चुनावका लागि गाडी खरिद गर्न प्रहरीलाई ७५ करोड, जीटुजी प्रक्रिया अवलम्बन गरिने

चुनावका लागि गाडी खरिद गर्न प्रहरीलाई ७५ करोड, जीटुजी प्रक्रिया अवलम्बन गरिने

A+ A A-

४ मंसिरमा हुने प्रदेश र प्रतिनिधिसभाको चुनावका लागि प्रहरीले १ सय ८० वटा नयाँ गाडी खरिद गर्ने भएको छ । प्रहरीले चुनावका लागि ७ सय नयाँ गाडी आवश्यक रहेको प्रस्ताव गृह मन्त्रालयलाई पठाएको थियो । उक्त प्रस्तावबारे गृहले अर्थ मन्त्रालयसँग बजेट माग गरेको थियो ।

तर, अर्थ मन्त्रालयले भने प्रहरीलाई चुनावका लागि गाडी खरिद गर्न ७५ करोड रुपैयाँ मात्रै उपलब्ध गराएको छ । उक्त रकमले करिब १ सय ८० को हाराहारीमा नयाँ गाडी खरिद गर्न सकिने प्रहरी प्रवक्ता डीआईजी टेकप्रसाद राईले जानकारी दिए ।

अर्थ मन्त्रालयले प्रतिगाडी ५० लाखभन्दा मुनिको खरिद गर्न प्रहरी प्रधान कार्यालयलाई भनेको छ । चुनावी सुरक्षाका लागि आवश्यक पर्ने थप गाडी भने प्रहरी प्रधान कार्यालयले भाडामा लिने डीआईजी राईको भनाइ छ । ७५ करोडको गाडी सार्वजनिक खरिद प्रक्रियाबाट खरिद गर्दा समय लाग्ने भएकाले जीटुजीमार्फत खरिद गर्ने योजना सरकारको छ ।

गाडीबाहेक अर्थले चुनावी सुरक्षाका लागि आवश्यक १ लाख १५ हजार म्यादी प्रहरी भर्नाका लागि बजेट सुनिश्चित गरेको छ । प्रहरी प्रधान कार्यालयले चुनावका लागि १ लाख २० हजार म्यादी प्रहरी आवश्यक रहेको प्रस्ताव गृह मन्त्रालयलाई पठाएको थियो ।

तर, अर्थ मन्त्रालयले १ लाख १५ हजार म्यादी प्रहरीका लागि मात्रै बजेट उपलब्ध गराएको हो । म्यादी प्रहरीले प्रहरी जवानसरह सेवा सुविधा पाउनेछन् । म्यादीको संख्या निश्चित भइसकेकाले असोज अन्तिम साताबाट एक महिनाको लागि म्यादी प्रहरी भर्ना लिने तयारी आफूहरूले गरेको डीआईजी राईले बताए ।

‘एक महिनाको तलबभत्ता र अन्य सेवा सुविधा पाउने गरेर हामी अब भर्ना प्रक्रिया थाल्छौँ । सकेसम्म कात्तिकको तलब भत्ता बुझ्ने गरेर म्यादी प्रहरी भर्न गर्ने भन्ने हाम्रो योजना छ', डीआईजी राईले भने । यसअघि प्रहरीले स्थानीय चुनावमा समेत एक महिनाअघि मात्रै १ लाख म्यादी प्रहरी भर्ना गरेको थियो । त्यही शैली अपनाएर प्रदेश र संघको चुनावमा पनि एक महिनाको तलब सुविधा दिएर म्यादी प्रहरी भर्ना गर्ने तयारी प्रहरीको छ ।

जनशक्ति र सवारीसाधनबाहेक प्रहरीलाई चुनावका लागि प्रयोग गर्न साना हतियारको समेत अभाव छ । स्थानीय चुनावमा प्रहरीले नेपाली सेनासँग २ हजार पेस्तोल भाडामा लिएको थियो । संघ र प्रदेशको चुनावमा समेत प्रहरीले पेस्तोल सेनाबाट नै माग्ने जनाएको छ । हतियार खरिद प्रक्रिया झन्झटिलो भएका कारण हतियार भने सेनासँगै माग्ने तयारी प्रहरीले गरेको हो ।

प्रकाशित मिति: बुधबार, भदौ १५, २०७९ १२:५५