उत्तर कोरियाली सर्वोच्च नेता किमको शासन समाप्त गरिदिने अमेरिकी चेतावनी

A+ A A-

अमेरिकी राष्ट्रपति जो बाइडेनले उत्तर कोरियाका सर्वोच्च नेता किम जोङ उनको शासन समाप्त गरिदिने चेतावनी दिएका छन् ।

आणविक हतियारले अमेरिका र आफ्ना सहयोगीलाई उत्तर कोरियाले आक्रमण गरेको खण्डमा किमको शासन समाप्त गर्न आफू र आफ्ना सहयोगी लागि पर्ने बाइडेनको भनाइ छ ।

दक्षिण कोरियाका राष्ट्रपति युन सुक योल हाल अमेरिकाको भ्रमणमा छन् । उनी र बाइडेनबीच महत्वपूर्ण परमाणुअस्त्रसम्बन्धी सम्झौतामा पनि हस्ताक्षर भएको छ । सम्झौताअनुसार अमेरिकी आणविक क्षमताको पनडुब्बी दक्षिण कोरियामा तैनाथ हुनेछ । पछिल्लो सम्झौता उत्तर कोरियाली आक्रमणको सामना गर्न अमेरिकाले दक्षिण कोरियालाई गरिरहेको सहयोग मध्येमै पर्छ ।

योलसँगको छलफलपछि संयुक्त पत्रकार सम्मेलनमा बाइडेनले उत्तर कोरियाको आणविक हमला किम जोङ उनका लागि विनाशकारी सावित हुने बताए । दक्षिण कोरियाका राष्ट्रपति योलले पनि यस विषयमा भनेका छन्, ‘उत्तर कोरियाबाट परमाणु हमला भएको खण्डमा हामी अमेरिकी आणविक हतियारहरूसहित गठबन्धनको पूर्ण शक्ति प्रयोग गरेर द्रुत, अत्यधिक र निर्णायक रूपमा प्रतिक्रिया दिन सहमत भएका छौं ।’

उत्तर कोरियाले आणविक क्षमताका क्षेप्यास्त्र, ड्रोन लगायतका हतियार परीक्षणलाई तीव्रता दिइरहँदा यो अमेरिका पुगेका हुन् ।

उत्तरले पछिल्ला दिनहरुमा ह्वासाङ नामक आणविक क्षमताको अन्तरमहादेशीय क्षेप्यास्त्रको सफल परीक्षण गरिसकेको छ, जसले अमेरिकासम्मै पुगेर मार हान्नसक्छ । अमेरिकी आक्रामकतालाई सन्तुलनमा राख्न पनि आफूले आणविक हतियारको विकास गरिरहेको सर्वोच्च नेता किम जोङ उन बताउँछन् ।

गत महिना अमेरिका र दक्षिण कोरियाले १० दिने युद्ध अभ्यास गरेपछि त उत्तर कोरियाले आफ्ना सेनालाई हरेक समय युद्धका लागि तयार हुन निर्देशन दिएका छन् ।

उत्तर कोरियाका सेनाहरुले अहिले अमेरिकी जहाजहरु ध्वस्त बनाउने परीक्षण पनि गरिरहेका छन् । दक्षिण कोरिया र अमेरिकी संयुक्त युद्ध अभ्यास उत्तर कोरियामाथिको आक्रमणको नक्कल भएको प्योङयाङको अनुमान छ । सीएनएन र एनडीटीभीको सहयोगमा

प्रकाशित मिति: बिहीबार, वैशाख १४, २०८० १४:३५