एमाले नेताले ‘वरिष्ठ पत्रकार’ खोजेपछि विवाद, कार्यक्रम नै बहिष्कार

A+ A A-

नेकपा एमाले निर्वाचन परिचालन कमिटी कास्की क्षेत्र नम्बर २ ले बुधबार बिहान पत्रकार सम्मेलन बोलाएको थियो । पोखराको एउटा पार्टी प्यालेसमा बोलाइएको पत्रकार सम्मेलनमा पत्रकार र एमाले नेता-कार्यकर्ता हलभर खचाखच थिए ।

त्यही कार्यक्रममा एमाले केन्द्रीय सदस्य कृष्णबहादुर थापाको एउटा चासोले उनी आफैँ आलोचित भएका छन् । थापाले बोल्दाबोल्दै बोलाइएका पत्रकारको अवमूल्यन हुने गरी अभिव्यक्ति दिएपछि पत्रकारले उनको विरोध गरेका थिए । पार्टी जिल्ला इन्चार्जसमेत रहेका थापाले बोल्ने क्रममा भने- अल्लि वरिष्ठ पत्रकारहरू देखिइरहेको छैन । सानो कार्यक्रममा आउन नमिल्ने हो कि । आउनु हुनेलाई धन्यवाद ।

त्यसपछि पत्रकारले एकअर्कातिर हेराहेर गरे । थापाले बोल्दासम्म सहभागी अन्य पत्रकारले केही प्रतिक्रिया जनाएनन् । कार्यकर्ताले पनि अवमूल्यन शैलीमा चासो राखेर थापाबाट कमजोरी भएको गाइँगुइँ गर्न थाले । नेता थापा बोलिसकेपछि पत्रकार हरि पन्तले भने- समाचार लेख्ने वरिष्ठले होइन । त्यसो हो भने उहाँहरूलाई मात्रै बोलाए हुन्थ्यो ।

आफूहरूको अवमूल्यन गरेको भन्दै तीन जना पत्रकार कार्यक्रम नै बहिष्कार गरेर निस्किएका थिए । एउटा टेलिभिजनका क्यामेरामेन भिडियो खिच्दै थिए । संवाददाताले हलको पछाडिबाट बोलाए- निस्कौँ । हामी चाहिने रहेनछ । वरिष्ठ पत्रकार भए हुने रहेछ ।

उनीहरूलाई एमाले जिल्ला कमिटीका कार्यवाहक अध्यक्ष तेजनारायण अधिकारीले रोक्न खोजिरहेका थिए । तर, त्यहाँबाट दुई जना निस्केपछि यो विषय हलभित्र झनै चर्कियो । एकपछि अर्को गर्दै पत्रकारले विरोध गर्न थाले । त्यसमा ऐक्यबद्धता जनाउँदै हल तालीले गुञ्जियो ।

विषय चर्किने देखेपछि नेता थापाले आफ्नो अभिव्यक्तिलाई सच्याउने प्रयास गरे । उनले प्रष्ट्याए, 'वरिष्ठ पत्रकार भनेको नेपाल पत्रकार महासंघको अध्यक्ष विमला भण्डारी, हाम्रो पार्टीको प्रदेश कमिटीमा हुनुभएका पत्रकार रामकृष्ण ज्ञवालीजी, दीपेन्द्र श्रेष्ठजीलाई भनेको हुँ ।'

पत्रकारको नाम नै लिएर तीन जना नआएकोमा थापाले चिन्ता दर्साएपछि अन्य पत्रकार झनै कड्किए । दर्शकदीर्घाबाट प्रश्न आयो- पत्रकार त्यति हुन् ? थापा हडबडाउँदै आफ्ना कुरा राखेर सके । त्यसपछि अर्का पत्रकारले भने- खाली राजनीतिक पार्टीकै पत्रकारको कुरा गरेको छ । स्वतन्त्र पत्रकार हुँदैनन् र ? उनी पनि कार्यक्रम भइरहेको हलबाट बाहिरिए ।

एमाले नेतृ विद्या भट्टराई र कास्की २ (१) बाट गण्डकी प्रदेशसभा सदस्य निर्वाचित भीमबहादुर कार्कीले पत्रकारसँग साक्षात्कार गरे । कार्यक्रम सकिएपछि पनि ‘वरिष्ठ पत्रकारको खोजी’को विषय चर्चा भइरह्यो ।नेता थापाले कार्यक्रम सकिएपछि पत्रकारसँग भने- मैले नेताहरू आउँदा पछिपछि हुने । यहाँ निर्वाचित उम्मेदवार आउँदा देखिनँ भन्न खोजेको हो ।