'चेम्बर एक्स्पो २०२२' भृकुटीमण्डपमा सुरु

A+ A A-

'नेपाल चेम्बर एक्स्पो २०२२' काठमाडौंको भृकुटीमण्डपमा सुरु भएको छ । पाँचौँ संस्करणको चेम्बर एक्स्पोको प्रधानमन्त्री शेरबहादुर देउवाले उद्घाटन गरेका हुन् ।

एक्स्पोको उद्घाटन गर्दै प्रधानमन्त्री देउवाले व्यापारघाटा न्यूनीकरण गर्नु मुलुकका लागि मुख्य चुनौती भएको बताए । स्वदेशी उत्पादनलाई बढीभन्दा बढी गुणस्तरीय बनाई निर्यात प्रवर्द्धनमार्फत व्यापारघाटा न्यूनीकरण गर्न पनि देउवाले आग्रह गरे ।

‘निर्यात प्रवर्द्धन तथा आयात प्रतिस्थापन दुवै विषय निजीक्षेत्रको सक्रिय सहभागिता र सहकार्यबिना सम्भव हुँदैन,' उनले भने, ‘निकासी प्रवर्द्धन गर्दै व्यापारघाटालाई वाञ्छित सीमाभित्र राख्न सरकार निजीक्षेत्रसँग सहकार्य गरी अगाडि बढ्न तयार छ ।’

नेपाल चेम्बर अफ कमर्सले आयोजना गरेको प्रदर्शनीले स्वदेशी उत्पादनको प्रवर्द्धनमा सहयोग पुर्‍याउने उनले बताए । एक्स्पोले उत्पादक र उपभोक्तालाई जोड्ने र उद्यमी व्यवसायीलाई आफ्नो वस्तुको बजार विस्तार गर्न सहयोग पुर्‍याउने देउवाले बताए ।

मुलुकको आर्थिक गतिविधिलाई चलायमान बनाउन पनि एक्स्पोले महत्त्वपूर्ण भूमिका निर्वाह गर्ने नेपाल चेम्बर अफ कमर्सका अध्यक्ष राजेन्द्र मल्लले बताए । सन् २०१५ देखि वार्षिक रूपमा आयोजना हुँदै आएको चेम्बर एक्स्पो कोभिड १९ महामारीका कारणले पछिल्ला केही वर्ष स्थगित गर्नुपर्ने बाध्यात्मक अवस्था सिर्जना भएको उनले बताए ।

मुलुकभित्र आयोजना हुने अन्तर्राष्ट्रियस्तरका व्यापार मेला तथा प्रदर्शनीहरूले नवीनतम प्रविधि, उत्पादन, उपभोक्ताको चाहना एवं बजारीकरण आदि आर्थिक तथा व्यापारिक गतिविधिहरूको प्रत्यक्ष अवलोकन गर्न सकिने हुनाले चेम्बर एक्स्पोहरूले स्वदेशी उद्यमी व्यवसायी एवं आमउपभोक्ताहरूका लागि अत्यन्तै उपयोगी हुने मल्लको भनाइ छ ।

मेलामा गुणस्तरीय सामान प्रयोग गर्न एवं उपभोक्ता हितसम्बन्धी जनचेतना अभिवृृद्धि गर्ने दायित्वलाई प्रदर्शनीले प्राथमिकता दिने चेम्बरको अपेक्षा छ ।

मेलामा घरेलु तथा स्वदेशी उत्पादनका साथै कृषि एवं जडीबुटीजन्य वस्तुहरू, इलेक्ट्रोनिक सामान, गार्मेन्ट्स एवं टेक्स्टायल, छालाजन्य वस्तुहरू, कस्मेटिक, खाद्य तथा दुग्धजन्य सामग्रीहरू प्रदर्शनीमा राखिएको छ ।

उद्योग, वाणिज्य तथा आपूर्ति मन्त्रालय एवं व्यापार तथा निकासी प्रवर्द्धन केन्द्रको सहकार्यमा आयोजित अन्तर्राष्ट्रिय मेलामा बंगलादेश पार्टनर कन्ट्रीको रूपमा रहेको छ । मेलामा नेपाल, भारत, पाकिस्तानलगायत अन्य राष्ट्रका १ सय ५० भन्दा बढी स्टलहरू रहेका छन् ।

प्रकाशित मिति: बिहीबार, असार २, २०७९ १७:०४