निर्मला हत्या प्रकरणः अनुसन्धानको सुई अझै दिलीपतिर

A+ A A-

१० साउन २०७५ मा बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तको हत्यारा अझै पत्ता लाग्न सकेको छैन । करिब दुई वर्ष पुग्दै गर्दा अनुसन्धानले पूर्णता पाउने संकेत भने दिएको छ ।

घटनाका विभिन्न कोण, सूक्ष्म अनुसन्धान र विश्लेषणबाट अनुसन्धानले पूर्णता पाउने संकेत मिलेको प्रहरी अधिकारीको दाबी छ । एक प्रहरी अधिकारीले भने, ‘हामी अपराधी को हुन् भन्ने निष्कर्षनजिक पुगेका छौं, केही प्राविधिक कारणले समय लागेको हो । अब त्यसबाट हामी बाहिर आइसक्यौं ।’

राष्ट्रिय विधि विज्ञान प्रयोगशालाका पूर्वप्रमुख रहेका डीएनए विशेषज्ञ जीवन रिजाल नेतृत्वको छानबिन समितिलेसमेत प्रहरीलाई निर्मला हत्याको अनुसन्धानको पाटो साँघुरो पारिदिएको छ ।

निर्र्मला हत्याका अभियुक्त डीएनएबाट पत्ता नलाग्ने स्पष्ट प्रतिवेदन गृह मन्त्रालयलाई बुझाएसँगै डीएनएको च्याप्टर सकिएको हो ।

डीएनएको नमूना परीक्षणबारे छानबिन गर्न बनेको उक्त समितिले संकलनमा केही त्रुटि भएको निष्कर्षसहितको प्रतिवेदन गृहमन्त्रालयमा एक महिनाअघि नै बुझाएको छ । जसका कारण अब प्रहरीलाई अनुसन्धान गर्न सहज र निर्मलाको हत्यारा पत्ता लगाउन अन्य प्रमाणमा भर पर्नुपर्ने भएको छ ।

यसबीचमा प्रहरीले अपराधी पत्ता लगाउन करिब १ सयभन्दा बढीको डीएनए परीक्षण गरेको थियो । तर, कसैको पनि मेल खाएन ।

गृहमन्त्रालयले रिजालको संयोजकत्वमा असोज पहिलो साता राष्ट्रिय विधि विज्ञान प्रयोगशालाका डीएनएविद् दिनेश झा र त्रिवि शिक्षण अस्पताल महाराजगञ्जका डा. तुलसी कँडेल सदस्य रहेको डीएनए परीक्षणसम्बन्धी विज्ञ समिति गठन गरेको थियो । उक्त समितिले कात्तिकको पहिलो साता प्रतिवेदन गृहलाई बुझाएका थिए ।

निगरानीमा दिलीपसिंह विष्ट

निर्मला हत्याको अभियोगमा गत ३ भदौमा पक्राउ परेका भीमदत्तनगरपालिका– १९ का दिलीपसिंह विष्टलाई प्रहरीले अझै निगरानीमा राखेको छ । उनलाई कञ्चनपुर प्रहरीले ४ भदौमा निर्मलाका हत्यारा भन्दै सार्वजनिक गरेको थियो ।

मानसिक रोगी विष्टलाई प्रहरीले फसाउन खोजेको भन्दै स्थानीयले विरोध गरेका थिए । विरोधले उग्र रूप लिएपछि प्रहरीले स्थानीयको आन्दोलनलाई नियन्त्रणमा लिन गोली चलाएको थियो । प्रहरीको गोली लागेर एक जनाको मृत्युसमेत भएको थियो । निर्मलाको योनीबाट निकालिएको भजाइनल स्वावसँग विष्टको डीएनए नमिलेपछि उनी रिहा भएका हुन् ।

तर, डीएनएबाहेक विष्टले निर्मला हत्या घटनाबारे दिएको बयान सबै मिल्ने अनुसन्धानमा खटिएका प्रहरी अधिकारीको दाबी छ । तर, उक्त घटनामा प्रहरी प्रधानकार्यालयले अनुसन्धानमा लापरबाही गरेको भन्दै तत्कालीन कञ्चनपुर प्रहरी प्रमुख एसपी र प्रहरी निरीक्षकलाई बस्र्खास्तगीका लागि गृह मन्त्रालय सिफारिस गरेको थियो ।

उनीहरूलाई गृह मन्त्रालयले बर्खास्तसमेत गरिसकेको छ । त्यस्तै, प्रहरीको केन्द्रीय अनुसन्धान ब्यूरो (सीआईबी) बाट निर्मला हत्याको अनुसन्धान गर्न खटिएका डीएसपीलाई समेत निलम्बन गरिएको छ । सीआईबीबाट खटिएको टोलीले नै दिलीपसिंह विष्टलाई पक्राउ गरेको हो ।

डीएनएको नमूना परीक्षणबारे छानबिन गर्न बनेको समितिको प्रतिवेदनलाई आधार मान्ने हो भने निर्मलाका हत्यारा दिलीपसिंह विष्ट नै ठहरिने केही प्रहरी अधिकारी नै बताउँछन् ।

तर, विष्टलाई पक्राउ गर्दा यसअघि उनलाई पक्राउ गर्ने प्रहरी अधिकारीमाथि नै कारबाही भएको घटना प्रहरी संगठनमाथि पेचिलो बन्ने केही प्रहरी अधिकारीको बुझाइ छ । जसका कारण समितिको प्रतिवेदन कार्यान्वयनमै आशंका गरिएको छ । निर्मला हत्या अनुसन्धानका लागि भन्दै सीआईबीको टोली अझै कञ्चनपुरमै छ ।

प्रकाशित मिति: सोमबार, मंसिर २, २०७६ १७:३१