निर्मला हत्याकाण्डः नौ महिनापछि अनुसन्धान फेरि दिलिपतिरै सोझिँदै (भिडियो अन्तर्वार्तासहित)

निर्मला हत्याकाण्डः नौ महिनापछि अनुसन्धान फेरि दिलिपतिरै सोझिँदै (भिडियो अन्तर्वार्तासहित)

A+ A A-

कञ्चनपुकी १३ वर्षीया निर्मला पन्तको बलात्कारपछि हत्या भएको नौ महिना पूरा भएको छ । तर, प्रहरीको अनुसन्धान अझै शून्य छ । उसो त नेपाल प्रहरीको इतिहासमा सबैभन्दा बढी शक्ति प्रयोग र दबाबमा अनुसन्धान गरेको यही घटना हो ।

अनुसन्धानका लागि प्रहरी संगठनमा काविल प्रहरी अधिकारीका रूपमा चिनिएका दर्जन बढी प्रहरी अधिकारीले निर्मला हत्या अनुसन्धानका लागि कञ्चनपुर पुगेर महिनाैं अनुसन्धान गरिसकेका छन् । यसमध्ये पहिलो चरणमा अनुसन्धान गर्ने प्रहरी अधिकारीको जागिरसमेत गुमेको छ । तर, अनुसन्धान जहाँको त्यहीँ छ ।

जसका कारण प्रहरीमाथि जनताको आशा र भरोसा डगमगाएको छ । प्रहरीको केन्द्रीय अनुसन्धान ब्युरो (सीआईबी) र अपराध महाशाखाको टोली हाल कञ्चनपुरमै बसेर अनुसन्धानमा खटिएका छन् ।

निर्मला हत्या आशंकामा प्रहरीले हालसम्म ७० जना बढीको डीएनए परीक्षण र १ हजार बढीलाई सोधपुछ र कल डिटेलसमेत हेरिसकेको छ । प्रहरी प्रवक्ता एसएसपी उमेशराज जोशी भने निर्मलाको हत्या अनुसन्धानमा प्रहरी अझै लागिपरेको र नयाँ प्रगति हुन नसकेको बताउँछन् ।

निर्मला हत्या अनुसन्धानका लागि पहिलो चरणमा कञ्चनपुर पुगेका प्रहरी अधिकारी भने अनुसन्धानका सबै तथ्यहरू बहिर नआउँदै प्रहरी संगठन भीडको पछि लाग्दा अनुसन्धान प्रभावित भएको दाबी गर्छन् । उनीहरूको दाबीलाई आधार मान्ने हो भने निर्मला हत्या आरोपमा ७ भदाैमा पक्राउ परेका स्थानीय दिलिपसिंह विष्ट नै देखिन्छन् ।

विष्टलाई प्रहरीले नक्कली अभियुक्त सार्वजनिक गरेको भन्दै स्थानीयले विरोध गरेपछि विष्टको डीएनए परीक्षण गरेको थियो । निर्मलाको योनीबाट निकालिएको भेजिनल स्वाबसँग विष्टको डीएनए मेल नखाएपछि छुटेका थिए ।

भेजिनल स्वाबमाथि नै प्रश्न
प्रहरीसँग निर्मला हत्या पत्ता लगाउने एक मात्र प्रमाणका रूपमा निर्मलाको योनीमा रहेको भेजिनल स्वाब मात्रै छ । निर्मला हत्याका अन्य प्रमाण नहुँदा प्रहरीलाई अपराधी पत्ता लगाउन कठिन भएको हो ।

तर, राष्ट्रिय मानवअधिकार आयोगले केही दिनअगि सरकारलाई बुझाएको प्रतिवेदनमा निर्मलाको योनीबाट निकालिएको स्वाबमा समेत केही प्राविधिक त्रुटि रहेको प्रतिवेदन बुझाएपछि निर्मला हत्याको अनुसन्धानमा थप अन्योल सिर्जना भएको छ ।

कतिपय प्रहरी अधिकारीसमेत स्वाबमा केही त्रुटि रहेको कारण निर्मला हत्याको साविती बयान दिँदासमेत डीएनए नमिलेको स्वीकार गरेका छन् ।

घुमीफिरी अनुसन्धान दिलिपतिरै
निर्मलाको हत्यापछि प्रहरीले पक्राउ गरेका दिलिपसिंह विष्ट होइन भन्दै कञ्चनपुरमा आन्दोलन नै चर्किएको थियो । आन्दोलनका क्रममा एक जनाले ज्यानसमेत गुमाए ।

तर, अहिले माहोल केही परिवर्तन भएको छ । निर्मलाकी आमासमेत निर्मलाको बलात्कार पछि हत्या दिलिपले नै गरेको हुन सक्ने बताउँछिन् ।

‘दिलिप आजभोलि मेरो घरतिरबाट हिँड्ने गरेको छ । मलाई समेत हेरेर हाँस्छ । पहिला प्रहरीलाई दिएको बयान पनि सबै मिलेको छ । म पहिला अधिकारकर्मीको पछि लागें । अहिले बुझ्दै गएँ । निर्मलाको हत्या यही दिलिपले गरे जस्तो छ,’ निर्मलाकी आमा दुर्गादेवीले भनिन् ।

निर्मला हत्या अनुसन्धानमा सुरुबाट नै अनुसन्धान गरेका एक प्रहरी अधिकारीसमेत निर्मला हत्यामा दिलिपबाहेक अरू कोही हुन नसक्ने बताउँछन् ।

‘हामीले हावाको भरमा दिलिपसिंह विष्टलाई पक्राउपछि सार्वजनिक गरेका होइनौं, घटनाको प्रकृति र विष्टले दिएको बयान सबै मिलेपछि मात्रै सार्वजनिक गरेका हौं,’ एक प्रहरी अधिकारीले भने, ‘दिलिपबाहेक अरू छन् भने किन यति बेलासम्म केही नयाँ आउँदैन त ?’

ती प्रहरी अधिकारीका अनुसार प्रहरी अधिकारीमाथि लागेका प्रमाण नष्ट, अभियुक्तलाई यातना दियो भन्ने कुरामा कुनै सत्यता नरहेको र अनुसन्धान दिलिपबाहेक अन्त नजाने बताए ।

तर दिलिपले प्रहरीलाई दिएको भिडियो अन्र्तवार्ताका कतिपय प्रसंगमा शंका गर्ने ठाउँ पनि छन् ।

तर प्रहरी अधिकारीका अनुसार अनुसन्धानको दायरामा ल्याइएको डिएनएको १६ क्यारेक्टर मध्ये ११ वटा मिलेको छ । डिएनए बाहेक उनले दिएको त्यसबेलाको अन्र्तवार्तामा केन्द्रीत भएर फेरि प्रहरी अनुसन्धान दिलिपमै केन्द्रीत हुदैछ ।

अनुसन्धानको साँघुरो घेरामा पर्दै गएका दिलिप यसअघि हत्या अभियोगमा ९ बर्ष जेल सजाय भुक्तान गरिसकेका व्यक्ति हुन ।

यस्तो थियो दिलिप विष्टले अपराध स्वीकार गरेको भिडियो बयान