लुम्बिनी विकास कोषका सदस्य–सचिव भन्छन्- बुद्ध जयन्तीमा मोदी आउने हल्ला सुनेका छौँ, आधिकारिक छैन

लुम्बिनी विकास कोषका सदस्य–सचिव भन्छन्- बुद्ध जयन्तीमा मोदी आउने हल्ला सुनेका छौँ, आधिकारिक छैन

A+ A A-

बुद्ध जन्मस्थल लुम्बिनीमा २५६६औँ बुद्ध जयन्ती मनाउने तयारी गरिएको छ । यसपटक बुद्ध जयन्ती चार दिनसम्म मनाइने लुम्बिनी विकास कोषले जनाएको छ । बुद्ध जयन्तीको अवसरमा १ जेठदेखि ४ जेठसम्म विभिन्न कार्यक्रम हुनेछन् ।

करिब १ करोड खर्च अनुमानसहित कोष बुद्ध जयन्ती मनाउने तयारीमा जुटेको हो । कोषद्वारा लुम्बिनीमा आयोजित पत्रकार अन्तर्क्रियामा बुद्धको जन्म, वोधिज्ञान प्राप्ति र महापरिनिर्वाणको त्रियोग परेको दिनलाई वैशाख पूर्णिमाको दिन बुद्ध जयन्ती र लुम्बिनी दिवस भव्य रूपमा मनाउने जनाएको हो ।

बुद्ध जयन्तीका दिन भारतीय प्रधानमन्त्री नरेन्द्र मोदी आउने खबरले कोषलाई हर्षित बनाएको सदस्य सचिव सानुराजा शाक्यले बताए । यसका बारेमा औपचारिक खबर सरकारबाट प्राप्त नभए पनि मोदी आए कोषले त्यससम्बन्धी तयारी गरेको उनको भनाइ छ ।

शाक्यले संस्कृति पर्यटन तथा नागरिक उड्डयनमन्त्री प्रेम बहादुर आलेको संयोजकत्वमा मूल समारोह समिति गठन भएको जानकारी दिए । त्यसका लागि विभिन्न उपसमितिहरूले काम गरिरहेको उनको भनाइ छ ।

बुद्ध जयन्तीकै अवसर पारेर लुम्बिनीमा निर्माण सम्पन्न भएको ५ हजार क्षमताको अन्तर्राष्ट्रिय बौद्ध सम्मेलन तथा ध्यान केन्द्र हलको पनि उद्घाटन गरिनेछ । प्रधानमन्त्री शेरबहादुर देउवाले हलको उद्घाटन गर्ने कार्यक्रम छ ।

२५६६औँ बुद्ध जयन्तीकै अवसरमा १ जेठमा रामग्राम देवदहमा विशेष कार्यक्रम तथा दीप प्रज्वलन एवम देवदहको भवानीपुरमा बिहान बौद्ध पूजा तथा दीप प्रज्वलन गरिनेछ ।

रामग्राम नवलपरासीमा १ जेठ साँझ ४ बजेबाट बौद्ध प्रवचन तथा दीप प्रज्वलन, २ गते रामग्राम नगरपालिकाद्वारा रामग्राम दिवस, भोजनदान हुनेछ । जेठ २ गते बिहान ६ बजे मायादेवी परिसरमा बुद्ध पूजा तथा परित्राण पाठ, बिहान ७ बजे मायादेवी परिसरदेखि शान्ति दीपसम्म शोभा यात्रा, बिहान ९ बजे प्रधानमन्त्रीबाट अन्तर्राष्ट्रिय बौद्ध सम्मेलन तथा ध्यान हलको उद्घाटन गरिनेछ ।

यस्तै, बिहान १० बजेदेखि इष्ट मोनाष्टिक जोनको कम्बोडिया मोनाष्ट्री र इष्ट पोण्डमा भोजन दान, दिउँसो २ बजे अन्तर्राष्ट्रिय बौद्ध सम्मेलन तथा ध्यान हलमा २५६६औँ बुद्ध जयन्ती समारोह प्रधानमन्त्री देउवाको प्रमुख आतिथ्यतामा तथा विशिष्ट अतिथिहरूको उपस्थितिमा विशेष समारोह गरी मनाइने शाक्यले जानकारी दिए ।

यस्तै, दिउँसो ५ बजेदेखि सोही हलमा सुरसुधाको सांगीतिक कार्यक्रमको प्रस्तुति, साँझ लुम्बिनीको मायादेवी परिसरमा दीप प्रज्वलन गरिनेछ ।

३ जेठमा लुम्बिनीदेखि कपिलवस्तुसम्म सिद्धार्थ गौतमको शोभायात्रा, प्राचिन शाक्य गणराज्यको राजधानी कपिलवस्तु तिलौराकोटलाई विश्व सम्पदामा सूचिकृत गर्ने सम्बन्धी देश विदेशका विज्ञहरूको सहभागितामा दुई दिने तिलौराकोट सम्मेलन रहेको कोषका कोषाध्यक्ष ढुण्डीराज भट्टराई (सिद्धिचरण) ले जानकारी दिए ।

प्रकाशित मिति: आइतबार, वैशाख २५, २०७९ १८:२२