निर्मला पन्त हत्या अनुसन्धानमा डीएनए परीक्षणका लागि लिइयो भारतीय नागरिकको स्याम्पल

निर्मला पन्त हत्या अनुसन्धानमा डीएनए परीक्षणका लागि लिइयो भारतीय नागरिकको स्याम्पल

A+ A A-

कञ्चनपुरकी १३ वर्षीया बालिका निर्मला पन्तको बलात्कारपछि हत्या प्रकरणको अनुसन्धानमा प्रहरी फेरि सक्रिय भएको छ । उच्च प्रहरी स्रोतका अनुसार मंलगबार प्रहरीले निर्मलाको भेजाइनल स्वाबसँग डीएनए परीक्षण गर्न थप एक जनाको स्याम्पल लिएको छ ।

अहिले स्याम्पल लिएका युवा भारतीय नागरिक हुन् । उनी निर्मला पन्तको बलात्कार र हत्या हुँदा कञ्चनपुरमै थिए । तर, हत्यालगत्तै उनी भारत फर्किएका थिए । त्यसयता भने उनी नेपाल नफर्किएको प्रहरी स्रोतको भनाइ छ ।

अनुसन्धानमा खटिएका एक प्रहरी अधिकारीले भने, ‘हामीले अहिले उनको डीएनए परीक्षणका लागि स्याम्पल लिएका छौँ । निर्मलाको हत्या हुँदा उनी घटनास्थल नजिकै देखिएका थिए । तर, त्यसयता भने उनी भारत फर्किएर नेपाल नआएपछि शंकाको घेरामा परेका हुन् । सोही कारण हामीले डीएनए परीक्षण गर्न खोजेका हौँ ।’

योसँगै निर्मला पन्तको हत्या अनुसन्धानमा प्रहरीले १ सय १५ जनाको डीएनए परीक्षण गरेको छ । तर, विज्ञसहितको टोलीले निर्मला हत्या अनुसन्धान डीएनए टेष्टबाट हत्यारा पत्ता लाग्न नसक्ने प्रतिवेदन गृह मन्त्रालयलाई बुझाइसकेको छ । गृहमन्त्रीमा रवि लामिछाने नियुक्त भएसँगै निर्मला पन्त हत्या अनुसन्धान पहिलो प्राथमिकतामा राखेर अनुसन्धान गर्न प्रहरीलाई निर्देशन दिएका थिए ।

गृहमन्त्रीको निर्देशनपछि प्रहरी प्रधान कार्यालयले प्रहरीको केन्द्रीय अनुसन्धान ब्युरो (सीआईबी) का डीआईजी दुर्गा सिंहको नेतृत्वमा अनुसन्धान टोली बनाएर कञ्चनपुर पठाएको छ । सोही टोलीले डीएनए परीक्षणका लागि भारतीय नागरिकको स्याम्पल लिएको हो । निर्मलाको १० साउन, २०७५ मा बलात्कारपछि हत्या भएको थियो ।

बितेका चार वर्षदेखि प्रहरी निरन्तर अनुसन्धानमै छ । तर, प्रगति भने शून्यजस्तै छ । निर्मला हत्यापछि नेपाल प्रहरीमा तीन जना प्रहरी महानिरीक्षक (आईजीपी) नै फेरिएका छन् । निर्मलाको हत्या हुँदा नेपाल प्रहरीको आईजीपी थिए, सर्वेन्द्र खनाल । खनालले आफ्नै पालामा घटेको घटना सुल्झाउन सकेनन् । उनको अनिवार्य अवकाशपछि नेतृत्वमा आए, आईजीपी ठाकुरप्रसाद ज्ञवाली । उनले पनि घटना सुल्झाउन सकेनन् ।

ठाकुरको आईजीपी कार्यकाल भने छोटो थियो । उनी पनि अवकाशमा गएपछि आईजीपीमा शैलेश थापा क्षेत्री नियुक्त भए । उनको कार्यकाल दुई वर्ष लामो थियो । तर, निर्मला हत्या अनुसन्धानमा ठोस उपलब्धि हात परेन ।

क्षेत्री पनि अवकाशमा गइसकेपछि हाल आईजीपीमा धीरजप्रताप सिंह छन् । त्यस्तै, कञ्चनपुरकै प्रहरी नेतृत्वसमेत ६ पटक फेरिइसकेको छ । यसअघि प्रहरीले निर्मला हत्या अनुसन्धानमा कञ्चनपुरकै दिलिप विष्टको भूमिका शंकास्पद देखिएपछि उनलाई पक्राउ गरेर सार्वजनिक गरेको थियो ।

तर, दिलिप पक्राउपछि कञ्चनपुर तनावग्रस्त मात्रै बनेन, प्रहरी र स्थानीयवासीबीच निरन्तर झडपको अवस्थासमेत सिर्जना भयो । प्रहरीको गोली लागेर स्थानीय युवा सन्नी खुनाको ज्यानै गयो । निर्मलाको भेजाइनल स्वाबसँग डीएनए नमिलेपछि अदालतको आदेशले दिलिप थुनामुक्त भएका थिए ।

याे पनि