काठमाडौंमा गठबन्धनका गुमनाम उम्मेदवार, जो सुनिता डंगोलसँग भिड्दैछन्

A+ A A-

काठमाडौं महानगरपालिकामा पाँचदलीय गठबन्धनको तर्फबाट उपमेयरका साझा उम्मेदवार हुन्, रामेश्वर श्रेष्ठ । उनी नेकपा एसका केन्द्रीय सदस्य एवं महानगर कमिटीका अध्यक्षसमेत हुन् । उनकाे मुख्य प्रतिस्पर्धी हुन्, नेकपा एमालेको तर्फबाट उपमेयरको उम्मेदवार बनेकी सुनिता डंगोल । प्रतिस्पर्धी सुनिता अखबारदेखि सामाजिक सञ्जालका भित्तामा समेत छाएकी छन् तर श्रेष्ठ छैनन् ।

एमालेका मेयरका उम्मेदवार केशव स्थापित, गठबन्धन (कांग्रेस) की सिर्जना सिंह, राप्रपाका मदनदास श्रेष्ठदेखि स्वतन्त्र उम्मेदवार बालेन शाहको समेत चर्चा चुलिँदो छ । तर, गठबन्धनका उम्मेदवार रामेश्वर भने गुमनाम देखिन्छन् ।

गुमनाम किन भन्ने प्रश्नमा रामेश्वर भन्छन्, ‘भेला प्रशिक्षणमा गइरहेको छु । सामाजिक सञ्जालमा कम देखिएकाले गुमनामजस्तो देखिएको हो । भौतिक रूपमा पुग्नुपर्ने ठाउँमा पुगेको छु । म सञ्जालमा भन्दा जनताको माझमा छु ।’

'मत दिने मतदाताले हो, सामाजिक सञ्जालले होइन,’ उनको निचोड छ । आफ्नो योजना मतदाताको घरदैलोमा पुर्‍याउन ब्यस्त उनी सामाजिक सञ्जालको व्यवस्थापनमा भने पछाडि परेको स्वीकार्छन् । ‘इलेक्ट्रिक मिडियाको व्यवस्थापनमा चुकेको महसुस भएको छ । अब घरदैलोसँगै सामाजिक सञ्जालमा पनि छिर्छु,’ उनी भन्छन् ।

त्यसो त गत १२ वैशाखमा उम्मेदवारी मनोनयन दर्ता गर्दा पनि राष्ट्रिय सभागृहमा उनी मिडियाको फोकसमा कमै परे । अरु उम्मेदवारको तामझामले उनी ओझेलिएको प्रतीत हुन्थ्यो । उनकै गठबन्धनको मेयरकी उम्मेदवार सिर्जनातर्फ क्यामेरा तेर्सिए । मनोनयनअघि सिर्जना र उनले संयुक्त फोटो सेसन त गराए, तर सिर्जना मनोनयनका लागि एक्लै सभागृह छिरिन् ।

‘नाम मात्रैको गठबन्धन हो ?,’ त्यो दिन भिडबाट प्रश्न नआएको पनि होइन । तर, रामेश्वर भन्छन्, ‘म नेकपा एसको मात्र उम्मेदवार होइन, कांग्रेस, माओवादी केन्द्रसहित गठबन्धनको उम्मेदवार हो । निरंकुशताविरुद्ध बनेको गठबन्धनको शक्ति ठूलो छ ।’

तर, कतिपय वडामा गठबन्धन नभएकाले छुट्टाछुट्टै कार्यक्रम गर्नुपर्ने बाध्यता सुनाउँछन् उनी । ‘गठबन्धन नभएको वडामा मित्रवत् व्यवहार गरेर घरदैलो र प्रचारप्रसार गरिरहेका छौँ,’ उनी भन्छन्, ‘कांग्रेस, माओवादीले बोलाएको कार्यक्रममा गएको छु । हाम्रोमा पनि उहाँहरूलाई बोलाएर संयुक्त भोट मागिरहेका छौँ ।’

जित्ने आधार के–के हुन् ?

उपमेयरमा प्रतिस्पर्धी एमाले भए पनि एमालेले उठाएको उम्मेदवार पार्टीको नभएकाले प्रतिस्पर्धी नै ठान्दैनन् उनी । ‘प्रतिस्पर्धी एमाले हो तर पार्टीको साधारण सदस्य पनि नरहेको व्यक्ति प्रतिस्पर्धी हुनुहुन्छ । एमालेको साथी आएको भए चुनाव रोचक हुन्थ्यो । एमाले नै नभएको व्यक्ति आएकाले डर र चिन्ता छैन,’ उनी भन्छन् ।

जितका लागि यसलाई मात्र आधार बनाएका छैनन् उनले । ‘घरघरमा ग्यासको पाइप, समुद्रमा पानीजहाज र रेलको हावादारी योजना ल्याएको छैन । गर्न सकिने योजना मात्र ल्याएको छ । योजना क्लियर भएपछि जित पनि निश्चत छ,’ उनी भन्छन् ।

जनताको मत लिन उनी पहिलो पटक मैदानमा उत्रिएका हुन् । तर, महानगरभित्रको समस्या र बेथितिबारे आफू अभ्यस्त रहेको उनी बताउँछन् । महानगरमा सुशासन कायम गर्न मैदानमा उत्रिएको बताउँछन् उनी । ‘आज गर्न सकिने काम भोलि आऊ भन्ने गरेको छ । महानगरमा सुशासन छैन । पहिलो काम नै सुशासन कायम गर्नु हो,’ उनी भन्छन् ।

शिक्षा र स्वास्थ्यमा जोड

अर्को शिक्षा र स्वास्थ्यलार्ई प्राथमिकतामा राखेका छन् उनले । ‘महानगरमा शिक्षा, स्वास्थ्य र रोजगारको समस्या छ । गुणस्तरीय शिक्षा र स्वास्थ्यलाई नागरिकको मौलिक हक बनाउने हो,’ उनी आफ्नो योजना सुनाउँछन् । महानगरको फोहोरमा उनले मोहोर देखेका छन् । उनी भन्छन्, ‘फोहोरको राजनीति बन्द गरेर मोहोर बनाउनुपर्छ । फोहोर प्रशोधन केन्द्र बनाएर फोहोरबाट ग्यास र बिजुली निकाल्न सकिन्छ । अनि सिसडोल र बन्चरेडाँडाको समस्या पनि सुल्झिन्छ ।’

फोहोरबाट मोहोर

तर, अहिले पनि महानगरको फोहोर नउठ्नुको दोष चुनावी मैदानमा रहेकालाई दिन्छन् उनी । ‘३० गतेसम्म महानगरमा फोहोरको पहाड बन्ने देखिन्छ । उपमेयरको दाबी गरेकाहरू त्यहीँ बसेर तलब खाएर योजना बनाउने विज्ञ भएका थिए । विज्ञले के काम गर्‍यो ? न सिटी बन्यो, न फोहोरको योजना बन्यो । जनताले उनीहरूलाई प्रश्न सोध्नुपर्छ,’ उनी भन्छन् ।

सम्पदाको संरक्षण

महानगरको कला, संस्कृति र सम्पदा संरक्षणमा कोष खडा गर्नुपर्ने योजना उनको छ । ‘पर्यटक आउने भनेको यहाँको संस्कृति, सम्पदा र प्रकृति हेर्ने हो । यसको संरक्षण गर्न कोष नै खडा गर्नुपर्छ । भित्री शहरका जात्रा लोप हुन थालेका छन् । प्रत्येक वडामा फरक–फरक जात्रा छन् । लोप हुन लागेका जात्रालाई महानगरले संरक्षण गर्नुपर्नेछ,’ उनी भन्छन् ।

ज्येष्ठ नागरिक र बालबालिकालाई ‘डे केयर सेन्टर’

आधुनिक जीवनशैलीले ज्येष्ठ नागरिक र बालबालिका एक्लिँदै गएका कारण उनीहरूका लागि ‘केयर सेन्टर’को अवधारणा उनले ल्याएका छन् । ‘ज्येष्ठ नागरिकलाई दिँउसो हेरचाह गर्न केयर सेन्टरको आवश्यकता छ । बालबालिका विद्यालय आएजस्तै ज्येष्ठ नागरिकलाई केयर सेन्टरमा ल्याउन सकिन्छ,’ उनी भन्छन् ।

आयात कम गर्न विद्युत्‌को प्रयोग

निर्यातभन्दा आयात बढिरहेकाले विद्युत्‌को प्रयोग गर्नुपर्ने उनको योजना छ । ‘निर्यात गर्न सकेनौँ भने आयात रोक्न सकिन्छ । विद्युत्‌ प्राधिकरणसँग मिलेर बिजुलीको प्रयोग गरेर इन्डक्सन चुलो प्रयोग गर्न सकिन्छ । जसले ग्यासको आयात कम हुन्छ । इलेक्ट्रिक सवारीको प्रयोग गरेर पेट्रोल/डिजेल रोक्न सकिन्छ, यो पूरा गर्ने प्रतिबद्धता हो,’ उनी भन्छन् ।

जाम र शौचालयको व्यवस्थापन

महानगरभित्रको सवारी जाम मुख्य समस्या भएकाले यसलाई न्यूनीकरण गर्ने उनको दाबी छ । ‘सवारी जाम कसरी कम गर्न सकिन्छ, सबै पक्षको राय र सुझावका आधारमा काम गर्ने योजना छ,’ उनी भन्छन्, ‘सार्वजनिक शौचालय छैन । प्रत्येक वडामा शौचालय बनाउने योजना छ,’ उनी भन्छन् ।

प्रकाशित मिति: मंगलबार, वैशाख २०, २०७९ १७:२४