निर्मला हत्या अनुसन्धानको अन्तिम निष्कर्षतिर प्रहरी, एआईजीद्वय पोखरेल र शाहीले गरे अनुसन्धान अधिकृतसँग छलफल

निर्मला हत्या अनुसन्धानको अन्तिम निष्कर्षतिर प्रहरी, एआईजीद्वय पोखरेल र शाहीले गरे अनुसन्धान अधिकृतसँग छलफल

A+ A A-

बैतडीकी १७ वर्षीया किशोरी भागरथी भट्टको बलात्कारपछि हत्या घटनाको सफल अनुसन्धानबाट हौसिएको प्रहरीले कञ्चनपुरकी निर्मला पन्तको बलात्कार र हत्या घटनाको अनुसन्धानसमेत अन्तिम निष्कर्षतिर पुगेको दाबी गरेको छ ।

बैतडी दोगडाकेदार गाउँपालिका–७, चडेपानीकी भागरथीको बलात्कार र हत्याको १३ दिनमा प्रहरीले अभियुक्तलाई पक्राउ गरी सार्वजनिक गरेको थियो ।

उनको २१ माघमा बलात्कारपछि हत्या भएको थियो । कतिपयले भागरथीको हत्या पनि निर्मला प्रकरणजस्तै गिजोलिने आशंका गरेका थिए ।

तर, प्रहरीले हत्याको १३ दिनसम्म सूक्ष्म ढंगले अनुसन्धान गरेर भागरथी पढ्दै गरेको सनातन धर्म माविकै कक्षा ११ मा अध्ययनरत उनकै गाउँका एक किशोरलाई पक्राउ गर्‍यो ।

ती किशोरले प्रहरीसमक्ष दिएको बयान र भेटिएका प्रमाणका आधारमा घटना गराउने व्यक्ति ती किशोर नै हुन् भन्ने निष्कर्षमा प्रहरी पुगेकाे हाे । यद्यप‍ि, किशोरमाथि अभियोजन गर्न भने बाँकी छ ।

यता, प्रहरी प्रधान कार्यालयले भागरथीको घटनाको सफल अनुसन्धान गरेको भन्दै पुरस्कारस्वरूप अनुसन्धानमा खटिएकामध्ये दुई जना प्रहरीलाई एक तहमाथिको बढुवा र पाँच जना प्रहरी अधिकारीलाई नगद पुरस्कार दिइसकेकाे छ ।

सोही घटनाबाट हौसिएको सुदूरपश्मिच प्रहरीले कञ्चनपुर भीमदत्त नगरपालिका–२, उल्टाखामकी १३ वर्षीया बालिका निर्मला पन्तको बलात्कारपछि हत्या घटनाको अनुसन्धानसमेत अन्तिम निष्कर्षतिर पुर्‍याएको दाबी गरेको हो ।

प्रहरीको केन्द्रीय अनुसन्धान ब्युरो (सीआईबी) र जिल्ला प्रहरी कार्यालय कञ्चनपुरले पछिल्लो अनुसन्धान केही दिनअघि पूरा गरेर प्रहरी प्रधान कार्यालयलाई जानकारी गराएको छ ।

उनीहरूले गरेको अनुसन्धान प्रतिवेदनमाथि दुई जना अतिरिक्त प्रहरी महानिरीक्षक (एआईजी) लाईसमेत ब्रिफिङ गरिएको उच्च प्रहरी स्रोतले जानकारी दिए ।

‘निर्मला बलात्कार र हत्याबारेको पछिल्लो प्रगति र अनुसन्धानको प्रतिवेदनमाथि निर्मलाको अनुसन्धानमा हालसम्म खटिएका प्रहरी अधिकारी र यसअघि खटिएका पुराना अनुसन्धान अधिकृतसमेत सामेल भएका थिए,’ प्रहरी स्रोतले भन्यो, 'सामूहिक रूपमा गरिएको छलफलमा एआईजीहरू विश्वराज पोखरेल र नीरजबहादुर शाही थिए ।’

दुवै एआईजी अनुसन्धान टोलीले गरेको अनुसन्धानमा सन्तुष्ट देखिएको ती अधिकारीको बुझाइ छ ।एआईजी पोखरेल प्रहरी प्रधान कार्यालयको अपराध अनुसन्धान विभागमा कार्यरत छन् भने अर्का एआईजी शाही मानव स्रोत तथा प्रशासन विभाग प्रमुख हुन् ।

कञ्चकपुरका प्रहरी प्रमुख एसपी उमाप्रसाद चतुर्वेदीले निर्मला हत्याको अनुुसन्धान 'जिस्ट' नजिक पुगेको र केही प्रमाणित गर्न मात्रै बाँकी रहेको बताउँदै आएका छन् । याे छलफलले निर्मला हत्याको करिब ३ वर्षपछि अनुसन्धान निष्कर्षतिर पुर्‍याउने संकेत गरेको छ ।

निर्मलाको १० साउन २०७५ मा बलात्कारपछि हत्या भएको थियो ।

विष्टमाथिको अनुसन्धा नै सदर हुने संकेत

निर्मला हत्याको अभियोगमा ३ भदौ २०७५ मै पक्राउ परेका भीमदत्त नगरपालिका– १९ का दिलीपसिंह विष्ट नै घटनामा संलग्न भएको निष्कर्षनजिक प्रहरी छ ।

एआईजीसहितको सामूहिक छलफलमा समेत विष्टको संलग्नतामाथि नै छलफल केन्द्रित रहेको र केही थप प्रमाणसमेत जुटेकाे प्रहरी स्रोतको भनाइ छ ।

विष्ट यसअघि आफ्नै भिनाजुको हत्या अभियोगमा सर्वस्वसहित जेल भुक्तान गरेका अपराधी हुन् । प्रहरीका अनुसार विष्टबाहेक निर्मला पन्तकै गाउँनजिकका एक जना अर्का पाल थरका युवालाई समेत नजिकबाट हेरिएको छ ।

‘हामीले पछिल्लो सयम दिलीप विष्टबाहेक एक जना अर्का पाल थरका युवाको गतिविधिमाथिसमेत नजिकबाट अनुसन्धान थालेका थियौँ । उनी पनि शंकास्पदमध्येका एक हुन् । तर, प्रमाणका आधार र पहिलाको बयानले दिलीप विष्टनजिक पुर्‍याउँछ, एआईजी रहेको छलफलमा समेत त्यही विषय उठ्यो,’ अनुसन्धानमा खटिएका एक प्रहरी अधिकारीले भने ।

विष्टलाई सीआईबीबाट खटिएका डीएससपी अंगुर जीसी नेतृत्वको टोलीले पक्राउ गरेको थियो । उनले त्यही बेला निर्मला बलात्कार र हत्या आफूले गरेको साविती बयान दिएका थिए ।

तर, विष्टलाई प्रहरीले फसाउन खोजेको भन्दै स्थानीयले विरोध गरेका थिए । विरोधले उग्र रूप लिएपछि प्रहरीले स्थानीयको आन्दोलनलाई नियन्त्रणमा लिन गोलीसमेत चलाएको थियो । प्रहरीको गोली लागेर एक जनाको मृत्यु भएको थियो ।

निर्मलाको योनीबाट निकालिएको भेजाइनल स्वाबसँग विष्टको डीएनए नमिलेपछि उनी भदौको अन्तिम साता रिहा भएका थिए ।

डीएनएबारे गत वर्षको कात्तिकमा राष्ट्रिय विधि विज्ञान प्रयोगशालाका पूर्वप्रमुख रहेका डीएनए विशेषज्ञ जीवन रिजाल नेतृत्वको छानबिन समितिले निर्मला हत्याका अभियुक्त डीएनएबाट पत्ता नलाग्ने र डीएनएको नमुना संकलनमै कमजाेरी भएको प्रतिवेदन गृह मन्त्रालयलाई बुझाइ सकेकाे छ ।

निर्मलाको हत्या अनुसन्धान गर्न भन्दै प्रहरी प्रधान कार्यालयले हालसम्म दर्जन प्रहरी टोलीलाई कञ्चनपुर खटाएको छ । त्यसबाहेक कञ्चनपुर जिल्लाकै प्रहरी नेतृत्वसमेत पाँच पटक फेरिएकाे छ ।

निर्मलाको हत्यापछि फेरिने जिल्ला प्रहरी प्रमुखहरूमा प्रहरी उपरीक्षक (एसपी) दिल्लीराज विष्ट, कुवेरसिंह कठायत, दिनेश आचार्य, मुकुन्द मरासिनी र हाल उमाप्रसाद चतुर्वेदी कार्यरत छन् ।

प्रकाशित मिति: आइतबार, फागुन १६, २०७७ १५:१६