अमेरिकासहित तीन राष्ट्र आफूविरुद्ध एक भएपछि किमद्वारा आणविक क्षमताको ड्रोन परीक्षण

अमेरिकासहित तीन राष्ट्र आफूविरुद्ध एक भएपछि किमद्वारा आणविक क्षमताको ड्रोन परीक्षण

A+ A A-

अमेरिका, दक्षिण कोरिया र जापानले साइबर आक्रमण साथै परमाणु युद्ध निम्त्याउने कारक तत्व भनेपछि उत्तर कोरियाले शक्तिशाली ड्रोन हतियार परीक्षण गरेको छ ।

गत हप्ता तीन राष्ट्रका आणविक हतियारसम्बन्धी दूतहरूले भेटघाट गरेर उत्तर कोरियाबाट आणविक हमलासँगै साइबर आक्रमणको खतरा बढेको आरोप लगाएका थिए ।

शनिबार उत्तर कोरियाले आणविक क्षमताको हेइल-२ ड्रोन परीक्षण गरेको उत्तर कोरियाको सरकारी टेलिभिजन केआरटीले जनाएको छ । यो रणनीतिक हतियारले हेइल-१ ड्रोनजस्तै पानीमुनि दुश्मनलाई खोजीखोजी आक्रमण गर्नसक्छ ।

यो ड्रोन अप्रिल ४ मा पानीमुनि छाडिएको थियो । सो क्रममा यस ड्रोनले पानीमुनि ७१ घण्टा ६ मिनेटको समयमा हजार किलोमिटरको दूरी पार गर्दै लक्षित बिन्दुमा मार हानेको थियो । यसअघि हालै उत्तर कोरियाले हेइल-१ आणविक क्षमताको ड्रोन परीक्षण गरेको थियो । यस ड्रोनले जलक्षेत्रको ‘रेडियोएक्टिभ सुनामी’ पत्ता लगाउँछ, जसले त्यहाँ पनडुब्बीलगायतका समुद्रमुनिका दुश्मन पत्ता लगाउन मद्दत पुग्छ ।

हालको हेइल २ र सुरुको हेइल १ ड्रोन दुवै हतियारलाई रणनीतिक हतियारका रूपमा पनि लिन सकिन्छ । किनभने यी ड्रोनले दुश्मनको स्थान र अवस्थालाई पत्ता लगाउन सहयोग गर्छ । यो ड्रोनलाई ट्यांक तथा युद्धपोतबाट पनि लक्षित स्थानमा आक्रमण गर्न सकिने बताइएको छ । गत महिना अमेरिका र दक्षिण कोरियाले १० दिनसम्म हवाई, जल तथा थलमा संयुक्त युद्ध अभ्यास गरेपछि उत्तर कोरियाले लगातार आणविक क्षमताको क्षेप्यास्त्र र ड्रोन परीक्षण गरिरहेको अवस्था छ ।

उत्तर कोरियाले केही समय अगाडि मात्र ह्वासाङ-१७ अन्तरमहादेशीय क्षेप्यास्त्र परीक्षण गरेको थियो । सो क्षेप्यास्त्रले अमेरिकासम्मै पुगेर मार हान्नसक्छ । अमेरिकी आक्रामकतालाई सन्तुलनमा राख्न पनि आफूले आणविक हतियारको विकास गरिरहेको त्यहाँको सर्वोच्च नेता किम जोङ उन बताउँछन् । रोयटर्सको सहयोगमा

प्रकाशित मिति: आइतबार, चैत २६, २०७९ १२:४३