोपानी नाका करिब चार वर्ष पूर्ण रूपमा ठप्प थियो । सोमबारदेखि आयात निर्यात दुवैतर्फ सञ्चालनमा आएपनि मानव आवतजावत प्रतिबन्ध नै रहेको छ ।

तातोपानी भन्सार कार्यालयका प्रमुख दयानन्द केसीले मानव आवतजावत तत्काल खोल्ने सम्भावना नभएको भन्दै खोल्ने विषयमा छलफल भइरहेको बताए । उनले सोमबार तोतोपानी नाका दुईतर्फ सञ्चालनमा आएसँगै नेपालबाट तीन ट्रक मुडा र म्याट्रेस चीनतर्फ निर्यात भएको बताए । उनले सोमबार करिब ३७ लाख मूल्यबराबरको सामान निर्यात भएको बताए । उनले तातोपानी नाकादेखि काठमाडौंसम्म सडक मार्ग निर्माणका सरकारले प्राथमिकतामा राखेको बताए ।

त्यस्तै, नेपाल ट्रक ढुवानी सेवाका अध्यक्ष अर्जुनबहादुर सापकोटाले तातोपानी नाका ८ वर्ष १६ दिनमा सञ्चालनमा आउँदा खुसी लागेको बताए । उनले तातोपानी नाका अब पूर्ण रूपमा सञ्चालनमा आउने आशावादी भएको बताए । उनले सरकारले नेपाली सामान निर्यातका लागि कूटनीतिक पहल गर्न आवश्यक रहेको बताए ।

व्यवसायी विजय शेर्पाले तीन ट्रक मुडा र म्याट्रेस चीनले तामझाम गरेर लगेको बताए । उनले भन्सार नाका दुईतर्फ सञ्चालनमा आएसँगै निर्यात बढ्ने आशा रहेको बताए । उनले योभन्दा पहिला बिस्कुट, सलाई, मैदा, कस्मेटिक सामानजस्ता सामानहरूको माग भइरहेको बताए ।

त्यस्तै, अर्का निर्यात व्यवसायी अनिरुद्र थापाले लामो समयपछि तातोपानी भन्सार नाका दुईतर्फ खुला भएसँगै निरन्तर रूपमा पूर्ण सञ्चालनमा आउने अपेक्षा गरेको बताए । उनले नाकाको दुवैतर्फका संरचना राम्रो बनेको भन्दै दुवैतर्फका सवारी साधन सञ्चालनमा समेत सहजता रहेको बताए ।

गत महिना नेपाली र चिनियाँ अधिकारीबीच ह्लासामा भएको बैठकपछि नाका भूकम्पअघिकै अवस्थामा सञ्चालन गर्ने सहमति भएअनुसार सोमबारदेखि नेपाल र चीन दुवैतर्फबाट आयात निर्यात खुला भएको हो । भूकम्पको बहानामा चीनले प्रमुख दुई नाका तातोपानी र रसुवागढीमा समय समयमा अवरोध हुँदा करोडौँ लगानीमा आयात गरिएका सामान बाटोमा अलपत्र हुँदा साना र मझौला व्यापारीहरूलाई ठूलो समस्या पर्ने गरेको थियो । नाका दुवैतर्फ सञ्चालनमा आएसँगै नेपाल-चीन आयात र निर्यातमा सहजीकरण हुने भएको छ ।

प्रकाशित मिति: मंगलबार, वैशाख १९, २०८० १३:१४